រាជធានីភ្នំពេញ ៖ កិច្ចប្រជុំកំពូលពាណិជ្ជកម្មអន្តរជាតិលើកទី២ ដែលនឹងចាប់ផ្តើមនៅព្រឹកថ្ងៃទី១៥ កុម្ភៈនេះ នឹងផ្តោតលើប្រធានបទសំខាន់ៗចំនួន៦ និងរំពឹងមានអ្នកធុរកិច្ចជាតិ អន្តរជាតិធំៗចូលរួមប្រមាណ៥០០នាក់ ។
រាជធានីភ្នំពេញ ៖ កិច្ចប្រជុំកំពូលពាណិជ្ជកម្មអន្តរជាតិលើកទី២ ដែលនឹងចាប់ផ្តើមនៅព្រឹកថ្ងៃទី១៥ កុម្ភៈនេះ នឹងផ្តោតលើប្រធានបទសំខាន់ៗចំនួន៦ និងរំពឹងមានអ្នកធុរកិច្ចជាតិ អន្តរជាតិធំៗចូលរួមប្រមាណ៥០០នាក់ ។
កិច្ចប្រជុំនេះរៀបចំដោយសភាពាណិជ្ជកម្មអន្តរជាតិ ដែលលើកទី១ ធ្វើឡើងកាលពីឆ្នាំ២០១៤ ដោយមានការចូលរួមជាអធិបតីពីសំណាក់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ហើយលើកនេះ សម្តេចតេជោនឹងអញ្ជើញចូលរួមបើកកិច្ចប្រជុំលើកទី២ នៅថ្ងៃទី១៥ កុម្ភៈ ផងដែរ ដែលនឹងរៀបចំធ្វើឡើងនៅសណ្ឋាគារអាំងទែរកុងទីណង់តាល់។
លោក ប៊ុន សីហៈ បុគ្គលិកផ្នែករដ្ឋបាលនៃសភាពាណិជ្ជកម្មអន្តរជាតិនៃកម្ពុជា និយាយថា អ្នកធុរកិច្ចជាតិ អន្តរជាតិមកពីជុំវិញពិភពលោក នឹងអញ្ជើញចូលរួមកិច្ចប្រជុំកំពូលពាណិជ្ជកម្មអន្តរជាតិ ប្រមាណ៥០០នាក់ ។
លោកបន្តថា ៖ « កិច្ចប្រជុំនេះមានផលប្រយោជន៍យ៉ាងច្រើនដល់កម្ពុជា ព្រោះវានឹងទាក់ទាញអ្នកវិនិយោគអន្តរជាតិកាន់តែច្រើន អាចចាប់យកកាលានុវត្តន៍ភាពដើម្បីវិនិយោគនៅកម្ពុជា ។ តាមធម្មតា កិច្ចប្រជុំនេះរៀបចំធ្វើឡើងរៀងរាល់ពីរឆ្នាំម្តង ដែលរៀបចំដោយសភាពាណិជ្ជកម្មអន្តរជាតិនៃកម្ពុជា និងសហការឧបត្ថម្ភដោយដៃគូផ្នែកឯកជនដទៃទៀត » ។
ប្រធានបទសំខាន់ៗចំនួន៦ នឹងត្រូវលើកឡើងនៅក្នុងកិច្ចប្រជុំកំពូលពាណិជ្ជកម្មនេះ រួមមាន បដិសណ្ឋារកិច្ចនិងភេសជ្ជៈ និងម្ហូបអាហារ កសិកម្ម ការអប់រំ ហេដ្ឋារចនាសម្ព័ន្ធ ព័ត៌មានវិទ្យា និងប្រព័ន្ធបច្ចេកវិទ្យាព័ត៌មានវិទ្យា ច្បាប់ ពន្ធ អភិបាលកិច្ច និងកសិកម្ម ។
កិច្ចប្រជុំនេះរៀបចំ និងសម្របសម្រួលដោយលោក BRETTON .G SCIARONI ប្រធានសភាពាណិជ្ជកម្មអន្តរជាតិនៃកម្ពុជា ។
លោកបណ្ឌិត ម៉ី កល្យាណ ទីប្រឹក្សាឧត្តមក្រុមប្រឹក្សាសេដ្ឋកិច្ចជាតិ ថ្លែងថា ការរៀបចំកិច្ចប្រជុំបែបនេះ ពិតជាមានផលប្រយោជន៍ ដើម្បីទាក់ទាញអ្នកធុរកិច្ចមកវិនិយោគនៅកម្ពុជា ដែលពួកគេភាគច្រើនមិនស្គាល់កម្ពុជានោះទេ ។ ដូច្នេះ ការរៀបចំកិច្ចប្រជុំនេះ នឹងជាវេទិកាមួយផ្សព្វផ្សាយព័ត៌មានពីកម្ពុជាទៅកាន់ពិភពលោក ហើយវេទិកាបែបនេះ គួររៀបចំជារៀងរហូត ព្រោះពេលពួកគេទទួលបានព័ត៌មានល្អៗពីកម្ពុជា ពួកគេនឹងមកវិនិយោគបន្តទៀត ។
លោកបន្តថា ៖ « បើសិនជាវេទិកាបែបនេះរៀបចំមិនបានល្អ អ្នកចូលរួមព្រឹត្តិការណ៍នេះអាចរាងចាលមិនត្រឡប់មកវិញម្តងទៀតទេ។ ដូច្នេះ យើងត្រូវប្រើប្រាស់ទ្រឹស្តីអតីតប្រធានាធិបតី លី ក្វាន់យូ ដែលលើកឡើងថា ឲ្យយើងខិតខំថែរក្សាអ្នកវិនិយោគមករួចហើយ ហើយត្រូវទាក់ទាញអ្នកថ្មីមកបន្ថែមទៀត » ។
ប្រធាននាយកប្រតិបត្តិធនាគារអេស៊ីលីដា ភីអិលស៊ី លោក អិុន ចាន់នី ថ្លែងថា ការរៀបចំវេទិកាធំៗបែបនេះ ជាឱកាសសម្រាប់បង្ហាញវិនិយោគិនពីបរិយាកាសវិនិយោគ ប្រព័ន្ធច្បាប់របស់កម្ពុជា និងផ្តល់ព័ត៌មាននានាដល់វិនិយោគិន ដើម្បីឲ្យពួកគេទទួលបានព័ត៌មាន អាចបង្ហាញពីព័ត៌មានទាក់ទងនឹងតំបន់សេដ្ឋកិច្ចពិសេស និងកម្ពុជារៀបចំធ្វើជាម្ចាស់ផ្ទះវេទិកាធុរកិច្ចពិភពលោកជាដើម ។
លោកបន្តថា ៖ « ប្រសិន ជាមិនមានការរៀបចំកិច្ចប្រជុំបែបនេះទេ អ្នកវិនិយោគគាត់ពិបាករកព័ត៌មានពីកម្ពុជា ប៉ុន្តែតាមរយៈវេទិកានេះ ពួកគេអាចទទួលបានព័ត៌មាន ហើយបើពួកគេចាប់អារម្មណ៍ ពួកគេនឹងសម្រេចចិត្តវិនិយោគនៅកម្ពុជា ។ នៅពេលអ្នកវិនិយោគមកវិនិយោគនៅកម្ពុជា ពួកគេអាចផ្តល់ចំណូលដោយផ្ទាល់ដល់រាជរដ្ឋាភិបាល តាមរយៈការបង់ពន្ធ និងផ្តល់ការងារជាច្រើនដល់ប្រជាពលរដ្ឋ » ៕
ចែករំលែកព័តមាននេះ