ល្ងាចមិញ ! រថយន្ត៣គ្រឿងបុកបន្តកន្ទុយគ្នា
ខេត្តកំពង់ស្ពឺ ៖ គ្រោះថ្នាក់ចរាចរណ៍មួយបានកើតឡើងដោយរថយន្តបុកបន្តកន្ទុយគ្នាដល់ទៅ៣គ្រឿង តែសំណាងល្អអ្នកបើកបរ និងអ្នករួមដំណើរមិនមានគ្រោះថ្នាក់ …
ខេត្តកំពង់ស្ពឺ ៖ គ្រោះថ្នាក់ចរាចរណ៍មួយបានកើតឡើងដោយរថយន្តបុកបន្តកន្ទុយគ្នាដល់ទៅ៣គ្រឿង តែសំណាងល្អអ្នកបើកបរ និងអ្នករួមដំណើរមិនមានគ្រោះថ្នាក់ដល់អាយុជីវិតឡើយ គ្រាន់តែរងរបួសស្រាលប៉ុណ្ណោះ ។ ហេតុការណ៍គ្រោះថ្នាក់ចរាចរណ៍នេះកើតឡើងកាលពីវេលង៦ និង៤០នាទីល្ងាច នៅថ្ងៃទី១៤ ខែកុម្ភៈ ឆ្នាំ២០១៧ តាមបណ្ដោយផ្លូវជាតិលេខ៤ ចន្លោះគីឡូម៉ែត្រលេខ៧៤-៧៥ ត្រង់ចំណុចកូនត្រុំ ស្ថិតក្នុងឃុំអូរ ស្រុកភ្នំស្រួច ខេត្តកំពង់ស្ពឺ ។
ប្រភពពីសាក្សីនៅកន្លែងកើតហេតុបានឲ្យសមត្ថកិច្ចនគរបាលចរាចរណ៍ស្រុកភ្នំស្រួច ដឹងថា មុនពេលកើតហេតុគេបានឃើញរថយន្តម៉ាកកាមរី ហើម ពណ៌ទឹកប្រាក់ ពាក់ស្លាកលេខ បាត់ដំបង 2A-3405 បើកពីលិចទៅកើត បានបុកគ្នាជាមួយរថយន្តម៉ាកសាំងយ៉ុង ពណ៌ខៀវ គ្មានស្លាកលេខ បើកពីកើតទៅលិច (បញ្ច្រាសទិសគ្នា) បណ្តាលឲ្យអ្នករួមដំណើរ៣នាក់រងរបួសស្រាល តែមិនប៉ះពាល់ដល់អាយុជីវិតឡើយ ។
ប្រភពបន្តថា ពេលកំពុងកើតហេតុ ស្រាប់តែរថយន្ត១គ្រឿងទៀត ម៉ាកនីសាន់ ឌីសែល (NISSAN DIESEL) ពណ៌ខៀវ ពាក់ស្លាកលេខ ភ្នំពេញ 3D-0129 បើកពីខាងលិចទៅទិសកើត បានមកបុករថយន្តកាមរីហើមពីក្រោយទៀត បណ្តាលឲ្យរថយន្តរងការខូចខាតមធ្យម តែមិនបណ្តាលរងគ្រោះថ្នាក់ដល់អាយុជីវិតមនុស្សឡើយ ។
សមត្ថកិច្ចបានឲ្យដឹងថា អ្នកបើកបររថយន្តកាមរីហើមឈ្មោះ ផុន សុខុម ភេទប្រុស អាយុ៥៥ឆ្នាំ រស់នៅភូមិទី៦ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ចំណែកអ្នកបើករថយន្ត ម៉ាកសាំងយ៉ុង ឈ្មោះ វ៉ាន សាវ៉ុន ភេទប្រុស អាយុ៣០ឆ្នាំ រស់នៅភូមិខ្លុងលើ ឃុំស្រែអំបិល ស្រុកស្រែអំបិល ខេត្តកោះកុង ។ ដោយឡែកអ្នករួមដំណើរ៣នាក់ មាន ១- ឈ្មោះ ខាត់ ចន្ថ ភេទស្រី អាយុ២៣ឆ្នាំ រស់នៅភូមិអូរកូនត្រុំ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ របួសស្រាល, ២-ឈ្មោះ ស៊ន បេន ភេទប្រុស អាយុ២៥ឆ្នាំ រស់នៅភូមិអូរកូនត្រុំ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ របួសស្រាល និង ៣-ឈ្មោះ វ៉ន សាវ៉ន ភេទប្រុស អាយុ២៨ឆ្នាំ រស់នៅភូមិខ្លុងលើ ស្រុកស្រែអំបិល ខេត្តកោះកុង របួសស្រាល ។ រីឯអ្នកបើករថយន្តម៉ាកនីសាន់ ឌីសែល មិនត្រូវបានស្គាល់ឈ្មោះ និងទីលំនៅឡើយ ក្រោយពេលកើតហេតុ បានចុះរត់គេចខ្លួនបាត់ ។
ក្រោយពេលកើតហេតុ សមត្ថកិច្ចបានចុះធ្វើកំណត់ហេតុវាស់វែង និងបានបញ្ជូនអ្នករងរបួសទៅកាន់មន្ទីរពេទ្យ ដោយឡែកវត្ថុតាងត្រូវបាននាំទៅរក្សាទុកនៅអធិការដា្ឋននគរបាលស្រុក រង់ចាំភាគីពាក់ព័ន្ធទាំង៣ចូលខ្លួនមកដោះស្រាយគ្នាដោយសន្តិវិធី ៕
ចែករំលែកព័តមាននេះ