បុរសម្នាក់ខណៈកំពុងរត់ម៉ូតូឌុប ស្រាប់តែ…
រាជធានីភ្នំពេញ ៖ បុរសអ្នករត់ម៉ូតូម្នាក់ខណៈជិះម៉ូតូតាមបណ្ដោយផ្លូវ R6 ស្ថិតក្នុងសង្កាត់ស្រះចក ខណ្ឌដូនពេញ កាលពីវេលាម៉ោង១ និង៤០នាទីរំលងអាធ្រាត្រឈានចូលថ្ងៃ …
រាជធានីភ្នំពេញ ៖ បុរសអ្នករត់ម៉ូតូម្នាក់ខណៈជិះម៉ូតូតាមបណ្ដោយផ្លូវ R6 ស្ថិតក្នុងសង្កាត់ស្រះចក ខណ្ឌដូនពេញ កាលពីវេលាម៉ោង១ និង៤០នាទីរំលងអាធ្រាត្រឈានចូលថ្ងៃទី១៥ ខែកុម្ភៈ ឆ្នាំ២០១៧ ស្រាប់តែជនសង្ស័យ៣នាក់ហៅឲ្យឌុប ហើយធ្វើសកម្មភាពប្លន់យកម៉ូតូទៅបាត់ ។
ប្រភពព័ត៌មានពីជនរងគ្រោះឈ្មោះ សួន វណ្ណថន ហៅពៅ ភេទប្រុស អាយុ៤៤ឆ្នាំ ជាអ្នករត់ម៉ូតូឌុប ស្នាក់នៅផ្ទះជួលម្ដុំផ្សារសាំហាន់ សង្កាត់ទួលសង្កែ ខណ្ឌឫស្សីកែវ មានស្រុកកំណើតក្នុងភូមិត្រពាំពោធិ៍ ឃុំត្រពាំងពោធិ៍ ស្រុកគងពិសី ខេត្តកំពង់ស្ពឺ បានឲ្យដឹងថា មុនពេលកើតហេតុ ខណៈគាត់ជិះម៉ូតូ១គ្រឿង ម៉ាកហុងដាឌ្រីម ស៊េរីឆ្នាំ២០០៧ ឡើងតែម២០១៣ ពណ៌ខ្មៅ ពាក់ស្លាកលេខ កំពត 1G-6119 តាមបណ្ដោយផ្លូវ R6 ក្នុងទិសដៅពីត្បូងទៅជើង ស្រាប់តែមានក្រុមជនសង្ស័យ៣នាក់នៅឈរតាមផ្លូវ ហើយបានហៅម៉ូតូរបស់គាត់ឲ្យឌុបពីចំណុចកើតហេតុដល់សួនច្បារក្ដាន់ពីរ ក្នុងនោះជនសង្ស័យម្នាក់ក្នុងចំណោម៣នាក់បានសួរគាត់ថា ត្រឹមហ្នឹងពូយកប៉ុន្មានដែរ គាត់ក៏បានប្រាប់ថា ក្មួយឲ្យប៉ុន្មានក៏គាត់យកដែរ ពេលនោះជនសង្ស័យម្នាក់បានដើរមកជិតគាត់ហើយប្រាប់ថា ២ពាន់រៀលយកដែរអី ស្រាប់តែគ្នាគេម្នាក់ទៀតនិយាយថា ដឹងទៅធ្វើអីផង ភ្លាមនោះជនសង្ស័យម្នាក់បានដើរមកទះគាត់មួយដៃចំសៀតផ្កាខាងស្ដាំ បណ្ដាលឲ្យគាត់ដួលហើយវង្វេងវង្វាន់ ហើយគាត់បានរត់ផងស្រែកផង ថា ចោរៗ ទើបជនសង្ស័យម្នាក់ក្នុងចំណោម៣នាក់បានជិះម៉ូតូគាត់ទៅបាត់ សល់ពីរនាក់ទៀតបានរត់ចូលក្នុងការដ្ឋានចិនដើម្បីគេចខ្លួន តែភ្លាមៗនោះគាត់បានរត់មករកសមត្ថកិច្ចដែលបានយាមនៅការដ្ឋានចិនក្បែរនោះឲ្យជួយតាមរក ។
ជនរងគ្រោះបានឲ្យដឹងទៀតថា គាត់ និងសមត្ថកិច្ចម្នាក់ បានចូលទៅកន្លែងសម្រាកនៅក្នុងការដ្ឋានក៏ប្រទះឃើញជនសង្ស័យម្នាក់ក្នុងចំណោម៣នាក់កំពុងសំងំពួនក្នុងមុង សមត្ថកិច្ចក៏បានឃាត់ខ្លួនជនសង្ស័យខាងលើយកមកប៉ុស្ដិ៍នគរបាលស្រះចកដើម្បីធ្វើការសួរនាំ ។
សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនបានមានឈ្មោះ ឆន វុធ ភេទប្រុស អាយុ២៩ឆ្នាំ មុខរបរកម្មករសំណង់ ស្នាក់នៅក្នុងការដ្ឋានសំណង់ក្បែរនោះ មានស្រុកកំណើតក្នុងភូមិរហាត់ទឹក ឃុំស្វាយ ស្រុកស្វាយ ខេត្តបន្ទាយមានជ័យ ។
ក្រោយពេលកើតហេតុ ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅកាន់អធិការដ្ឋានខណ្ឌដូនពេញដើម្បីចាត់ការតាមនីតិវិធី ៕
ចែករំលែកព័តមាននេះ