រាជធានីភ្នំពេញ ៖ ការនាំចេញអង្ករក្នុងរយៈពេល៨ខែ នៃឆ្នាំ២០២២ នេះ កម្ពុជានាំអង្ករចេញបានចំនួន ៣៨៩ ០០០ តោន ដែលគិតជាទឹកប្រាក់មានចំនួន ២៤២.៨០ លានដុល្លារសហរដ្ឋអាមេរិកទៅកាន់ប្រទេសចំនួន៥៤ ទូទាំងពិភពលោក។ ដែលក្នុងនោះប្រទេសកម្ពុជា បាននាំអង្ករចេញទៅកាន់ប្រទេសចិន និងតំបន់ស្វយ័តហុងកុង ម៉ាកាវ ច្រើនជាងគេ។ នេះបើតាមរបាយការណ៍ចេញផ្សាយដោយ សហព័ន្ធស្រូវអង្ករកម្ពុជា (CRF) ចុះថ្ងៃទី ១១ ខែកញ្ញាឆ្នាំ២០២២ម្សិលមិញនេះ។
ប្រភពដដែលបានបន្តថា ប្រទេសដែលកម្ពុជា បានចេញអង្ករច្រើនជាងគេ គឺទៅកាន់ប្រទេសចិន និងតំបន់ស្វយ័តហុងកុង ម៉ាកាវ ដែលមានចំនួន ១៧៨ ១៤២ តោន ស្មើនឹង ៤៦% នៃការនាំចេញសរុប ដែលគិតជាទឹកប្រាក់មានចំនួនជាង ៩៤.៥៧ លានដុល្លារសហរដ្ឋអាមេរិក។ ក្នុងនោះការនាំចេញទៅកាន់ប្រទេសនៅក្នុងទ្វីបអឺរុបចំនួន ២៦ប្រទេស បានបរិមាណចំនួន ១៤១ ៤៨៣ តោន គិតជាទឹកប្រាក់សរុបចំនួន ៩៨.៧៤ លានដុល្លារសហរដ្ឋអាមេរិក។
សហព័ន្ធស្រូវអង្ករកម្ពុជា បានឱ្យដឹងបន្ថែមទៀតថា សម្រាប់ការនាំចេញអង្ករកម្ពុជាទៅប្រទេសនៅក្នុងអាស៊ាន មានចំនួន៤ ប្រទេស និងបានបរិមាណចំនួន ៣៤ ៦៣៣ តោន គិតជាទឹកប្រាក់មានចំនួន ២៣.៥៧ លានដុល្លារសហរដ្ឋអាមេរិក។ សម្រាប់បណ្តាប្រទេសនៅក្នុងទ្វីបអាហ្វ្រិច កម្ពុជាបាននាំចេញអង្ករបានចំនួន ៩ ប្រទេស និងបានបរិមាណសរុបចំនួន ១៣ ៤៩២ តោន ឬស្មើនឹង ៩% គិតជាទឹកប្រាក់ចំនួនជាង ១២.១២ លានដុល្លារសហរដ្ឋអាមេរិក។
បន្ថែមពីលើនេះ កម្ពុជាក៏បាននាំចេញអង្ករ បណ្តាប្រទេសនៅក្នុងតំបន់មជ្ឈឹមបូព៌ាចំនួន ៤ ប្រទេស បានចំនួន ៦ ២០៨ តោន គិតជាទឹកប្រាក់មានចំនួន ៥.៤៥ លានដុល្លារសហរដ្ឋអាមេរិក និងបណ្តាគោលដៅចំនួន ៣៤ ផ្សេងទៀតបាននាំចេញចំនួន ១៥ ០៧២ តោន ឬស្មើនឹង ៤% ដែលគិតជាទឹកប្រាក់សរុបមានចំនួនជាង ៨.២៧ លានដុល្លារសហរដ្ឋអាមេរិក។
របាយការណ៍ចេញផ្សាយដោយ សហព័ន្ធស្រូវអង្ករកម្ពុជា ដដែលបានបន្តថា នៅក្នុងចំណោមប្រទេសទាំង ៥៤ ដែលកម្ពុជា បាននាំអង្ករចេញទៅប្រទេសចិន គឺឈរលំដាប់លេខ១ ស្មើនឹង ៤៤% ប្រទេសបារាំងលេខ២ ស្មើនឹង ១៥% ប្រទេសម៉ាឡេស៊ីលេខ៣ ស្មើនឹង ៦% ប្រទេសហូឡង់លេខ4 ស្មើនឹង ៤% និងប្រទេសអ៊ីតាលី ហ្កាប៊ុង ព្រុយណេ ស្មើនឹង ៣% ក្រៅពីនោះគឺ ៤៨ ប្រទេសផ្សេងទៀត ។ ជារួមគឺការនាំចេញក្នុងរយៈពេល៨ខែនៃឆ្នាំ២០២២នេះ មានកំនើន ចំនួន ១៣.២៦% បើប្រៀបធៀបទៅរយៈពេលដូចគ្នា ក្នុងឆ្នាំ២០២១។
សំរាប់ប្រភេទអង្ករ គឺ បាននាំចេញអង្ករក្រអូបគ្រប់ប្រភេទបានចំនួន ៦៥.៨% អង្ករសចំនួន ២៩.៩១% អង្ករសរីរាង្គចំនួនជិត ២% អង្ករចំហ៊ុយ ចំនួន ជាង២% និងអង្ករដំណើបចំនួន ០.០១%។ ក្នុងរយៈពេល៨ខែ នេះកម្ពុជាបាននាំស្រូវទៅប្រទេសវៀតណាម បានចំនួន ២,២៦៩,២ ១០តោន៕
ចែករំលែកព័តមាននេះ