ប្តីប្រពន្ធជិះម៉ូតូឌុបគ្នា ត្រូវកុងតឺន័របុ.កអូសច្រើនម៉ែត្រ ឆេះយ៉ាងសន្ធោសន្ធៅ
- កំពង់ស្ពឺ
ខេត្តកំពង់ស្ពឺ ៖ បុរសជាប្តី និងប្រពន្ធ បានរងរបួសធ្ងន់ធ្ងរ ហើយត្រូវបានដឹកបញ្ជូនយកទៅសង្គ្រោះ
ខេត្តកំពង់ស្ពឺ ៖ បុរសជាប្តី និងប្រពន្ធ បានរងរបួសធ្ងន់ធ្ងរ ហើយត្រូវបានដឹកបញ្ជូនយកទៅសង្គ្រោះនៅគ្លីនិកមួយកន្លែងម្តុំកន្លែងកើតហេតុ ខណៈដែលជិះម៉ូតូឌុបគ្នាត្រូវបានរថយន្តកុងតឺន័របើកលឿនបុ.កពីក្រោយអូសជាច្រើនម៉ែត្រលើផ្លូវជាតិលេខ៤ បែកផ្កាភ្លើងបណ្តាលឱ្យឆេះរថយន្ត និងម៉ូតូបង្កឱ្យមានការភ្ញាក់ផ្អើលដល់អ្នកធ្វើដំណើរនិងសមត្ថកិច្ចជួយអន្តរាគមន៍យករថយន្តពន្លត់អគ្គីភ័យបា.ញ់ពន្លត់ កាលពីវេលាម៉ោង៦និង៣០នាទីយប់ថ្ងៃទី១០ ខែកញ្ញា ឆ្នាំ២០២២ នៅតាមបណ្តោយផ្លូវជាតិលេខ៤ ត្រង់ចន្លោះបង្គោលគីឡូម៉ែត្រលេខ ៣៧ទៅលេខ៣៨ ចំណុចភូមិអូរក្រាំងអំបិល ឃុំត្រពាំងគង ស្រុកសំរោងទង ខេត្តកំពង់ស្ពឺ។
មន្ត្រីនគរបាលចរាចណ៍ស្រុកសំរោងទងបាននិយាយឱ្យដឹងថា ភាគីខាងរថយន្ដកុងតឺន័រមួយគ្រឿងម៉ាកFUSO ពណ៌ស មិនស្គាល់ស្លាកលេខ (ត្រូវភ្លើងឆេះអស់) សណ្ដោងសឺម៉ឺរឺម៉ក់ ពាក់ស្លាកលេខ ភ្នំពេញ 4A-1115 អ្នកបើកបរមិនស្គាល់អត្តសញ្ញាណ និងអាស័យដ្ឋាននោះទេ ( បានរត់គេចក្រោយពេលកើតហេតុរួច ) ។ ចំណែកម៉ូតូ១គ្រឿង ម៉ាកហុងដា ធុនសេ125 ពណ៌ខ្មៅ ពាក់ស្លាកលេខ ភ្នំពេញ 1GH-6884 អ្នកបើកបរឈ្មោះ ស្រី វណ្ណា ភេទប្រុស អាយុ៣២ឆ្នាំ ឌុបប្រពន្ធឈ្មោះ អើន សុភាព អាយុ២៦ឆ្នាំ អ្នកទាំងពីររស់នៅភូមិត្រពាំងត្បាល ឃុំសូរសែ ស្រុកព្រៃឈរ ខេត្តកំពង់ចាម ។
មន្ត្រីនគរបាលចរាចណ៍ស្រុកសំរោងទងបាននិយាយឱ្យដឹងថា នៅមុនពេលកើតហេតុ រថយន្តកុងតឺន័រ បានបើកបរតាមបណ្តោយផ្លូវជាតិលេខ៤ ក្នុងទិសដៅ ពីទិសខាងកើតទៅទិសខាងលិច លុះធ្វើដំណើរមកដល់ចំណុចកើតហេតុខាងលើ បានបុ.កពីក្រោយម៉ូតូ១គ្រឿង ម៉ាកហុងដា កំពុងបើកបរស្របទិសគ្នា អូសជាច្រើនម៉ែត្រ បណ្ដាលឲ្យឆេះក្បាលរថយន្តកុងតឺន័រ និងឆេះម៉ូតូអស់ ។ ចំណែកប្តីប្រពន្ធទាំង២នាក់រងរបួសធ្ងន់ ត្រូវសមត្ថកិច្ចដឹកយកទៅសង្គ្រោះព្យាបាលនៅគ្លីនិកឯកជនភ្លាមៗ ម្តុំកន្លែងកើតហេតុ ។
ក្នុងករណីខាងលើនេះដែរ សមត្ថកិច្ចបានប្រើប្រាស់រថយន្ដពន្លត់អគ្គីភ័យចំនួន៣គ្រឿង(ស្រុកសំរោងទង០១គ្រឿង និងការិយាល័យអគ្គីភ័យ០២គ្រឿង) ប្រើប្រាស់ទឹកអស់៤រថយន្ដ ទើបរលត់ អាចធ្វើចរាចរណ៍ លើផ្លូវជាតិលេខ៤វិញបាន៕
ចែករំលែកព័តមាននេះ