ខឹងប្រពន្ធប្តីហេងស៊យដុតផ្ទះខ្លួនឯងចោលខាននៅ
ខេត្តក្រចេះ ៖ គ្រាន់តែទំនាស់ពាក្យសម្តីតិចតួចជាមួយប្រពន្ធ បុរសជាប្តីហេងស៊យបានដុតផ្ទះខ្លួនឯងចោលបណ្ដាលឱ្យឆេះយ៉ាងសន្ធោសន្ធៅផ្អើលអស់អ្នកជិតខាង
ខេត្តក្រចេះ ៖ គ្រាន់តែទំនាស់ពាក្យសម្តីតិចតួចជាមួយប្រពន្ធ បុរសជាប្តីហេងស៊យបានដុតផ្ទះខ្លួនឯងចោលបណ្ដាលឱ្យឆេះយ៉ាងសន្ធោសន្ធៅផ្អើលអស់អ្នកជិតខាង និងផ្អើលដល់នគរបាលស្រុកស្នួលនាំយករថយន្តពន្លត់អគ្គិភ័យទៅបាញ់ទឹកពន្លត់ទប់ស្កាត់ការឆេះរាលដាលដល់លំនៅឋានផ្សេងៗទៀត ។
ផ្ទះដែលត្រូវបុរសនោះដុតកាលពីរសៀលថ្ងៃទី១២ កុម្ភៈ ធ្វើពីឈើប្រក់ស័ង្កសីជាផ្ទះតៀមស្ថិតនៅចំណុចត្រពាំងស្បែកកើត ភូមិស្រពាំងស្រែ ឃុំ២ធ្នូ ស្រុកស្នួល ។
ក្រោយហេតុការណ៍នេះកើតឡើង មន្ត្រីនគរបាលស្រុកស្នួលបានស្រាវជ្រាវដើម្បីចាប់ខ្លួនបុរសឈ្មោះ ប៉េះ សុះ អាយុ២២ឆ្នាំ ជាខ្មែរអ៊ិស្លាម ដែលបានគេចខ្លួនបាត់បន្ទាប់ពីដុតផ្ទះខ្លួនឯងចោល ។
បើតាមស្ត្រីជាប្រពន្ធឈ្មោះ ជាន ស្រី អាយុ២០ឆ្នាំបានឱ្យដឹងថា ថ្ងៃកើតហេតុគាត់មានទំនាស់ពាក្យសម្តីជាមួយប្តីរហូតប្ដីប្រើហិង្សាដាក់គាត់និងដុតផ្ទះចោលតែម្ដង ។ ផ្ទះដែលប្ដីគាត់ដុតចោលខាននៅទាំងអស់គ្នានេះមានទំហំ៤ម៉ែត្រគុណ៤ម៉ែត្រធ្វើអំពីឈើប្រក់ស័ង្កសី និងត្រូវភ្លើងឆេះអស់ទាំងស្រុងរួមជាមួយសម្ភារប្រើប្រាស់ និងលុយកាក់មួយចំនួនទៀត។
ស្ត្រីជាប្រពន្ធបានឱ្យដឹងទៀតថា ពេលភ្លើងឆេះផ្ទះ រូបគាត់ស្រវាបានតែខោអាវនិងកូនមួយចំនួនរត់ចេញមកក្រៅ ទើបមិនបង្កគ្រោះថ្នាក់ដល់អាយុជីវិត តែគ្មានជម្រកសម្រាប់ការជ្រកកោនទៀតទេ៕
ចែករំលែកព័តមាននេះ