ខេត្តស្ទឹងត្រែង ៖ កាំភ្លើងខ្លីមួយដើម ដែលជាវត្ថុតាងក្នុងសកម្មភាពជួញដូរថ្នាំញៀន ត្រូវបង្ក្រាបបានដោយកម្លាំងការិយាល័យក៩នៃមន្ទីរប្រឆាំងគ្រឿងញៀនក្រសួងមហាផ្ទៃ កាលពីថ្ងៃទី០៨ កុម្ភៈ ជាអាវុធកម្មសិទ្ធិរបស់នាយទាហានម្នាក់ ក្នុងអង្គភាពយោធភូមិភាគ១ ដែលបានបាត់ ដោយមន្ត្រីនគរបាលការិយាល័យប្រឆាំងការជួញដូរ និងការពារអនីតិជននៃស្នងការដ្ឋាននគរបាលខេត្តស្ទឹងត្រែង លួចនិងយកទៅផ្គត់ផ្គង់ឱ្យមេក្លោងជួញដូរគ្រឿងញៀនសម្រាប់ប្រើប្រាស់ ។
តាមការអះអាងរបស់លោកអន សុជាតិ អាយុ៥៤ឆ្នាំ ជាយោធាឋានៈវរសេនីយ៍ទោ មុខងារជានាយរងការិយាល័យអភិវឌ្ឍន៍យោធភូមិភាគទី១ រស់នៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង បានធ្វើសេចក្តីរាយការណ៍ជូនអង្គភាពរបស់ខ្លួន ស្តីពីការបាត់អាវុធខ្លីម៉ាកK59 លេខ៥៤៨៦ និងគ្រាប់៨គ្រាប់ ក្នុងបង់ផលិតនៅប្រទេសសូវៀត ។
លោកបន្តថា កាលពីថ្ងៃទី១០ ធ្នូ ឆ្នាំ២០១៦ ឈ្មោះសៃ ស៊ុនលៀង ហៅលៀងក្បាលធំ ជានគរបាលការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តស្ទឹងត្រែង បានមកលេងផ្ទះរួចសុំមើល ដោយភ្លេចខ្លួនលួចយកទៅភ្លាមនោះ លោកសៃ ឈុនលៀង បានប្រាប់ថា អញខ្ចីប្រើសិន ។
លោកអន សុជាតិ បន្ថែមថា លោកបានព្យាយាមយកអាវុធនោះមកវិញ តែលោកសៃ ស៊ុនលៀង ជាប៉ូលិសរូបនោះគំរាមមកវិញថាឯងចង់បានវិញណាស់អី ប្រយ័ត្នកាំភ្លើងនោះ អញលក់យកលុយចាយហើយ ។ ក្រោយតាមយកហើយ លោកសៃ ឈុនលៀង មិនព្រមឱ្យលោកក៏បានធ្វើលិខិតរាយការណ៍ជូនអង្គភាពបានដឹងឮ និងតាមស្រាវជ្រាវរហូតនៅថ្ងៃទី០៨ កុម្ភៈ ២០១៧ កម្លាំងការិយាល័យក៩នៃមន្ទីរប្រឆាំងគ្រឿងញៀនក្រសួងមហាផ្ទៃ បានធ្វើការបង្ក្រាបករណីជួញដូរថ្នាំញៀន ឈានទៅផ្ទុះអាវុធចាប់ខ្លួន លោក ឯម សុផល មន្ត្រីនគរបាលការិយាល័យអន្តោប្រវេសន៍នៃស្នងការដ្ឋាននគរបាលខេត្តស្ទឹងត្រែង បានដកហូតថ្នាំញៀន២ម៉ឺន៤ពាន់គ្រាប់និងអាវុធខ្លីម៉ាK59 លេខBA៥៤៨៦ ជាអាវុធកម្មសិទ្ធិរបស់លោក ដែលលោកសៃ ឈុនលៀង លួចទៅនោះមែន។
ដោយគិតថា ក្រោយបាត់បង់អាវុធអាចប្រឈមប៉ះពាល់អង្គភាព លោកអន សុជាតិ បានដាក់ពាក្យប្តឹងទៅព្រះរាជអាជ្ញាអមសាលាដំបូង ដើម្បីស្នើសុំយកអាវុធសមូហភាពអង្គភាពនោះមកវិញ ។ លោក ម៉ៅ តារា ស្នងការនគរបាលខេត្តស្ទឹងត្រែងបានប្រាប់កោះសន្តិភាព កាលពីព្រឹកថ្ងៃទី១៤ កុម្ភៈ ឆ្នាំ២០១៧នេះថា ទាក់ទិនបញ្ហាវត្ថុតាងអាវុធនោះ លោកពុំទទួលរបាយការណ៍ណាមួយស្តីពីអាវុធនោះឡើយ ហើយវត្ថុតាងនោះជាប់ពាក់ព័ន្ធនិងបទល្មើស ដូច្នេះមានតែតុលាការប៉ុណ្ណោះ ដែលអាចសម្រេចបាន ។
ចែករំលែកព័តមាននេះ