ស៊យណាស់ ! ម៉ូតូក៏បាត់ ខ្លួនក៏ត្រូវគេវាយទ្រមទៀត
រាជធានីភ្នំពេញ ៖ បុរសពិការភ្នែកម្ខាងម្នាក់ ខណៈដើរទៅបំណងសួរគេរកប៉ុស្តិ៍នគរបាល ស្រាប់តែត្រូវប្រជាពលរដ្ឋនាំគ្នាចាប់វាយទ្រមខ្លួន ដោយចោទប្រកាន់ថា …
រាជធានីភ្នំពេញ ៖ បុរសពិការភ្នែកម្ខាងម្នាក់ ខណៈដើរទៅបំណងសួរគេរកប៉ុស្តិ៍នគរបាល ស្រាប់តែត្រូវប្រជាពលរដ្ឋនាំគ្នាចាប់វាយទ្រមខ្លួន ដោយចោទប្រកាន់ថាជាចោរគាស់ផ្ទះ ព្រោះចំពេលពួកគេកំពុងដេញតាមចាប់ចោរគាស់ផ្ទះដែលរស់ចោលម៉ូតូ ។ ហេតុការណ៍នេះបានកើតឡើងកាលពីវេលាម៉ោង៦ និង៣០នាទីព្រឹក ថ្ងៃទី១៤ ខែកុម្ភៈ ឆ្នាំ២០១៧ នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
យុវជនរងគ្រោះតែជាប់សង្ស័យថាចោរទៅវិញនោះឈ្មោះ ទុន រ៉ា ហៅ វ៉ែប អាយុ២៣ឆ្នាំ មុខរបរកម្មករសំណង់ ជាជនពិការភ្នែកខាងស្ដាំ មានស្រុកកំណើតនៅក្នុងភូមិឫស្សីចចក ឃុំព្រៃឃ្នេស ស្រុកមេសាង ខេត្តព្រៃវែង បច្ចុប្បន្នស្នាក់នៅផ្ទះជួលក្នុងឃុំស្វាយរលំ ស្រុកស្អាង ខេត្តកណ្ដាល បានបាត់ម៉ូតូ១គ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ 1GF-8391 ។
យុវជនរូបនោះបានប្រាប់នគរបាលឲ្យដឹងថា កាលពីល្ងាចថ្ងៃទី១៣ កុម្ភៈ ខ្លួនបានជិះម៉ូតូ១គ្រឿងនោះតែម្នាក់ឯងចេញពីផ្ទះជួលនៅក្នុងឃុំស្វាយរលំ ស្រុកស្អាង ខេត្តកណ្ដាល ឆ្ពោះមករាជធានីភ្នំពេញ ដើម្បីដើរលេង ហើយបន្ទាប់មកបានចូលទៅផឹកស៊ី និងរាំលេងនៅក្នុងក្លឹបឌីស្កូយីហោ មីតណាយ នៅក្នុងភូមិត្រពាំងថ្លឹង ព្រោះកាលពីមុនខ្លួនធ្លាប់ជួលផ្ទះស្នាក់នៅក្នុងភូមិត្រពាំងថ្លឹង ទើបស្គាល់ក្លឹបនោះ ។
យុវជនរូបនោះបន្តទៀតថា ខ្លួនបានចូលក្លឹបនោះតាំងពីព្រលប់ថ្ងៃទី១៣កុម្ភៈរហូតដល់វេលាម៉ោង៣ទៀបភ្លឺ ថ្ងៃទី១៤ ខែកុម្ភៈ ទើបចេញ ហើយបានជិះម៉ូតូបំណងត្រឡប់ទៅផ្ទះជួលវិញ ។ ប៉ុន្តែក្រោយពេលចេញផុតបានបន្តិច ក៏ឈប់នោមដោយទុកម៉ូតូក្រោយខ្នងចម្ងាយប្រមាណ៥ម៉ែត្រ លុះក្រោយមកមិនដឹងថាយ៉ាងម៉េចទៀតឡើយ ពេលដឹងខ្លួនឡើងគឺកំពុងដេកនៅក្បែរផ្ទះប្រជាពលរដ្ឋនៅជិតនោះ និងបាត់ម៉ូតូមិនឃើញ ។ បន្ទាប់ពីដឹងខ្លួន ខ្លួនក៏បានក្រោកដើរដើម្បីសួរអ្នកនៅជិតនោះរកប៉ុស្ដិ៍នគរបាលដើម្បីដាក់ពាក្យបណ្ដឹងរឿងបាត់ម៉ូតូ ប៉ុន្តែគ្រាន់តែទៅដល់ក៏ត្រូវគេចាប់ព្រួតវាយ ដោយចោទថា ជាចោរគាស់ផ្ទះទៅវិញ រួចបាននាំគាត់យកទៅប្រគល់ឲ្យនគរបាលថែមទៀត ។
ប្រភពពីនគរបាលបានឲ្យថា យុវជនរួបនេះគឺជាជនរងគ្រោះដែលបានបាត់ម៉ូតូ ហើយត្រូវបានគេសង្ស័យថាជាចោរគាស់ផ្ទះទៀត ។ ដោយក្រោយពេលចេញពីក្នុងក្លឹប យុវជននោះបានស្រវឹងផង និងងងុយដេកផង ហើយបានឈប់នោម លុះនោមរួចមិនបានយកម៉ូតូជិះទៅផ្ទះឡើយ ។ គេភ្លេចខ្លួនថាមានម៉ូតូ និងស្មានថាខ្លួនដល់ផ្ទះហើយ ក៏បានប្រាស់ខ្លួនដេកនៅលើខឿនផ្ទះនប្រជាពលរដ្ឋ ចំណែកម៉ូតូក៏ត្រូវចោរលួចយកទៅបាត់ ។ លុះព្រឹកឡើង ក្រោយពីភ្ញាក់ពីដេកទើបដឹងថាបាត់ម៉ូតូ ហើយស្របពេលដែលប្រជាពលរដ្ឋកំពុងដេញតាមចាប់ចោរគាស់ផ្ទះផង ឃើញគួរឲ្យសង្ស័យក៏បានចាប់វាយតែម្ដង ។
នគរបាលបានបន្តទៀតថា ដោយឡែកក្រុមចោរគាស់ដែលប្រជាពលរដ្ឋដេញតាមនោះ បានគេចខ្លួនបាត់ ដោយបន្សល់ទុកម៉ូតូ ម៉ាកស៊ុយស៊ីគីស្មាស់វី១គ្រឿង ពណ៌ខៀវ ពាក់ស្លាកលេខ ភ្នំពេញ 1Z-4829 ហើយម៉ូតូនោះក៏ត្រូវបានប្រជាពលរដ្ឋនាំទៅប្រគល់ឲ្យនគរបាលផងដែរ ។
ក្រោយពេលធ្វើការសាកសួរ និងស្រាវជ្រាវទើបដឹងថា យុវជននោះគឺជាជនរងគ្រោះ ដោយការបាត់ម៉ូតូដែរ មិនមែនជាចោរគាស់ផ្ទះដូចការចោទប្រកាន់ឡើយ ហើយក្រោយមករូបគេត្រូវបានដោះលែងទៅវិញ បន្ទាប់ពីបានយកឯកសារគ្រប់គ្រាន់ទៅបង្ហាញនគរបាលប៉ុស្ដិ៍ចោមចៅ ៕
ចែករំលែកព័តមាននេះ