រាជធានីភ្នំពេញ ៖ ក្រុមហ៊ុនឯកជននានាបានជំរុញឲ្យក្រសួងទេសចរណ៍ចាត់វិធានការចំពោះក្រុមហ៊ុនដែលលក់កញ្ចប់ទេសចរណ៍ហ្សេរ៉ូ ឬមិនយកប្រាក់ចំណេញ ដែលជាការបំផ្លាញដល់ឧស្សាហកម្មនេះទាំងមូល ។
រាជធានីភ្នំពេញ ៖ ក្រុមហ៊ុនឯកជននានាបានជំរុញឲ្យក្រសួងទេសចរណ៍ចាត់វិធានការចំពោះក្រុមហ៊ុនដែលលក់កញ្ចប់ទេសចរណ៍ហ្សេរ៉ូ ឬមិនយកប្រាក់ចំណេញ ដែលជាការបំផ្លាញដល់ឧស្សាហកម្មនេះទាំងមូល ។
លោក ធួន ស៊ីណាន ប្រធានសហព័ន្ធទេសចរណ៍កម្ពុជា និងជាប្រធានសមាគមទេសចរណ៍អាស៊ីប៉ាស៊ីហ្វិក បានថ្លែងនាព្រឹកថ្ងៃទី១៣ កុម្ភៈ ម្សិលមិញថា មានក្រុមហ៊ុនទេសចរណ៍មួយចំនួនបានលក់កញ្ចប់ទេសចរណ៍ដោយមិនយកប្រាក់ចំណេញ បន្ទាប់មកពួកគេបោកប្រាស់នៅពេលភ្ញៀវមកដល់កម្ពុជា តាមរយៈរូបភាពបង្ខំភ្ញៀវឲ្យម៉ាស្សា ទិញវត្ថុអនុស្សាវរីយ៍ និងទៅបរិភោគនៅភោជនីយដ្ឋានក្នុងតម្លៃមួយយ៉ាងខ្ពស់ ។ លោកបន្តថា ក្រុមហ៊ុនក្នុងស្រុកឬបរទេសធ្វើបែបនេះ ពួកគេមានការិយាល័យក្រុមហ៊ុននៅកម្ពុជា ហើយភ្ញៀវដែលពួកគេលក់កញ្ចប់ទេសចរណ៍មិនគិតពីប្រាក់ចំណេញបែបនេះ ច្រើនជាភ្ញៀវមកពីប្រទេសចិន កូរ៉េ និងវៀតណាម ។
លោកបន្តថា ៖ « ការរកស៊ីបែបនេះ គឺជាការបំផ្លាញឧស្សាហកម្មនេះទាំងមូល និងជាការបំផ្លាញកេរ្តិ៍ឈ្មោះមុខមាត់ប្រទេសជាតិ ដែលក្រសួងទេសចរណ៍គួរចាត់វិធានការឲ្យបានម៉ឺងម៉ាត់ ។ រហូតមកទល់ពេលនេះ ក្រសួងទេសចរណ៍មិនបានចាត់វិធានការជាក់លាក់នៅឡើយទេ ដោយសារក្រសួងមានមនោសញ្ចេតនា និងយោគយល់ច្រើន » ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា ថ្លែងថា ពិតជាមានក្រុមហ៊ុនទេសចរណ៍នាំភ្ញៀវមកកម្ពុជាក្នុងរូបភាពបែបនេះ ដែលភ្ញៀវទាំងនោះច្រើនមកពីប្រទេសចិន និងវៀតណាម ។ ពួកគេលក់កញ្ចប់ទេសចរណ៍ដោយមិនយកប្រាក់ចំណេញ ប៉ុន្តែពួកគេបានកោរប្រាក់ពីភ្ញៀវពេលពួកគេមកទស្សនាកម្ពុជា ដែលបញ្ហាបែបនេះបាននិងកំពុងកើតមាននៅកម្ពុជា ប៉ុន្តែមិនទាន់មានវិធានការដែលបានដាក់ចេញដោយអាជ្ញាធរនៅឡើយទេ ។ លោកស្រីបន្តថា ៖ « ក្រសួងទេសចរណ៍បានចេញសេចក្តីប្រកាសដើម្បីទប់ស្កាត់បញ្ហានេះរួចហើយ ជាលទ្ធផល សកម្មភាពបែបនេះបានកាត់បន្ថយនៅក្នុងឧស្សាហកម្មនេះ » ។
អគ្គលេខាធិការសមាគមសម្ព័ន្ធទេសចរណ៍ជាតិកម្ពុជា លោក ហូ វណ្ឌី បានលើកឡើងដែរថា កន្លងមក ពិតជាមានការលក់កញ្ចប់ទេសចរណ៍ហ្សេរ៉ូក្នុងរូបភាពបែបនេះមែន ។ ការធ្វើបែបនេះជាការបំផ្លាញធ្ងន់ធ្ងរដល់មុខមាត់ប្រទេស និងធ្វើឲ្យឧស្សាហកម្មនេះរងផលប៉ះពាល់ផងដែរ ។ លោកបន្តថា ក្រុមហ៊ុនដែលលក់កញ្ចប់ទេសចរណ៍មិនយកប្រាក់ចំណេញ ពួកគេភាគច្រើនបានបោកប្រាស់ភ្ញៀវ តាមរយៈការនាំទៅទិញវត្ថុអនុស្សាវរីយ៍ និងសេវាកម្មផ្សេងៗទៀតដែលមានតម្លៃថ្លៃ ។
លោកបន្តថា ៖ « ទោះជាយ៉ាងណាក្រសួង ទេសចរណ៍កន្លងមកបានចេញប្រកាស និងណែនាំមិនឲ្យមានការលក់កញ្ចប់សេវាកម្មបែបនេះពីសំណាក់ក្រុមហ៊ុនខិលខូចមួយ
ចំនួន » ។
លោក សូ ម៉ារ៉ា រដ្ឋលេខាធិការក្រសួងទេសចរណ៍ បានថ្លែងថា មិនមានក្រុមហ៊ុនបែបនេះច្រើននោះទេនៅកម្ពុជា ហើយកន្លងមក ក្រសួងក៏បានធ្វើការណែនាំ និងចាត់វិធានការទប់ស្កាត់បញ្ហានេះជាបន្តបន្ទាប់ផងដែរ ព្រោះបញ្ហានេះជាបទពិសោធន៍អាក្រក់មួយដែលបាននិងកំពុងកើតមាននៅប្រទេសជិតខាងរបស់យើង ។ ការលក់កញ្ចប់ទេសចរណ៍បែបនេះ វាជះឥទ្ធិពលអវិជ្ជមានច្រើននៅកម្ពុជា ហើយក្រសួងមិនគាំទ្រការធ្វើបែបនេះទេ ព្រោះកម្ពុជាមានសក្តានុពលទេសចរណ៍ទាំងវប្បធម៌ និងធម្មជាតិដ៏សម្បូរបែបរួចទៅហើយ ។
លោកបន្តថា ៖ « ប្រសិនជាមានក្រុមហ៊ុន ឬអ្នកណាដឹងថា ក្រុមហ៊ុនណាមួយលក់កញ្ចប់ទេសចរណ៍បែបនេះ សូមរាយការណ៍មកក្រសួង ក្រសួងនឹងចាត់វិធានការ » ៕
ចែករំលែកព័តមាននេះ