ក្រោយពីកម្លាំងប៉ុស្តិ៍នគរបាលរដ្ឋបាលស្ទឹងកាច់ បានទទួលសេចក្តីរាយការណ៍ ពីប្រជាពលរដ្ឋថា បានប្រទះឃើញគ្រា.ប់មិនទាន់ផ្ទុះចំនួន០១គ្រាប់ ប្រភេទ
ខេត្តប៉ៃលិន ៖ ក្រោយពីកម្លាំងប៉ុស្តិ៍នគរបាលរដ្ឋបាលស្ទឹងកាច់ បានទទួលសេចក្តីរាយការណ៍ ពីប្រជាពលរដ្ឋថា បានប្រទះឃើញគ្រា.ប់មិនទាន់ផ្ទុះចំនួន០១គ្រាប់ (ប្រភេទគ្រាប់មីនស្គរ) ខណៈពេលកំពុងតែដើរទៅមើលចម្ការ ធ្វើឱ្យពលរដ្ឋព្រលឹងចុងសក់ បន្ទាប់មកនគរបាលក៏បានចុះទៅពិនិត្យមើល បង្កឱ្យមានការភ្ញាក់ផ្អើលតែម្តង។
ហេតុការណ៍ប្រទះឃើញគ្រា.ប់មីនសេសសល់ពីសម័យសង្គ្រាមខាងលើនេះ បានកើតឡើងកាលពីវេលាម៉ោង០៣និង០០នាទីរសៀល ថ្ងៃទី០៨ ខែកញ្ញា ឆ្នាំ២០២២ នៅចំណុចមាត់អូរព្រំដែនទល់មុខ អាហារដ្ឋានបរដឺ ស្ថិតក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
បើតាមប្រភពព័ត៌មានបានឱ្យដឹងទៀតថា នៅរសៀលថ្ងៃដដែល មានប្រជាពលរដ្ឋម្នាក់ រស់នៅក្នុងភូមិ-ឃុំខាងលើ បានដើរទៅមើលចំការរបស់ខ្លួននៅក្បែរច្រកព្រំដែន លុះឈានជើងចេញពីផ្លូវបានតែបន្តិច ក៏ស្រាប់តែប្រទះឃើញគ្រា.ប់មីនស្គរ ដែលនៅសេសសល់កាលពីសម័យសង្គ្រាមផុសឡើង ដោយសារតែភ្លៀងធ្លាក់ខ្លាំងរាល់ថ្ងៃ ធ្វើឱ្យហូរដីផ្នែកខាងលើទៅអស់ ក៏ផុសលេចចេញគ្រា.ប់មីនតែម្តង។
ប្រភពដដែលបន្តទៀតថា គ្រាន់តែឃើញភ្លាម ធ្វើឱ្យពលរដ្ឋរូបនោះក៏ញ័រឡើងជើង ព្រលឹងចុងសក់ ក៏បានដើរចេញសន្សឹមៗទៅរកផ្លូវ រួចក៏ប្រញាប់ប្រញាល់រាយការណ៍ជូនសមត្ថកិច្ចឱ្យចុះទៅត្រួតពិនិត្យ និងឆ្កឹះយកចេញផងដែរ។
ប្រភពដដែលបញ្ជាក់ថា គ្រា.ប់មីនស្គរ ដែលមិនទាន់ផ្ទុះខាងលើនេះ ត្រូវកម្លាំងប៉ុស្តិ៍រដ្ឋបាលបានទំនាក់ទំនងទៅខាងអង្គភាពស៊ីម៉ាក់ (CMAC) ដើម្បីយកទៅរក្សាទុកកម្ទេចចោលនៅពេលក្រោយហើយ៕
ចែករំលែកព័តមាននេះ