ខេត្តកំពង់ធំ ៖ មនុស្សចំនួន៨នាក់ត្រូវបានកម្លាំងសមត្ថកិច្ចនគរបាលស្រុកបារាយណ៍សហការជាមួយកម្លាំងនគរបាលស្នងការខេត្តកំពង់ធំ រួមជាមួយនឹងខាងមន្ដ្រីជំនាញជលផលខេត្តកំពង់ធំ
ខេត្តកំពង់ធំ ៖ មនុស្សចំនួន៨នាក់ត្រូវបានកម្លាំងសមត្ថកិច្ចនគរបាលស្រុកបារាយណ៍សហការជាមួយកម្លាំងនគរបាលស្នងការខេត្តកំពង់ធំ រួមជាមួយនឹងខាងមន្ដ្រីជំនាញជលផលខេត្តកំពង់ធំ ដោយមានឯកភាពពីលោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ បានចុះបង្ក្រាបសកម្មភាពក្រុមឈ្មួញឈូសឆាយដីព្រៃលិចទឹកនៅជាប់នឹងតំបន់ខាងត្បូងបឹងរៀល ខាងលិចស្រុកបារាយណ៍ប្រហែល១៥គីឡូម៉ែត្រ ដែលជាតំបន់ហាមឃាត់សម្រាប់អភិរក្សសត្វខ្សឹប កាលពីថ្ងៃទី១២ ខែកុម្ភៈ ឆ្នាំ២០១៧។
បើតាមប្រភពព័ត៌មានពីមហាជនបានរិះគន់ថា ជុំវិញបញ្ហាខាងលើនេះក៏មានមន្ដ្រីពាក់ព័ន្ធមួយចំនួនបានឃុបឃឹតគ្នាបើកដៃឲ្យឈ្មួញបានធ្វើសកម្មភាពរុករាល និងឈូសឆាយដីព្រៃលិចទឹកនៅតំបន់ជិតបឹងរៀលខាងត្បូង ដើម្បីរៀបចំលក់ឲ្យទៅក្រុមហ៊ុនចិន ដោយមិនខ្លាចច្បាប់បន្តិចនោះឡើយ ដែលជាហេតុនាំឲ្យបាត់បង់នូវព្រៃតំបន់អភិរក្សសត្វខ្សឹប និងព្រៃដែលជាជម្រកត្រីពងកូននៅរដូវវស្សា។ ជាលទ្ធផលនៃការចុះបង្ក្រាបពាក់ព័ន្ធនឹងការឃាត់បានតៃកុងត្រាក់ទ័រចំនួន៨នាក់ ទី១.ឈ្មោះ ហ៊ុយ ដានិត ភេទប្រុស អាយុ២៥ឆ្នាំ រស់នៅភូមិជ្រោយថ្មីក្រោម ឃុំឆ្លូង ស្រុកឆ្លូង ទី២.ឈ្មោះ ភុំ វិជ្ជា ភេទប្រុស រស់នៅភូមិចំបក់ ឃុំតាំងក្រសាំង ស្រុកសន្ទុក ខេត្តកំពង់ធំ ទី៣.ឈ្មោះ ផេង សុផាត ភេទប្រុស អាយុ២១ឆ្នាំ រស់នៅភូមិតាអុង ឃុំតាអុង ស្រុកចំការលើ ខេត្តកំពង់ចាម។
ទី៤.ឈ្មោះ ម៉េង ហៀង ភេទប្រុស អាយុ២១ឆ្នាំ រស់នៅភូមិចំបក់ ឃុំតាំងក្រសាំង ស្រុកសន្ទុក ខេត្តកំពង់ធំ ទី៥.ឈ្មោះ ស៊ុយ សារាយ ភេទប្រុស អាយុ២១ឆ្នាំ រស់នៅភូមិសសែន ឃុំសសែន ស្រុកព្រៃឈរ ខេត្តកំពង់ចាម ទី៦.ឈ្មោះ ឈួន ស៊ីណា ភេទប្រុស អាយុ ៤៣ឆ្នាំ រស់នៅភូមិថ្មី ឃុំ ឈូកខ្សាច់ ស្រុកបារាយណ៍ ខេត្តកំពង់ធំ ទី៧.ឈ្មោះ ប៊ុល ផល្លី ភេទប្រុស អាយុ៤៣ឆ្នាំ រស់នៅភូមិថ្មី ឃុំឈូកខ្សាច់ ស្រុកបារាយណ៍ ខេត្តកំពង់ធំ និងទី៨.ឈ្មោះ ញៀន ហៀប ភេទប្រុស អាយុ៤៥ឆ្នាំ រស់នៅភូមិស្មោញ ឃុំល្អាង ស្រុកបារាយណ៍ ខេត្តត្បូងឃ្មុំ រួមជាមួយវត្ថុតាងមួយចំនួនរួមមានត្រាក់ទ័រចំនួន១០គ្រឿង ក្នុងនោះបាននាំយកមករក្សាទុកនៅអធិការដ្ឋាននគរបាលស្រុកបារាយណ៍៨គ្រឿង និង២គ្រឿងទៀតខូចយកមកមិនរួច ក្រោយពីឃាត់អ្នកបើករទាំង៨នាក់រួច បានប្រគល់ឲ្យមន្ដ្រីជំនាញរដ្ឋបាលជលផលខេត្តចាត់ការតាមច្បាប់។
ពាក់ព័ន្ធនឹងករណីបង្ក្រាបខាងលើនេះដែរ ក៏មានអ្នកបើកត្រាក់ទ័រមួយចំនួនស្រែកថា អយុត្តិធម៌ណាស់ពួកគាត់គ្រាន់តែជាអ្នកស៊ីឈ្នួលបើកត្រាក់ទ័រឲ្យគេតែប៉ុណ្ណោះ ស៊ីប្រាក់ខែគេៗឲ្យទៅភ្ជួរត្រង់ណាទៅភ្ជួរជួរត្រង់នោះឯង។
ជុំវិញបញ្ហាខាងលើនេះផងដែរលោក ប៉ែន វណ្ណរិទ្ធ នាយខណ្ឌរដ្ឋបាលជលផលកំពង់ធំ បានប្រាប់កោះសន្តិភាព ឲ្យដឹងនៅរសៀលថ្ងៃទី១៣ ខែកុម្ភៈ ឆ្នាំ២០១៧នេះថា ពួកគាត់ស្រែកថាអយុត្តិធម៌ តែដល់សមត្ថកិច្ចសួររកមុខម្ចាស់គ្រឿងចក្រ និងឈ្មោះថៅកែនោះ បែរជាមិនឆ្លើយប្រាប់សមត្ថកិច្ចនោះទេ ហើយការឈូសឆាយដីព្រៃលិចទឹកនៅតំបន់បឹងរៀលនេះពិតជាមានផលប៉ះពាល់ដីអភិរក្សសត្វខ្សឹបពិតប្រាកដមែន ទោះបីជាពួកគាត់ឆ្លើយប្រាប់តាមត្រង់ឬក៏មិនឆ្លើយសារភាពក៏ដោយ លោកនឹងរៀបចំបញ្ចូនទៅកាន់សាលាដំបូងខេត្តកំពង់ធំ ដើម្បីចាត់ការតាមផ្លូវច្បាប់នៅល្ងាចថ្ងៃទី១៣ ខែកុម្ភៈនេះ៕
ចែករំលែកព័តមាននេះ