កោះសន្តិភាពបានទទួលលិខិតកែតម្រូវមួយពីលោកនីគ ម៉ាគ នាយកកម្មវិធីសង្គ្រោះ និងថែទាំសត្វព្រៃនៃអង្គការសម្ព័ន្ធមិត្តសត្វព្រៃកម្ពុជា ទាក់ទងនឹងអត្ថបទ មានចំណងជើងថា «សត្វទោចម្កុដដ៏កម្រនៅព្រៃអង្គរ
កោះសន្តិភាពបានទទួលលិខិតកែតម្រូវមួយពីលោកនីគ ម៉ាគ នាយកកម្មវិធីសង្គ្រោះ និងថែទាំសត្វព្រៃនៃអង្គការសម្ព័ន្ធមិត្តសត្វព្រៃកម្ពុជា ទាក់ទងនឹងអត្ថបទ មានចំណងជើងថា «សត្វទោចម្កុដដ៏កម្រនៅព្រៃអង្គរកំពុងបន្តពូជ»។ សូមចុះផ្សាយអត្ថបទកែតម្រូវនេះទាំងស្រុង៖
សូមគោរពជូននិពន្ធនាយកកោះសន្តិភាពជាទី ស្រឡាញ់រាប់អាន
ខ្ញុំសូមអរគុណចំពោះការផ្តល់ឱកាសឲ្យខ្ញុំបានកែតម្រូវនូវអត្ថបទដែលមានការភាន់ច្រឡំនៅពេលដែលបានបោះពុម្ពចេញផ្សាយនៅទំព័រកោះសន្តិភាព (ទំព័រទី២០ និងទំព័រទី១៤) កាលពីថ្ងៃអង្គារទី៧ ខែកុម្ភៈ ឆ្នាំ២០១៧ ដែលមានចំណងជើងថា «សត្វទោចម្កុដដ៏កម្រនៅព្រៃអង្គរកំពុងបន្តពូជ» ។
អង្គការសម្ព័ន្ធសត្វព្រៃ និងរដ្ឋបាលព្រៃឈើកម្ពុជាបានធ្វើការរួមគ្នានៅមណ្ឌលសង្គ្រោះសត្វព្រៃភ្នំតាម៉ៅ ដើម្បីជួយបង្កើតកូនសត្វទោចតាំងពី១៥ឆ្នាំមុន ។ ហើយអំឡុងពេលនេះពួកយើងបានសិក្សាស្រាវជ្រាវដើម្បីរកព្រៃសមរម្យនៅតំបន់ព្រៃភាគខាងលិចនៃទន្លេមេគង្គដើម្បីធ្វើការដោះលែងប្រភេទសត្វទាំងនេះ ។ ការសិក្សាទាំងនេះបានបង្ហាញថានៅក្នុងគម្របព្រៃនៃតំបន់អង្គរអាចជាទីកន្លែងដែលល្អជាងគេក្នុងចំណោមតំបន់សម្រាប់ការដោះលែង ដោយសារតែមានការការពារល្អ ហើយសត្វទោចពុំមានវត្តមាននៅទីនោះទៀតទេ ។ សត្វទោចម្កុដជាប្រភេទដែលមានការគ្រប់គ្រងអាណាចក្រច្បាស់លាស់ ដូច្នេះប្រសិនបើការដោះលែងដែលមានសត្វទោចព្រៃស្រាប់រស់នៅទីនោះ វាពិតជាមិនអាចរស់នៅបានឡើយ ។
ក្នុងឆ្នាំ២០១៣មានកិច្ចប្រជុំរវាងអាជ្ញាធរជាតិអប្សរា រដ្ឋបាលព្រៃឈើ និងអង្គការសម្ព័ន្ធមិត្តសត្វព្រៃ និងបានពិភាក្សាគ្នាអំពីលទ្ធភាពនៃការដោះលែងសត្វទោចម្កុដចូលក្នុងព្រៃតំបន់អង្គរ និងកិច្ចព្រមព្រៀងបានកើតឡើង។ គូដំបូងគេគឺឈ្មោលឈ្មោះ «បារាយណ៍» និងញីឈ្មោះ «សារ៉ានីក» ដែលបានដោះលែងក្នុងទ្រុងបន្សាំក្បែរប្រាសាទតាណី ក្នុងខែមិថុនា ឆ្នាំ២០១៣ និង៦ខែក្រោយមកទៀតបានដោះលែងចូលទៅក្នុងព្រៃ ។ គូទី២ គឺឈ្មោលឈ្មោះ «បាយ័ន» និងញីឈ្មោះ«ទេវី» ត្រូវបានយកទៅដាក់ក្នុងទ្រុងបន្សាំ ជិតខ្លោងទ្វារខ្មោច ក្នុងខែមិថុនា ឆ្នាំ២០១៤ និងបានដោះលែងទៅក្នុងព្រៃនៅខែមិថុនា ឆ្នាំ២០១៥។ គូទាំងពីរបានផ្តល់កំណើត កូនទីមួយបានកើតនៅថ្ងៃទី៣ ខែកញ្ញា ឆ្នាំ២០១៤ ហើយកូនទីពីរបានកើតនៅថ្ងៃទី៣០ ខែមិថុនា ឆ្នាំ២០១៦ ហើយកូនទាំងពីរមានសុខភាពល្អ ។ យើងទាំងអស់គ្នាសង្ឃឹមថាការនាំយកគូទីបីនៃសត្វទោចម្កុដដើម្បីយកទៅដាក់ក្នុងទ្រុងបន្សាំ និងដោះលែងទៅក្នុងព្រៃនាឆ្នាំនេះ ។
អង្គការសម្ព័ន្ធមិត្តសត្វព្រៃសូមយកឱកាសនេះដើម្បីថ្លែងអំណរគុណទៅដល់អាជ្ញាធរអប្សរា និងរដ្ឋបាលព្រៃឈើសម្រាប់កិច្ចសហការដ៏ល្អក្នុងដំណើរការអនុវត្តគម្រោងថ្មី និងសម្រេចបានលទ្ធផលល្អប្រសើរក្រៃលែង។ ប្រសិនបើគ្មានភាពជាដៃគូដ៏ជិតស្និទ្ធនេះទេ ភាពជោគជ័យនេះប្រហែលជាមិនអាចសម្រេចបានឡើយ ។ ខ្ញុំគួរគូសបញ្ជាក់ថា គ្រប់ដំណាក់កាលនៃការអនុវត្តគម្រោងនេះគឺគ្មានដៃគូណាផ្សេងទៀតទេ ក្រៅតែពីអាជ្ញាធរជាតិអប្សរា រដ្ឋបាលព្រៃឈើ និងអង្គការសម្ព័ន្ធមិត្តសត្វព្រៃ ក្នុងការគ្រប់គ្រង ឬការអនុវត្តការងារនេះ ។
ពីខ្ញុំ នីគ ម៉ាគ នាយកកម្មវិធីសង្គ្រោះ និងថែទាំសត្វព្រៃអង្គការសម្ព័ន្ធមិត្តសត្វព្រៃកម្ពុជា
ចែករំលែកព័តមាននេះ