អាជ្ញាធរសង្កាត់ស្ពានថ្ម និងប្រជាពលរដ្ឋ ព្រមទាំងម្ចាស់រថយន្តដឹកដីប្រមាណជាង៣០នាក់ បានទទួចស្នើសុំសម្តេចតេជោ ហ៊ុន សែន មេត្តាជួយអន្តរាគមន៍ទៅក្រសួងសាធារណការ និងដឹកជញ្ជូន ជួយដោះលែងរថយន្តដឹកដីលើសចំណុះចំនួន៥គ្រឿងដែលក្រសួង
រាជធានីភ្នំពេញ ៖ អាជ្ញាធរសង្កាត់ស្ពានថ្ម និងប្រជាពលរដ្ឋ ព្រមទាំងម្ចាស់រថយន្តដឹកដីប្រមាណជាង៣០នាក់ បានទទួចស្នើសុំសម្តេចតេជោ ហ៊ុន សែន មេត្តាជួយអន្តរាគមន៍ទៅក្រសួងសាធារណការ និងដឹកជញ្ជូន ជួយដោះលែងរថយន្តដឹកដីលើសចំណុះចំនួន៥គ្រឿងដែលក្រសួងបានចាប់ឃាត់ទុកកាលពីថ្ងៃទី៦ ខែកញ្ញា ឆ្នាំ២០២២កន្លងមកនេះ ដើម្បីបានមក ស្ថាបនាជួសជុលផ្លូវនៅក្នុងមូលដ្ឋាន និងប្រកបមុខរកស៊ីឡើងវិញ។
ការស្នើសុំនេះ បានធ្វើឡើងកាលពីវេលាម៉ោងប្រមាណ៨និង៣០នាទីព្រឹក ថ្ងៃទី០៩ ខែកញ្ញា ឆ្នាំ២០២២នេះ ដោយពួកគាត់បានជួបប្រមូលជុំគ្នានៅលើទីតាំងដែលត្រូវស្ថាបនាផ្លូវក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ។ នៅក្នុងឱកាសនោះ ម្ចាស់រថយន្ត ក៏បានលើករូបថតសម្តេចតេជោ ហ៊ុន សែន និងសម្តេចកិត្តិព្រឹទ្ធិបណ្ឌិត ប៊ុន រ៉ានី ហ៊ុន សែន សំពះអង្វរសុំអធ្យាស្រ័យពីថ្នាក់ដឹកនាំផងដែរ។
លោក ហង្ស ជុំ ចៅសង្កាត់ស្ពានថ្មខណ្ឌដង្កោ ក្នុងនាមតំណាងប្រជាពលរដ្ឋ បានអោយដឹងថា ដោយមើលឃើញពីការលំបាករបស់ប្រជាពលរដ្ឋ ដែលធ្វើដំណើរនៅលើដងផ្លូវ ដែលរងការខូចខាតនេះ និងមានទំនាកទំនងល្អជាមួយអ្នកធ្វើអាជីវកម្មដឹកដីក្នុងមូលដ្ឋាន លោកក៏បានស្នើសុំអោយជួយ ជួសជុលស្ថាបនា កំណាត់ផ្លូវក្នុងមូលដ្ឋាន ប្រមាណ២០០០ពាន់ម៉ែត្រ។ នៅក្នុងការជួយជួសជុលស្ថាបនាផ្លូវ ពុំអស់លុយកាក់នោះទេ ព្រោះសង្កាត់មានលុយឯណា ។ នៅ ពេលស្ថាបនា មិនទាន់រួចរាល់ផង ស្រាប់តែក្រសួងសាធារណការ និងដឹកជញ្ជូនមកចាប់រថយន្តដឹកដីទាំងនោះ ផាកពិន័យ និងទុក១ឆ្នាំ ដោយអះអាងថា ដឹកលើសចំណុះ ។
លោកចៅសង្កាត់ ក៏បានលើកដៃសំពះអង្វរដល់ក្រសួងសាធារណៈ មេត្តាជួយដោះលែងរថយន្តទាំងនោះ ត្រឡប់មកវិញ ដើម្បីបានចាក់ដីជួយស្ថាបនាផ្លូវអភិវឌ្ឍក្នុងមូលដ្ឋានបន្តទៀត ។
លោក ចាន់ ផនពិសិដ្ឋ ម្ចាស់អាជីវកម្មដឹកដីបានអោយដឹងថា បន្ទាប់ពីសង្កាត់មានការស្នើសុំអោយជួយជួសជុលស្ថាបនាផ្លូវនៅក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ ប្រវែងប្រមាណ២០០០ម៉ែត្រ លោកក៏បានទៅហៅរថយន្តដឹកដីប្រភេទរថយន្តយីឌុប មកចាក់ដី ហើយគាត់ជួយចេញថ្លៃប្រេង នៅពេលចាក់ដីស្ថាបនាផ្លូវបានប្រមាណ៥ថ្ងៃ ស្រាប់តែនៅថ្ងៃទី០៦ ខែកញ្ញា ឆ្នាំ២០២២ ខាងក្រសួងសាធារណការ និងដឹកជញ្ជូន មកចាប់ដកហូតបញ្ជូនទៅទុកនៅស្នាក់ការជញ្ជីងនៅព្រែកហូរ ដើម្បីផាកពិន័យ និងទុករយៈពេល១ឆ្នាំ ។
លោក ណុល សុផល ភេទប្រុស អាយុ៤៥ឆ្នាំ ជាម្ចាស់រថយន្តដឹកដី ស្នាក់នៅស្រុកកណ្តាលស្ទឹង ខេត្តកណ្តាល ក៏បានទទួចអង្វរដល់សម្តេចតេជោ ហ៊ុន សែន និងសម្តេចកិត្តិព្រឹទ្ធិបណ្ឌិត ប៊ុន រ៉ានី ហ៊ុន សែន មេត្តាជួយអន្តរាគមន៍ដោះលែងរថយន្តបានត្រឡប់មកវិញ ព្រោះរថយន្ត នោះ ពួកគាត់ម្នាក់ៗសុទ្ធតែខ្ចីធានាគារដើម្បីមកទិញរកស៊ីដឹកដីទេ។ បើក្រសួងសាធារណការឃាត់ទុករយៈពេល១ឆ្នាំ ពួកគាត់មានគ្មានលទ្ធភាពបង់ធានាគារ ហើយរថយន្តទុកចោលខូចខាតទៀត។
គួរបញ្ជាក់ផងដែរថា ដោយអនុវត្តច្បាប់ គ្មានការលើកលែង កាលពីថ្ងៃទី៦ ខែកញ្ញា ឆ្នាំ២០២២ក្រុមការងារចល័តចម្រុះ សម្រាប់ឆ្មក់ត្រួតពិនិត្យយានយន្តដឹកជញ្ជូនលើសទម្ងន់ នៃគណៈកម្មាធិការសម្របសម្រួលអចិន្ត្រៃយ៍របស់ក្រសួងសាធារណការ និងដឹកជញ្ជូនដឹកនាំដោយលោក គឹម សាន់ អនុរដ្ឋលេខាធិការបានសហការជាមួយមន្ត្រីស្ថានីយជញ្ជីងព្រែកហូរ និងស្ថានីយក្រសាំង បានត្រួតពិនិត្យយានយន្តដឹកដី ចំនួន៥គ្រឿងដឹកលើសទម្ងន់កម្រិតកំណត់ ត្រូវបានពិន័យ និងត្រូវឃាត់ទុករយៈពេល១ឆ្នាំ ដោយលើសទម្ងន់កម្រិតកំណត់ ២០% នៃទម្ងន់អនុញ្ញាត ។
តាមមន្ត្រីជំនាញអោយដឹងថា រថយន្តទាំង៥គ្រឿងខាងលើ ដឹកលើសទម្ងន់អនុញ្ញាតចាប់ពី១៨តោនដល់២១តោន ដោយអនុលោមតាមច្បាប់ស្តីពីផ្លូវថ្នល់ មាត្រា៦០ យានយន្តដឹកទាំង នោះត្រូវពិន័យជាប្រាក់ និងឃាត់ទុកចំនួនមួយឆ្នាំ ។ បន្ទាប់ពីឃាត់រថយន្តដឹកដីបាន៣ថ្ងៃ ម្ចាស់រថយន្តទាំងនោះ ព្រមទាំងលោកចៅសង្កាត់ស្ពានថ្ម ក៏បានទទួចស្នើសុំដល់សម្តេចតេជោ និងសម្តេចកិត្តិព្រឹទ្ធិបណ្ឌិត ក៏ដូចជាក្រសួងសាធារណការ និងដឹកជញ្ជូន មេត្តាដោះលែងរថយន្តទាំង៥គ្រឿងនោះបានត្រឡប់មកវិញ ដើម្បីបន្តចាក់ដី និងស្ថាបនាផ្លូវក្នុងមូលដ្ឋានបន្តទៀត បន្ទាប់ពីម្ចាស់រថយន្តទាំងនោះបានចូលខ្លួនទៅផាកពិន័យរួចហើយ ៕
ចែករំលែកព័តមាននេះ