រាជធានីភ្នំពេញ ៖ ជាថ្មីម្តងទៀត ក្រសួងវប្បធម៌ និងវិចិត្រសិល្បៈ បានធ្វើការអំពាវនាវជាថ្មីដល់មហាជន ជាពិសេសគឺយុវវ័យកម្ពុជា កុំឱ្យប្រើប្រាស់ទិវាក្តីស្រឡាញ (១៤ កុម្ភៈ) ជាលេស សម្រាប់ធ្វើសកម្មភាពអវិជ្ជមានផ្សេងៗ ដែលជាហេតុនាំឲ្យប៉ះពាល់ដល់ភាពថ្លៃថ្នូរ និងខុសឆ្គងទៅនឹងប្រពៃណីដ៏ល្អផូរផង់របស់ខ្មែរ ។
យោងតាមសេចក្តីជូនដំណឹង ដែលបានផ្សព្វផ្សាយនៅថ្ងៃទី១៣ កុម្ភៈ នេះ បានឲ្យដឹងថា ក្រសួងវប្បធម៌ និងវិចិត្រសិល្បៈ សូមអំពាវនាវដល់អាណាព្យាបាល អាជ្ញាធរ សមត្ថកិច្ចពាក់ព័ន្ធ ជាពិសេសស្រទាប់យុវវ័យ សូមមេត្តាចូលរួមចំណែកតាមរយៈវិធានការនានា ដែលអាចធ្វើបាន ដើម្បីទប់ស្កាត់ ព្រមទាំងជួយពន្យល់ណែនាំ ក៏ដូចជាការក្រើនរំលឹកដាស់តឿនដល់កូនចៅ មិត្តភក្តិកុំឲ្យប្រើប្រាស់ទិវានៃក្តីស្រឡាញ់ ជាលេសប្រព្រឹទ្ធនូវសកម្មភាពអវិជ្ជមាននានាខុសគន្លងប្រពៃណីដ៏ត្រកាលរបស់ខ្មែរ ដែលនាំឲ្យប៉ះពាល់ដល់អនាគត និងកិត្តិយសរបស់ខ្លួន ក៏ដូចជាក្រុមគ្រួសារផងដែរ។
ទន្ទឹមនេះ ស្មារតីនៃការថែរក្សា ការពារនូវអារ្យធម៌ ទំនៀមទំលាប់ដ៏ឧត្តុង្គឧត្តមរបស់ជាតិ ក៏ត្រូវតែលើកតម្កើងឡើងដើម្បីកិត្យានុភាពរបស់កម្ពុជាផងដែរ។ សេចក្តីអំពាវនាវខាងលើ ក៏បានឲ្យដឹងបន្ថែមថា នៅថ្ងៃទី១៤កុម្ភ៖ ដែលមនុស្សមួយចំនួនជាពិសេសគ្រិះសាសនិកជន បានកំណត់ថា ជាទិវានៃក្តីស្រឡាញ់ ។ ទិវានេះ បានជ្រៀតចូលបន្តិចម្តងៗមកក្នុងសង្គមកម្ពុជា ជាពិសេសក្នុងស្រទាប់យុវវ័យ ។
ជាការពិត ក្នុងលក្ខណៈធម្មជាតិរបស់មនុស្សសេចក្តីស្រឡាញ់គ្មានដែនកំណត់ ហើយដែលមនុស្សម្នាក់ៗ អាចសម្តែងចេញនូវទឹកចិត្តនេះ ចំពោះគ្រប់អ្នកដែលនៅជុំវិញខ្លួនរួមមាន គូសង្សារ ប្តីប្រពន្ធ កូនចៅ មាតាបិតា ជីដូនជីតា និង មិត្តភក្តិជាដើម ។
ចែករំលែកព័តមាននេះ