ខេត្តកំពង់ចាម ៖ ស្នងការដ្ឋាននគរបាលខេត្តបានកំណត់យកថ្ងៃទី១៤ កុម្ភៈ ដើម្បីតាំងពិព័រណ៍បង្ហាញមុខក្រុមជនសង្ស័យចោរប្លន់៣នាក់ ក្នុងសន្និសីទសារព័ត៌មានជុំវិញសំណុំរឿងប្លន់ថៅកែស្រីហាងមាស សុខ លក្ខិណា កាលពីព្រឹកថ្ងៃទី៥កុម្ភៈ ។ ក្នុងរយៈពេល៥ថ្ងៃនៃការតាមប្រមាញ់ជន៣នាក់ត្រូវបានចាប់ខ្លួន ក្រោមកិច្ចសហការរបស់កម្លាំងនាយកដ្ឋាននគរបាលព្រហ្មទណ្ឌក្រសួងមហាផ្ទៃរួមជាមួយនគរបាលខេត្តកំពង់ចាម និងសៀមរាបដែលបានបើកប្រតិបត្តិការយ៉ាងក្តៅគគុក ដែលទីបំផុតជនសង្ស័យជាចោរប្លន់ចំនួន៣នាក់ ត្រូវបានចាប់ខ្លួនដល់ទឹកដីខេត្តសៀមរាប កាលពីយប់ថ្ងៃទី១០ កុម្ភៈ ។ ទោះជាបែបនេះក្តីក្រោយពេលចាប់ខ្លួនជនសង្ស័យទាំង៣ ត្រូវបានបញ្ជូនភ្លាមៗមករាជធានីភ្នំពេញ និងបាននាំខ្លួនបន្តមកកាន់ស្នងការដ្ឋាននគរបាលខេត្តកំពង់ចាមនាយប់ថ្ងៃទី១១ កុម្ភៈ ដើម្បីសួរនាំតាមចាប់បក្សពួកមួយចំនួនទៀតដែលកំពុងតែរត់គេចខ្លួន ។
មន្ត្រីនៃស្នងការដ្ឋាននគរបាលខេត្តកំពង់ចាមមួយរូបបានប្រាប់ឱ្យដឹងថា ក្រោយពីមានហេតុការណ៍ប្លន់អាជីវករលក់មាសដែលមានទីតាំងនៅជាប់ផ្សារធំក្រុងកំពង់ចាម លោកស្នងការនគរបាលខេត្តបានបញ្ជាឱ្យកម្លាំងព្រហ្មទណ្ឌខេត្តចុះទៅកន្លែងកើតហេតុជាបន្ទាន់ និងបានចាត់កម្លាំងឱ្យតាមរកក្រុមចោរប្លន់ប្រដាប់អាវុធទាំងនោះរហូតរកឃើញតម្រុយ ។ ក្រោមកិច្ចសហការជាមួយនគរបាលព្រហ្មទណ្ឌក្រសួង និងខេត្តមួយចំនួនទៀតដោយមានការដឹកនាំផ្ទាល់ពីកម្លាំងនគរបាលនាយកដ្ឋានព្រហ្មទណ្ឌក្រសួងបានរកឃើញថា ពួកចោរបានជិះរថយន្តគេចខ្លួនឆ្ពោះទៅកាន់ខេត្តសៀមរាប ហើយក៏បានដាក់កម្លាំងតាមប្រមាញ់ចាប់ខ្លួនបាននៅយប់ថ្ងៃទី១០ កុម្ភៈ ដែលមានរហូតដល់ទៅ៤នាក់ក្នុងនោះមានស្ត្រីម្នាក់ តែដោយសារស្ត្រីនោះមិនមានការពាក់ព័ន្ធសមត្ថកិច្ចបានដោះលែងឱ្យត្រឡប់ទៅវិញ ។
ជនសង្ស័យចំនួន៣នាក់ត្រូវបាននាំខ្លួនមកកាន់រាជធានីភ្នំពេញទាំងយប់ដើម្បីសួរនាំតាមប្រមាញ់ចាប់បក្សពួកផ្សេងៗទៀត តែក្រុមចោរឯទៀតហាក់បីដូចជាដឹងខ្លួនមុនក៏បានគេចខ្លួនបាត់អស់ ដែលតាមប្រភពថាមានទាំងមេខ្លោងម្នាក់ផង ។ មកដល់យប់ថ្ងៃទី១១ កុម្ភៈ ជនសង្ស័យទាំង៣នាក់ត្រូវបានបញ្ជូនតាមរថយន្តក្រោមកិច្ចការពារមាំទាំំរបស់សមត្ថកិច្ចមកកាន់ខេត្តកំពង់ចាមវិញ ដើម្បីចាត់ការបន្តក្នុងការស្វែងរកតាមចាប់បក្សពួកក្រុមចោរប្លន់មួយសំបុកនេះ ។ ជនសង្ស័យចោរប្លន់ចំនួន៣នាក់ដែលត្រូវសមត្ថកិច្ចចាប់ខ្លួនមាន ៖
១-ឈ្មោះ ពៅ សំអឿន ភេទប្រុស អាយុ៣៥ឆ្នាំ មានទីលំនៅក្នុងសង្កាត់ពន្សាំង ខណ្ឌព្រែកព្នៅ រាជធានីភ្នំពេញ ។
២-ឈ្មោះ សុខ ស៊ីនួន ភេទប្រុស អាយុ៣៨ឆ្នាំ ។
៣-ឈ្មោះ ស្រី សំអឿន ហៅពីង ភេទប្រុស អាយុ៤៧ឆ្នាំ ស្នាក់នៅផ្ទះជួលសង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
ចំពោះវត្ថុតាងដែលដកហូតមាន រថយន្ត២គ្រឿងជាមធ្យោបាយជិះធ្វើសកម្មភាព ។
តាមមន្ត្រីនគរបាលព្រហ្មទណ្ឌក្រសួងមហាផ្ទៃ បានឲ្យដឹងថា ក្រោយពីកើតមានបទល្មើសប្លន់ខាងលើនេះ លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិបានដាក់ផែនការទៅសមត្ថកិច្ចជំនាញពាក់ព័ន្ធ ដើម្បីឲ្យចាត់ការស្រាវជ្រាវ និងប្រើប្រាស់កម្លាំងស៊ើបអង្កេតវែកមុខក្រុមចោរប្លន់ប្រដាប់អាវុធឲ្យខាងតែបាន ។
ក្រោយពីទទួលបទបញ្ជានេះលោកឧត្តម សេនីយ៍ឯក អុិន បូរ៉ា ប្រធាននាយកដ្ឋានកណ្តាលនគរបាលយុត្តធម៌បានណែនាំទៅនាយកដ្ឋាននគរបាលព្រហ្មទណ្ឌ ដែលមានលោកឧត្តមសេនីយ៍ឯក សុខ ខេមរិន ជាប្រធាន និងបានចាត់តាំងលោកឧត្តមសេនីយ៍ទោ ឡឹក វណ្ណៈ និងលោកឧត្តមសេនីយ៍ទោ ង៉េង ជួរ អនុប្រធាននាយកដ្ឋានដឹកនាំកម្លាំងជំនាញចុះសហការជាមួយស្នងការដ្ឋាននគរបាលខេត្តកំពង់ចាម ស្នងការដ្ឋាននគរបាលរាជធានីភ្នំពេញ ស្នងការដ្ឋាននគរបាលខេត្តសៀមរាប និងនាយកដ្ឋានជំនាញកណ្តាលសន្តិសុខ ។
រហូតមកដល់ថ្ងៃទី១០ កុម្ភៈ បានធ្វើការស្រាវជ្រាវនិងឈានដល់ការចាប់ខ្លួនជនសង្ស័យ៣នាក់ដូចមានឈ្មោះរៀបរាប់ខាងលើ និងកំពុងបន្តតាមចាប់ខ្លួនបក្សពួករួមទាំងមេខ្លោងម្នាក់ទៀត ។
នៅពេលត្រូវចាប់ខ្លួនជនសង្ស័យទាំង៣នាក់សារភាពថា បន្ទាប់ពីប្លន់អាជីវករលក់មាសនៅខេត្តកំពង់ចាមបានសម្រេចភ្លាម ពួកគេបានណាត់ជួបគ្នានៅវត្តភ្នំក្នុងរាជធានីភ្នំពេញ ដោយមានរថយន្ត២គ្រឿង និងម៉ូតូ២គ្រឿង កាំភ្លើងខ្លី២ដើម ចេញទៅធ្វើសកម្មភាពបន្លំលួច«បុកទូរ»អ្នកលក់ដូរនៅម្តុំរង្វង់មូលធ្វើថ្មី ផ្លូវចូលទីរួមខេត្តកំពង់ធំយកលុយបានជាង២លានរៀល ។ ពេលបុកទូបន្លំយកលុយពីអ្នកលក់នៅម្តុំរង្វង់មូលខេត្តកំពង់ធំបានហើយ ពួកគេបន្តដំណើរទៅខេត្តសៀមរាបទៀត ។
ពេលទៅដល់ផុតផ្លូវបំបែកទៅខេត្តព្រះវិហារមានផ្សារលក់ដូរតូចមួយ ពួកគេបាន«បុកទូរ» បន្លំអ្នកលក់ទំនិញយកលុយបាន៨០០ដុល្លារ និង៤លានរៀលទៀតរួចទើបទៅដល់ខេត្តសៀមរាប ។
ខណៈក្រុមចោរប្លន់កំពុងលាក់ខ្លួននៅខេត្តសៀមរាបសមត្ថកិច្ចបានសហការស្រាវជ្រាវ និងបង្ក្រាបចាប់ខ្លួនបក្សពួកនេះបាន៣នាក់ដែលពួកគេកំពុងមានគម្រោងរៀបចំផែនការចេញប្លន់ថ្មីទៀត ព្រោះប្លន់កន្លងមកបានជោគជ័យល្អណាស់ ។ មន្ត្រីនគរបាលបន្តថា សមត្ថកិច្ចបានកំណត់មុខសញ្ញាប្លន់១ក្រុមនេះតាំងពីពេលពួកគេជួបជុំគ្នានៅរមណីយដ្ឋានវត្តភ្នំក្នុងរាជធានីភ្នំពេញម្ល៉េះ ប៉ុន្តែដោយបែកការណ៍ពួកគេក៏បំបែកគ្នាគេចពីសមត្ថកិច្ចបានទៀត ។ ទោះជាយ៉ាងនេះក្តីពួកឈាមស្រែកក៏នៅតែទទួលបានតម្រុយថា ក្រុមនេះចេញទៅច្រកណា ហើយសមត្ថកិច្ច តាមពីក្រោយជាប់រហូតទៅចាប់ខ្លួននៅខេត្តសៀមរាបបាន៣នាក់ ។
នៅថ្ងៃទី១៤ កុម្ភៈ លោកឧត្តមសេនីយ៍ត្រី ឯម កុសល ស្នងការនគរបាលខេត្តគ្រោងនឹងធ្វើសន្និសីទកាសែត ដើម្បីបង្ហាញមុខក្រុមចោរប្លន់អាជីវករលក់មាសទាំងនេះ ដើម្បីឱ្យមហាជនបានឃើញពីកិច្ចខិតប្រឹងប្រែងរបស់សមត្ថកិច្ច ។
គួររំលឹកថា ក្រុមចោរប្រដាប់អាវុធមានគ្នាចំនួន៣នាក់សុទ្ធតែពាក់មួកសុវត្ថិភាពបានធ្វើសកម្មភាពភ្ជង់ប្លន់ស្ត្រីថៅកែហាងលក់មាស«សុខលក្ខិណា» មានទីតាំងនៅជាប់ផ្សារធំក្រុងកំពង់ចាម ។ ហេតុការណ៍នេះបានកើតឡើងនៅវេលាម៉ោងជាង៧ព្រឹកថ្ងៃទី៥ កុម្ភៈ ដោយក្រុមចោរបានឆក់កាបូបដាក់គ្រឿងអលង្ការបានសម្រេចរួចជិះម៉ូតូគេចចេញទៅបាត់ ដោយមានរថយន្ត១គ្រឿងជិះបិទគូទពីខាងក្រោយផងដែរ ។
សាក្សីមួយរូបដែលបានឃើញហេតុការណ៍នេះបានប្រាប់ឱ្យដឹងថា តំបូងបានឃើញចោរជិះម៉ូតូ១គ្រឿងម៉ាកហុងដាC125 ប្រហែលស៊េរី២០១៥ ដែលស្របពេលមកដល់ហាងលក់មាសខាងលើនោះ ស្រាប់តែមានការប្រតាយប្រតប់គ្នាដំបូងគេនឹកស្មានតែមនុស្សដេញវាយគ្នា តែបន្តិចក្រោយមកទើបឃើញអ្នកអង្គុយនៅកណ្តាលគេក្នុងចំណោម៣នាក់ បានយកអាវុធមកភ្ជង់ស្ត្រីអ្នកលក់មាស ទើបរូបគេស្រែកចោរៗខ្លាំងៗ ក៏ធ្វើឱ្យចោរឮបានយកអាវុធខ្លីភ្ជង់តំរង់ពីចំងាយ។ ដោយខ្លាចគ្រោះថ្នាក់ដល់អាយុជីវិតគាត់ ក៏បានពួនសង្ងំកន្លែងគេផ្ញើកង់ម៉ូតូ រួចចោរទាំង៣នាក់នោះ ប្រញាប់ជិះម៉ូតូគេចចេញទៅទិសខាងលិច និងបត់ទៅខាងត្បូងបាត់តាមបណ្តោយផ្លូវសួនច្បារ ។
លោកវរសេនីយ៍ត្រី រស់ សារ៉ាន់ អធិការរងនគរបាលក្រុងកំពង់ចាមទទួលផែនព្រហ្មទណ្ឌប្រាប់ឱ្យដឹងថា នៅព្រឹកថ្ងៃនោះអាជីវករឈ្មោះ សេង លក្ខិណា ភេទស្រី អាយុ៤៥ឆ្នាំ បានជិះរថយន្តឡិចស៊ីស១គ្រឿងចេញពីផ្ទះរបស់ខ្លួនមកកាន់ហាងលក់ដូរ ដែលស្ថិតនៅខាងលិចផ្សារធំក្រុងកំពង់ចាមជាធម្មតា ស្របពេលដែលមកដល់មុខហាង គ្រាន់តែបានបើកទ្វាររថយន្តកាន់កាបូបដាក់គ្រឿងអលង្ការចុះមិនទាន់ចេញផុតត្រឹមត្រូវផង ស្រាប់តែមានចោរចំនួន៣នាក់ជិះម៉ូតូ១គ្រឿង ប្រដាប់ដោយអាវុធខ្លី២ដើមបានមកដល់ក៏ឆក់កាបូបនោះ ហើយចោរទាំងនោះក៏បានប្រញាប់ឡើងជិះម៉ូតូ ដែលបក្សពួករបស់វាបានបញ្ឆេះចាំជាស្រេចជិះមកខាងលិចផ្សារ បានបត់ទៅតាមផ្លូវហាងម្លប់ត្នោតឡើងទៅផ្លូវជាតិលេខ៧ ។ ដោយសារតែផ្លូវបត់បែនច្រើននោះចោរបានគេចបាត់ស្រមោលតែម្តង ។
លោកអធិការរងបញ្ជាក់ទៀតថា ក្រោយកើតហេតុភ្លាមនោះកម្លាំងសមត្ថកិច្ចបានទៅដល់កន្លែងកើតហេតុ និងតាមបញ្ជាររបស់លោកស្នងការនគរបាលខេត្តក៏បានចាត់ឱ្យកម្លាំងព្រហ្មទណ្ឌកំរិតធ្ងន់ខេត្តចុះមកស្រាវជ្រាវផងដែរ ។ ចំពោះទ្រព្យសម្បតិ្តដែលមានក្នុងកាបូបនោះត្រូវបាត់បង់មានប្រាក់ដុល្លារចំនួន៣.០០០ដុល្លារ ប្រាក់រៀលចំនួន៤លានរៀល គ្រឿងអលង្ការសរុបចំនួន៥.០០០ដុល្លារ ព្រមទាំងទូរស័ព្ទដៃចំនួន៤គ្រឿងផងដែរ ៕
ចែករំលែកព័តមាននេះ