ខេត្ដកំពង់ឆ្នាំង ៖ អំណោយរបស់សប្បុរសជនជាថ្មីទៀត ត្រូវបានភ្នាក់ងារកោះសន្ដិភាពនាំយកទៅប្រគល់ដល់អ្នកចិញ្ចឹមទារិកាអាយុជាង១០ថ្ងៃ ដែលត្រូវឪពុកចិត្ដអន្យតិរ្ថិយវាយម្ដាយឱ្យស្លាប់កាលពីថ្ងៃទី២ មករាកន្លងទៅ ។ អំណោយជាទឹកប្រាក់សរុបមានចំនួន១៨ម៉ឺនរៀលនិង១០ដុល្លារត្រូវបានប្រគល់ជូនស្ដ្រីឈ្មោះហេង ស្រីនិច្ច ដែលត្រូវជាភរិយារបស់ឈ្មោះសុក និមលប្អូនបង្កើតរបស់ស្ដ្រីរងគ្រោះដែល បានស្លាប់ ដោយសារប្ដីវាយទាំងសរសៃខ្ចី ទើបឆ្លងទន្លេបានជាង១០ថ្ងៃ គឺស្ដ្រីឈ្មោះសុខ វ៉ាន់នី ។
គួរបញ្ជាក់ថា ក្រោយពីម្ដាយទារិកាអាយុជាង១០ថ្ងៃបានស្លាប់ទៅជីដូនឈ្មោះកែ ម៉ឺន បានយកចៅ (ទារិកា) មកចិញ្ចឹម រួមទាំងបងរបស់ទារិកាឈ្មោះគង់ គឹមឡាង អាយុ១០ឆ្នាំម្នាក់ទៀត ប៉ុន្ដែដោយជីដូនពុំមានលទ្ធភាពចិញ្ចឹម ទើបសំរេចឱ្យកូនប្អូនដែលត្រូវជាម្ដាយមីងទារិកានេះដែរ ដែលម្ដាយមីងនោះរៀបការពីរឆ្នាំហើយមិនមានកូនទេ។ អំណោយរបស់សប្បុរសជនដែលបានប្រគល់ជូននៅថ្ងៃទី៩ ខែមករា គឺបានការឧបត្ថម្ភពីសប្បុរសជនរួមមាន ១-លោកទ្រីវ ជីវ៉ា អគ្គនាយកក្រុមហ៊ុនទេសចរណ៍វើលដ៍ផប ១០ម៉ឺនរៀល ២-លោកស្រីទេព វ៉ានីដា ៥ដុល្លារ ៣-លោកស្រីតាំង ស្រីពៅ ៥ដុល្លារ ៤-លោក ស្រីសួន ជុឡា ២០.០០០រៀល ៥-លោកស្រី អ៊ុង ទេពភិរុណ ១០.០០០រៀល ៦-លោក ស្រីហូរ បំពេញ ១០.០០០រៀល ៧-កញា សុខ លីនណា ១០.០០០រៀល ៨-លោកស្រី ហាស់ សុខុន ៥.០០០រៀល ៩-កញាព្រាប សាវិន ៥.០០០រៀល និង១០-លោកសេង គីលក់ទាខ្វៃនៅច្បារអំពៅ១ ផ្ទះលេខ៤០Eo ផ្លូវជាតិលេខ១ ខណ្ឌមានជ័យ រាជធានីភ្នំពេញឧបត្ថម្ភប្រាក់ចំនួន២០.០០០រៀល ។
សូមរំលឹកថា ប្ដីចិត្ដទុរយសឈ្មោះអ៊ុន សៅមាន ហៅណាងបានវាយប្រពន្ធសរសៃខ្ចី ទើបឆ្លងទន្លេបានជាង១០ថ្ងៃបណ្ដាលឱ្យស្លាប់កាលពីថ្ងៃទី២ មករា រួចប្ដីរូបនោះបានគេចខ្លួនបាត់បន្សល់ទុកទារិកាទើបកើតបានជាង១០ថ្ងៃឱ្យជីដូនចិញ្ចឹមយ៉ាងវេទនា។ ក្រោយពីបានទទួលអំណាយជាលើកទី២ ស្ដ្រីឈ្មោះហេង ស្រីនិច្ច ដែលត្រូវជាម្ដាយមីង មានសេចក្ដីត្រេកអរថ្មីទៀត និងបានបួងសួង ដល់វត្ថុស័ក្ដិសិទ្ធិក្នុងលោកជួយថែរក្សាដល់ សប្បុរសជនទាំងអស់ សូមជួបតែសេចក្ដីសុខ សេចក្ដីចំរើនរកស៊ីមានបានកុំបីឃ្លៀងឃ្លាតឡើយ ៕
ចែករំលែកព័តមាននេះ