ការឈ្វេងយល់នូវវិធីសាស្ត្រ ក្នុងការលក់ ឬឃោសនាលក់ផ្ទះ និងខុនដូ ក៏គ្រប់គ្រាន់ហើយដែរ ប៉ុន្តែរឿងមួយទៀតដែលមានសារសំខាន់មិនចាញ់គ្នានោះ គឺការនាំគេចូលមើលផ្ទះ ឬខុនដូរបស់ខ្លួន ។ មនុស្សជាច្រើនអាចនឹងគិតថាងាយៗ ដោយគ្រាន់តែពន្យល់៣-៤ប្រយោគក៏ចប់ ។ ពិតហើយ ការធ្វើបែបនោះអាចធ្វើបាន ប៉ុន្តែអ្នកដែលមានអាជីព នឹងធ្វើច្រើនជាងនេះទៀត ដូចជា ៖
១-មិនអនុញ្ញាតឱ្យចូលមើល ខណៈមិនទាន់ត្រៀមខ្លួន ៖
ការមិនអនុញ្ញាតនេះ គឺសម្រាប់មានពេលវេលាក្នុងការត្រៀមខ្លួន និងទីកន្លែង ។ ការមកមើលផ្ទះយ៉ាងទាន់ហន់ធ្វើឱ្យគ្រប់យ៉ាងដំណើរការទៅមិនបានល្អ ។ អ្នកអាចណាត់គ្នាបានទៀត ដោយសុំលេខទូរស័ព្ទទាក់ទង ឬយល់ព្រមមើលនៅពេលក្រោយ ។
២-ចាំឈ្មោះអ្នកទិញ ៖
ត្រូវចាំឈ្មោះរបស់អ្នកទិញឱ្យបាន បើសិនជាចាំមិនបាន ក៏ត្រូវកត់ត្រាទុកដែរ ។ បើតាមបែបចិត្តវិទ្យាថា យើងនឹងមានអារម្មណ៍ថា ខ្លួនឯងសំខាន់ជាមួយភាគីម្ខាងទៀត នៅពេលត្រូវបានគេហៅឈ្មោះក្នុងពេលសន្ទនាពីមនុស្សដែលទើបនឹងស្គាល់គ្នា និងចាត់ទុកថា ជាការទាក់ទាញអារម្មណ៍ដំបូងផងដែរ ។
៣-ការបង្ហាញផ្ទះ ៖
ម្ចាស់ផ្ទះគួរជាអ្នកបើកទ្វារផ្ទះ និងបន្ទប់ ប៉ុន្តែឱ្យអ្នកទិញដើរនាំមុខផ្លូវមុន ដែលនឹងធ្វើឱ្យពួកគេមានភាពរីករាយក្នុងការចូលមើលផ្ទះរបស់អ្នកយ៉ាងពេញចិត្ត ។
៤-ការចូលមើលផ្ទះ ៖
ខណៈដែលនាំគេមកមើលផ្ទះ ឬបន្ទប់ គួរតែឈរឆ្ងាយល្មមរវាងអ្នក និងគេ ប្រសិនបើឈរជិតគ្នាពេក នឹងធ្វើឱ្យពួកគេមានអារម្មណ៍លំបាកចិត្ត ដោយត្រូវរំខានភាពផ្ទាល់ខ្លួន។ អ្នកគួរតែផ្តល់ពេលវេលាឱ្យអ្នកទិញដើរមើលផ្ទះដោយខ្លួនឯង ។
៥-ពន្លឺ ពណ៌ និងសំឡេង មានព្រមគ្នា ៖
ទាំង៣យ៉ាងនេះអាចជួយជំរុញការប្រាស្រ័យទាក់ទងរបស់មនុស្សបានយ៉ាងល្អ ដូច្នេះ គួរតែបើកភ្លើងដើម្បីបន្ថែមពន្លឺដល់បន្ទប់ និងបើកភ្លេងតិចៗដើម្បីធ្វើឱ្យបរិយាកាសមិនស្ងប់ស្ងាត់ពេក ប៉ុន្តែមិនចាំបាច់តុបតែងបែបវេទិកាតន្ត្រីនោះទេ ។
៦-មិនឱ្យអតិថិជនសួរតែម្យ៉ាង ៖
ការដែលអ្នកបើកឱកាសឱ្យអតិថិជនសួរតែម្យ៉ាង ក៏ព្រោះតែអ្នកចង់ឱ្យពួកគេទទួលបានព័ត៌មានពេញលេញ ប៉ុន្តែភ្លេចមែនទេថា មិនមែនជាការបង្រៀនដើម្បីយកទៅប្រឡងនោះទេ ។
ដូច្នេះ អ្នកអាចសួរពួកគេត្រឡប់ទៅវិញខ្លះដូចជា ទិញលំនៅឋានទុករស់នៅខ្លួនឯងឬទៅមើលកន្លែងផ្សេងខ្លះហើយឬនៅ, យ៉ាងម៉េចទៅហើយការចូលមើលផ្ទះ និងហេតុអ្វីបានជាចាប់អារម្មណ៍នៅទីនេះ… ដែលនឹងធ្វើឱ្យការសន្ទនានោះកាន់តែរីករាយឡើងជាដើម ។ ជឿឬទេថា ការជជែកគ្នានេះ ក៏អាចជាហេតុផលមួយទៀតដែលអតិថិជនអាចសម្រេចចិត្តទិញផ្ទះរបស់អ្នកផងដែរ ។
៧-ផ្តល់ឱកាសដល់អ្នកទិញឱ្យមានយោបល់ ៖
បន្ទាប់ពីមើលផ្ទះរៀបរយហើយ ក្រៅពីអ្នកទិញគិតថា គំនិតរបស់ខ្លួនមានសារសំខាន់ហើយ អ្នកអាចស្តាប់យោបល់ពីពួកគេ បន្ទាប់មកទទួលយកយោបល់ទាំងនោះមកកែតម្រូវក្នុងការចូលមើលផ្ទះនៅពេលក្រោយៗទៀត ៕
ចែករំលែកព័តមាននេះ