រាជធានីភ្នំពេញ ៖ អ្នកនាំពាក្យទីស្តីការគណៈរដ្ឋមន្ត្រី លោករដ្ឋលេខាធិការ ផៃ ស៊ីផាន បានអះអាងថា គណបក្សប្រជាជនកម្ពុជាគ្មានបំណង ឬប្រាថ្នារំលាយគណបក្សសង្គ្រោះជាតិ(CNRP)ដូចការលើកឡើងរបស់ក្រុមបរទេសខ្លះ និងបក្សពួកដែលមាននិន្នាការប្រឆាំងនឹងគណបក្សកាន់អំណាចនោះទេ ។
លោក ផៃ ស៊ីផាន បានបញ្ជាក់តាមគេហទំព័រគណបក្សប្រជាជនកម្ពុជា(CPP)ថា «CNRPក្រៅពីបុគ្គលប្រព្រឹត្តបទល្មើសនឹងច្បាប់ ក៏ដូចជាប៉ះពាល់នឹងសីលធម៌ គឺគណបក្សនេះ មានធនធានមនុស្ស និងសមត្ថភាពគ្រប់គ្រាន់ក្នុងការប្រជែង។ នេះជាឱកាសសម្រាប់CNRPក្នុងការអនុវត្តប្រជាធិបតេយ្យផ្ទៃក្នុងរបស់ខ្លួន ក៏ដូចជាឱកាសសម្រាប់យុវជនជំនាន់ក្រោយនៅក្នុងបក្សបន្តវេន» ។
ការលើកឡើងនេះរបស់លោក ផៃ ស៊ីផាន គឺបន្ទាប់ពីមានមតិមួយចំនួនលើកឡើងថា គណបក្សកាន់អំណាចកំពុងតែធ្វើនយោបាយដើម្បីចង់រំលាយគណបក្សប្រឆាំងនៅក្នុងប្រទេសកម្ពុជា។ ជាក់ស្តែង សមាជិកគណៈកម្មាធិការជាតិរៀបចំការបោះឆ្នោត(គ.ជ.ប)មួយរូបគឺ លោក រ៉ុង ឈុន កាលពីពេលថ្មីៗនេះបានប្រកាសថានឹងលាឈប់ពីតួនាទីក្នុង គ.ជ.ប ប្រសិនបើគណបក្សសង្គ្រោះជាតិត្រូវរំលាយ ។
ទោះជាយ៉ាងណាក្តី អ្នកនាំពាក្យគណបក្សប្រជាជនកម្ពុជា លោក សុខ ឥសាន បានហៅការលើកឡើងនេះថាជាការ កុំបៀមឈាមព្រួសដាក់គេ ។
លោក សុខ ឥសាន ថ្លែងថា ច្បាប់ស្តីពីគណបក្សនយោបាយកំពុងត្រូវបានក្រុមអ្នកច្បាប់សិក្សានិងពិនិត្យធ្វើវិសោធនកម្ម ដើម្បីឲ្យស្របតាមសភាពការណ៍ថ្មីនៃជីវភាពនយោបាយ សេដ្ឋកិច្ច សង្គម កម្ពុជាបច្ចុប្បន្ន ។
លោកបញ្ជាក់ថា «ខណៈដែលច្បាប់នេះកំពុងត្រូវបានពិនិត្យ ស្រាប់តែមានឥស្សរជនម្នាក់នៅក្នុង គ.ជ.ប ប្រកាសថា គាត់នឹងលាឈប់ពីតំណែងដោយមិនស្តាយស្រណោះ បើសិនជាគណបក្សសង្គ្រោះជាតិត្រូវបានរំលាយដោយគណបក្សប្រជាជនកម្ពុជានោះ ។ លោកបានបន្លុយថា គួរឲ្យសោកស្តាយណាស់ចំពោះពាក្យសម្តីដែលខ្វះការយល់ដឹង ដែលមិនទាន់អីផង ចោទប្រកាន់មកលើគណបក្សប្រជាជនកម្ពុជាទៅហើយថា ជាអ្នករំលាយគណបក្សផ្សេងទៅវិញ» ។
លោក សុខ ឥសាន ថ្លែងថា តាមការពិតគណបក្សប្រជាជនកម្ពុជាមិនមានសិទ្ធិរំលាយគណបក្សណាទេ ។ បើសិនជាលោកអសមត្ថភាពធ្វើការមិនកើត លោកមានសិទ្ធិលាឈប់ពីការងារដោយផ្ទាល់ខ្លួន មិនចាំបាច់ឆ្លៀតដាក់កំហុសលើអ្នកដទៃធ្វើអី ? សូមចាំថា មានតែច្បាប់ទេដែលមានសិទ្ធិរំលាយគណបក្សនយោបាយ បើសិនជាគណបក្សនោះប្រព្រឹត្តល្មើសច្បាប់ ឬរំលាភច្បាប់ ជាពិសេសនៅពេលច្បាប់នោះត្រូវបានស្ថាប័ននីតិប្បញ្ញត្តិអនុម័តរួច ហើយមានព្រះរាជក្រមប្រកាសឲ្យប្រើជាផ្លូវការ ។
លោក កឹម សុខា ប្រធានស្តីទីគណបក្សសង្គ្រោះជាតិ កាលពីពេលថ្មីៗនេះ ក៏បានថ្លែងទៅកាន់អ្នកគាំទ្រថាត្រូវ«ចែកគ្នារស់ មិនត្រូវដណ្ដើមគ្នារស់» ដែលន័យពាក្យប៉ុន្មានឃ្លានេះ បង្ហាញថា រស់តែឯងក៏មិនល្អគួរចែកគ្នារស់ផង ។
លោកបញ្ជាក់ថា «ខ្ញុំសូមបញ្ជាក់ជូនថ្នាក់ដឹកនាំគណបក្សសង្គ្រោះជាតិជ្រាបថា ទស្សនៈនយោបាយរបស់យើងមិនមែនគ្រាន់តែធ្វើឲ្យសុខដុមរមនាក្រុមណាមួយ បក្សណាមួយនោះទេ គឺយើងចង់ឲ្យមានសុខដុមនីយកម្មជាតិខ្មែរទាំងមូល ។ មានន័យថា ជាទស្សនៈចែករំលែក បើកចិត្តឲ្យទូលាយ ដើម្បីឲ្យខ្មែរអាចរស់នៅដោយសុខសន្ដិភាព និងការរីកចម្រើនទាំងអស់គ្នា មិនមែនសុខសប្បាយតែក្រុមមួយ បក្សមួយ ហើយធ្វើឲ្យក្រុមផ្សេង បក្សផ្សេង មានការឈឺចាប់រងទុក្ខវេទនានោះទេ» ។
កិច្ចប្រជុំសភាជាវិសាមញ្ញដើម្បីពិភាក្សាលើវិសោធនកម្មច្បាប់ស្តីពីគណបក្សនយោបាយ ត្រូវបានគេរំពឹងថា អាចធ្វើឡើងនៅចុងខែកុម្ភៈនេះ ឬយូរបំផុតដើមខែមីនា ។ លោក សុខ ឥសាន បានថ្លែងប្រាប់អ្នកកាសែតថា ក្រុមការងារច្បាប់របស់គណបក្សបានបញ្ចប់រួចរាល់ហើយ នូវការរៀបចំសេចក្តីព្រាងវិសោធនកម្មច្បាប់ស្តីពីគណបក្សនយោបាយដែលមាន១១ជំពូក និង៥០មាត្រា ។
អគ្គលេខាធិការរដ្ឋសភា លោក ឡេង ប៉េងឡុង បានប្រាប់វិទ្យុបារាំងអន្តរជាតិកាលពីថ្ងៃទី១០ ខែកុម្ភៈ ថា លោកបានទទួលរួចហើយនូវលិខិតដែលមានចុះហត្ថលេខាអ្នកតំណាងរាស្ត្រចំនួន៦០រូបមកពីគណបក្សប្រជាជនកម្ពុជា ស្នើសុំទៅប្រធានរដ្ឋសភា សម្តេចពញាចក្រីហេង សំរិន កោះប្រជុំគណៈអចិន្ត្រៃយ៍ ដើម្បីឈានទៅបើកកិច្ចប្រជុំរដ្ឋសភាជាវិសាមញ្ញក្នុងពេលឆាប់ៗខាងមុខនេះ។ លោក ឡេង ប៉េងឡុង បញ្ជាក់ថា លិខិតនេះនឹងផ្ញើជូនសម្តេចពញាចក្រី ហេង សំរិន នៅល្ងាចថ្ងៃសុក្រទី១០ ខែកុម្ភៈ ដោយហេតុថាជាការប្រញាប់ ។
ស្របពេលជាមួយគ្នានេះ មន្ត្រីជាន់ខ្ពស់និងជាតំណាងរាស្ត្រគណបក្សប្រជាជនកម្ពុជា លោក ជាម យៀប បានថ្លែងដែរថា សេចក្តីព្រាងវិសោធនកម្មច្បាប់ស្តីពីគណបក្សនយោបាយត្រូវបានបញ្ចប់កាលពីថ្ងៃទី៩ ខែកុម្ភៈ បន្ទាប់ពីមានការពិភាក្សាបន្ទាន់រវាងក្រុមអ្នកច្បាប់មកពីក្រសួង ស្ថាប័នមានសមត្ថកិច្ច និងរដ្ឋសភាជាតិ ។
លោក ជាម យៀប បញ្ជាក់ថា ក្រុមការងារអ្នកច្បាប់បានរក្សាទុកច្បាប់ស្តីពីគណបក្សនយោបាយនេះចំនួន១១ជំពូកដដែល តែបានបន្ថែមថ្មី ៥មាត្រាទៀត ធ្វើឲ្យច្បាប់នេះកើនរហូតដល់៥០មាត្រា ។ ក្នុងនោះមាត្រាសំខាន់ៗចំនួន២៣ ត្រូវបានត្រៀមឡើងសម្រាប់ធ្វើវិសោធនកម្មនៅថ្ងៃខាងមុខ ។
អ្វីដែលជាការកត់សម្គាល់នោះ គឺតំណាងរាស្ត្រខាងគណបក្សកាន់អំណាចរូបនេះបញ្ជាក់ថា មាត្រាមួយចំនួនដែលកំណត់ពីលក្ខខណ្ឌ លក្ខណ សម្បត្តិរបស់បេក្ខជនគឺជាភាពចាំបាច់ ដោយមានការបញ្ជាក់ពីក្រសួងយុត្តិធម៌នូវលិខិតថ្កោលទោស ជាពិសេសសំដៅទៅលើជួរថ្នាក់ដឹកនាំ ប្រធាននិងអនុប្រធានគណបក្សនយោបាយ។
ការគ្រោងធ្វើវិសោធនកម្មច្បាប់ស្តីពីគណបក្សនយោបាយនេះ បានធ្វើឡើងបន្ទាប់ពីមានការផ្តួចផ្តើមកាលពីពេលថ្មីៗនេះរបស់សម្តេចតេជោនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា ដែលលើកឡើងថា អ្នកមានទោសនឹងមិនអាចធ្វើជាប្រធាន -អនុប្រធានគណបក្សនយោបាយបានទេ ហើយបើទោសធ្ងន់ធ្ងរ នឹងអាចរំលាយគណបក្សថែមទៀតផង ។ ដូចគ្នានេះដែរ មន្ត្រីនានារបស់គណបក្សកាន់អំណាច ក៏បានបង្ហាញនូវទឡ្ហីករណ៍ដែរថា ច្បាប់ស្តីពីគណបក្សនយោបាយនេះ មិនត្រូវបានកែប្រែឲ្យសមស្របទៅតាមបរិបទនយោបាយ និងការវិវឌ្ឍរបស់សង្គមម្តងណាឡើយ ចាប់តាំងពីច្បាប់នេះដាក់ឲ្យអនុវត្តប្រមាណជា២០ឆ្នាំមកហើយ ៕
ចែករំលែកព័តមាននេះ