រាជធានីភ្នំពេញ ៖ សេចក្តីរាយការណ៍បានឱ្យដឹងថា នាព្រឹកថ្ងៃទី១១ កុម្ភៈ នេះ កម្លាំងគណៈបញ្ជាការឯកភាពខណ្ឌសែនសុខ សហការជាមួយកម្លាំងប៉េអឹម ខណ្ឌ ក្រុង និងអាជ្ញាធរមូលដ្ឋានពាក់ព័ន្ធជាច្រើនរូប បានចុះទៅរុះរើសំណង់អនាធិបតេយ្យត្រពាំងឈូក ដែលជាតំបន់មួយសំបូរទៅដោយបទល្មើសជាច្រើន ។
ក្នុងការចុះរុះរើសំណង់ទាំងនេះ គឺកម្លាំងបានជូនដំណឹងដល់ម្ចាស់ផ្ទះ និងម្ចាស់បន្ទប់រួចមកហើយ ដែលមានផ្ទះចំនួន៥៤ ដែលរកឃើញថា ជាទីតាំងផ្តល់កន្លែងប្រើប្រាស់ និងជួញដូរគ្រឿងញៀន ហើយត្រូវអាជ្ញាធរធ្វើការរុះរើចេញយ៉ាងបន្ទាន់តែម្តង ។
គួរបញ្ជាក់ថា តំបន់ត្រពាំងឈូក គឺជាតំបន់មួយដ៏ស្មុគស្មាញ និងរ៉ាំរ៉ៃបំផុត ដែលក្រុមជនសង្គមងងឹត តែងតែប្រមូលផ្តុំ និងលាក់ខ្លួននៅទីនោះ ដើម្បីធ្វើសកម្មភាពផ្សេងៗដែលផ្ទុយពីច្បាប់ ។ កន្លងមក តំបន់ឈូក ត្រូវបានកម្លាំងចុះបង្ក្រាបជាញឹកញាប់ តែដូចវែកចកនៅមានកើតមានដដែល ។
ដោយមានការណែនាំពីសម្តេចក្រឡាហោម ស ខេង ក្នុងការបោសសម្អាតគ្រឿងញៀននោះ ទើបកម្លាំងរួមដៃគ្នា ធ្វើការបង្ក្រាបក្នុងតំបន់នោះ ជាលក្ខណៈទ្រង់ទ្រាយធំតែម្តង ។
ចែករំលែកព័តមាននេះ