កន្លង់ក្រេបលម្អងផ្ការុះរោយហើយហើរចោល
រាជធានីភ្នំពេញ ៖ ស្ត្រីវ័យក្មេងម្នាក់បានធ្វើដំណើរទៅកាន់ប៉ុស្ដិ៍នគរបាលចោមចៅ ដាក់ពាក្យបណ្ដឹងសុំអន្តរាគមន៍ពីកម្លាំងនគរបាលនៅទីនោះ កាលពីវេលាម៉ោង
រាជធានីភ្នំពេញ ៖ ស្ត្រីវ័យក្មេងម្នាក់បានធ្វើដំណើរទៅកាន់ប៉ុស្ដិ៍នគរបាលចោមចៅ ដាក់ពាក្យបណ្ដឹងសុំអន្តរាគមន៍ពីកម្លាំងនគរបាលនៅទីនោះ កាលពីវេលាម៉ោង៦ និង៣០នាទី ល្ងាចថ្ងៃទី៩ កុម្ភៈ ដោយនាងយំស្រែកលែងអៀនខ្មាស និងគួរឱ្យអាណិតផងដែរ ដោយបានរៀបរាប់ប្រាប់នគរបាលថា នាងបានចាញ់បោកបុរសម្នាក់ដែលជានិស្សិតពេទ្យនៅសាលាវេជ្ជសាស្ត្រ សុខាភិបាលកងយោធពលខេមរភូមិន្ទ ដោយប្រគល់ខ្លួនប្រាណឱ្យគាត់រហូតមានផ្ទៃពោះ៥ខែទៅហើយ ។
នាងប្តឹងថា ពេលនេះត្រូវបានប្រុសព្រាននោះ ដោះដៃចោលនាងទៅ ទាក់ទងស្នេហាជាមួយមិត្តស្រីរបស់នាងម្នាក់ទៀត ហើយនាងក៏ចង់សុំការអន្តរាគមន៍ពីសំណាក់ លោកនាយកសាលាវេជ្ជសាស្ត្រសុខាភិបាល កងយោធពលខេមរភូមិន្ទផងដែរ ។
នារីខកស្នេហ៍បង់ប្រាណខាងលើឈ្មោះតោង ស្រីនិច អាយុ២០ឆ្នាំ ស្នាក់នៅផ្ទះជួលក្នុងបុរីប៊ុនហួរ ស្ថិតនៅក្នុងភូមិព្រៃព្រីងខាងជើង សង្កាត់ចោមចៅ ។ ចំណែកឯនិស្សិតពេទ្យដែលនាងចាត់ទុកថាជាប្រុសព្រានឈ្មោះ ស៊ុម សុធារ៉ា អាយុ៣៧ឆ្នាំជានិស្សិតពេទ្យយោធានៅសាលាវេជ្ជសាស្ត្រសុខាភិបាលកងយោធពលខេមរភូមិន្ទ ។ ជននេះមានប្រពន្ធ និងកូនរួចទៅហើយនៅឯខេត្តពោធិ៍សាត់ និងបានបោកយកខ្លួនប្រាណនាងទៀត ។
នាងបាននិយាយប្រាប់នគរបាល ទាំងសោកសង្រេងថា នាងនិងឈ្មោះ ស៊ុម សុធារ៉ា បានមានទំនាក់ទំនងស្នេហាជាមួយគ្នាកាលពីអំឡុងឆ្នាំ២០១៥ ។ កាលណោះបុរសនេះបានបោកបញ្ឆោតកុហកនាងថា ខ្លួនគេអត់ទាន់មានប្រពន្ធមានកូននោះទេ ។ មិនតែប៉ុណ្ណោះបានលួងលោមនាងថានឹងយកនាងធ្វើជាប្រពន្ធរស់នៅជាមួយគ្នាអស់មួយជីវិតរហូតដល់ចាស់សក់ស្កូវ ។
ពាក្យលួងលោមយ៉ាងផ្អែមល្ហែម ការសន្យា និងការអះអាងថា គ្មានប្រពន្ធនិងកូនទាំងអស់នេះហើយ ដែលបានធ្វើឱ្យនាងទន់ចិត្តរហូតយល់ព្រមប្រគល់ខ្លួនប្រាណ ជូនលោកប្រុសព្រាននោះរហូតក្បត់មេបារំលងប្រពៃណី ដោយគ្មានការសោកស្ដាយសូម្បីតែបន្តិចណាឡើយ ។
នាងនិយាយថាជាងនេះទៀតនោះ ក៏បានរស់នៅក្រោមដំបូលផ្ទះជួលតែមួយជាមួយគ្នាជាប្ដីប្រពន្ធរហូតមក ដែល គិតមកដល់ពេលនេះមានរយៈពេល១ឆ្នាំកន្លះហើយ ។ ស្ត្រីរូបនេះបានបន្តថា ការរស់នៅជាមួយគ្នាមួយរយៈពេលនេះ នាងមិនដែលគិតថាប្រុសកំពូលស្នេហ៍ គឺជាប្រុសព្រានម្ដងណានោះទេ នាងរស់នៅដោយការពេញចិត្តពេញថ្លើមជាមួយនឹងបុរសនោះ ហើយក៏តែងតែមានក្តីសង្ឃឹមថានឹងទទួលបានសុភមង្គលជារៀងរហូតទៀតផង ប៉ុន្តែផ្ទុយទៅវិញការគិតទាំងប៉ុន្មានគឺខុសស្រឡះដែលធ្វើឱ្យជីវិតរបស់នាងមិនខុសពីផ្ការុះរោយនោះឡើយ ។
ក្រោយពេលនាងអស់ព្រហ្មចារីរហូតមានផ្ទៃពោះ៥ខែ ស្រាប់តែបែកធ្លាយថាប្រុសព្រាននោះមានប្រពន្ធថែមទាំងកូនរួចទៅហើយ ។ មិនតែប៉ុណ្ណោះគេបានព្យាយាមដោះដៃចេញពីនាង មិនទទួលស្គាល់កូននៅក្នុងផ្ទៃ និងបានទៅទាក់ទងស្នេហាជាមួយនិងស្ត្រីម្នាក់ទៀតដែលជាមិត្តភក្ដិរបស់នាងថែមទៀត ។ មួយថ្ងៃៗគិតតែព្យាយាម គេចវេសចេញពីនាងរហូត ទោះបីជានាងអង្វរសុំក្ដីមេត្តាយ៉ាងណា ក៏ប្រុសព្រាននោះមិនមេត្តាដល់រូបនាងដែរ ។ នាងរៀបរាប់ទៀតថាទីបំផុតនាងសុំតែ២០០ដុល្លារប៉ុណ្ណោះ ដើម្បីនាងយកទៅពិនិត្យសុខភាពហើយបញ្ចប់រឿងចង់ទៅណាក៏ទៅចុះ ដោយនាងគិតថា ធ្វើម៉េចនេះគឺជាកម្មរបស់នាង ដែលជួបប្រុសម្នាក់ជាមនុស្សតែមានចិត្តជាតិរច្ឆាន ប៉ុន្តែជនកំហូចនោះមិនត្រឹមតែមិនព្រមឱ្យនោះទេ ថែមទាំងគេចខ្លួនទៅកាន់ខេត្តពោធិ៍សាត់បាត់ទៀត ។
នាងរៀបរាប់បន្តថា មិនតែប៉ុណ្ណោះនាងត្រូវបានម្ដាយបោះបង់ចោល ព្រោះខឹងនឹងនាងភ្លើតភ្លើនរំលងប្រពៃណី ។ ចំណែកប្រុសព្រានបាន និយាយថា នាងមិនហ៊ានប្ដឹងគាត់ទេ ព្រោះនាងគ្មានលុយ ហើយម្ដាយបោះបង់ចោលទៀត គ្មានខ្នងបង្អែកទើបដោះដៃចោលនាង ថែមទាំងមិនឱ្យលុយ២០០ដុល្លារ ដែលនាងទាមទារនោះ ក៏មិនអាចប្តឹងគេបានដែរ ។ ដោយសារតែបែបនេះ នាងបានសម្រេចិត្តធ្វើដំណើរទៅកាន់ប៉ុស្ដិ៍នគរបាលចោមចៅ ដាក់ពាក្យបណ្ដឹងដើម្បីស្វែងរកអន្តរាគមន៍ ។
ទោះបីជាបែបណា នគរបាលមិនបានទទួលពាក្យបណ្ដឹងនេះទេ ដោយបានជំរុញឱ្យនាងទៅប្ដឹងខាងមន្ត្រីសាលាសង្កាត់ចោមចៅវិញ ដោយនគរបាលនិយាយថា នេះគឺជារឿងរដ្ឋប្បវេណី មិនមែនជារឿងព្រហ្មទណ្ឌនោះឡើយ បើជារឿងព្រហ្មទណ្ឌទើបប្ដឹងនៅខាងនគរបាល។ ប៉ុន្តែទន្ទឹមនឹងនេះដែរ ក៏មានមតិខ្លះបានលើកឡើងថាការបោកបញ្ឆោតយកខ្លួនប្រាណ បែបនេះក៏ចាត់ទុកថាបទល្មើសមួយដែរ និងជាបទល្មើសព្រហ្មទណ្ឌ ហើយរំលោភលើទំនុកចិត្ត ដូច្នេះនគរបាលគួរតែទទួលពាក្យបណ្ដឹង ចាត់ការតាមច្បាប់ មិនគួររុញទៅនេះទៅនោះបែបនឹងនោះទេ ។
ពួកគេនិយាយទៀតថាការធ្វើបែបនេះតើឱ្យនារីរងគ្រោះម្នាក់នេះទៅសង្ឃឹមអ្នកណាទៀតបើប៉ូលិសអន់ម្លឹងៗ ហើយជនដែលប្រព្រឹត្តអាក្រក់ ធ្វើបាបនាង និងបានរួចខ្លួនយ៉ាងរំភើយ ៕
ចែករំលែកព័តមាននេះ