លែងអៀនខ្មាស ! ស្រែកយំគួរឲ្យអាណិតបំផុត
រាជធានីភ្នំពេញ ៖ នារីវ័យក្មេងម្នាក់បានធ្វើដំណើរទៅកាន់ប៉ុស្ដិ៍នគរបាលចោមចៅ ហើយយំស្រែកលែងអៀនខ្មាស និងគួរឲ្យអាណិតបំផុត កាលពីវេលាម៉ោង៦និង៣០នាទី …
រាជធានីភ្នំពេញ ៖ នារីវ័យក្មេងម្នាក់បានធ្វើដំណើរទៅកាន់ប៉ុស្ដិ៍នគរបាលចោមចៅ ហើយយំស្រែកលែងអៀនខ្មាស និងគួរឲ្យអាណិតបំផុត កាលពីវេលាម៉ោង៦និង៣០នាទីព្រលប់ ថ្ងៃទី០៩ ខែកុម្ភៈ ឆ្នាំ២០១៧ និងបានរៀបរាប់ប្រាប់នគរបាលថា នាងបាន ចាញ់បោកបុរសម្នាក់ដែលជានិស្សិតពេទ្យនៅសាលាវិជ្ជសាស្ត្រសុខាភិបាល កងយោធពលខេមរភូមិន្ទ រហូតប្រគល់ខ្លួនប្រាណ និងមានផ្ទៃពោះ៥ខែទៅហើយ ពេលនេះត្រូវបានប្រុសព្រាននោះ ដោះដៃចោលនាងទៅទាក់ទងស្នេហាជាមួយមិត្តស្រីរបស់នាងម្នាក់ទៀត ។
នារីវ័យក្មេងខាងលើអាយុ២០ឆ្នាំ ស្នាក់នៅផ្ទះជួលក្នុងបុរី ប៊ុន ហួរ ស្ថិតនៅក្នុងភូមិព្រៃព្រីងខាងជើង សង្កាត់ចោមចៅ ចំណែកឯប្រុសព្រានត្រូវបាននាងអះអាងថា ឈ្មោះ ស៊ុម សុធារ៉ា អាយុ៣៧ឆ្នាំ ជានិស្សិតពេទ្យយោធា នៅសាលាវិជ្ជសាស្ត្រសុខាភិបាល កងយោធពលខេមរភូមិន្ទ ។ ជននេះមានប្រពន្ធ និងកូនរួចទៅហើយនៅឯខេត្តពោធិ៍សាត់ និងបានបោកយកខ្លួនប្រាណនាងទៀត ។
នាងបាននិយាយប្រាប់នគរបាលទាំងយំស្រែកថា នាង និងបុរសឈ្មោះ ស៊ុម សុធារ៉ានេះ មានទំនាក់ទំនងស្នេហាជាមួយគ្នា កាលពីអំឡុងឆ្នាំ២០០៥ ដែលកាលណោះបុរសនេះ បានបោកបញ្ឆោតកុហកនាងថា ខ្លួនគេអត់ទាន់មានប្រពន្ធកូននោះទេ មិនតែប៉ុណ្ណោះបានលួងលោមនាងថា នឹងយកនាងធ្វើជាប្រពន្ធរស់នៅជាមួយគ្នាអស់មួយជីវិតរហូតដល់ចាស់សក់ស្កូវ ។ ពាក្យលួងលោមយ៉ាងផ្អែមល្ហែម ការសន្យា និងការអះអាងថា គ្មានប្រពន្ធ និងកូនទាំងអស់នេះហើយដែលបានធ្វើឲ្យនាងទន់ចិត្ត រហូតយល់ព្រមប្រគល់ខ្លួនប្រាណជូនប្រុសកំពូលព្រាននោះ ក្បត់មេបាររំលងប្រពៃណី ដោយគ្មានការសោកស្ដាយ សូម្បីតែបន្តិច ណាឡើយ ជាងនេះទៀតនោះ ក៏បានរស់នៅក្រោមដំបូលផ្ទះជួលតែមួយជាមួយគ្នាដូចជាប្ដីប្រពន្ធរហូតមកដល់ពេលនេះ គឺមានរយៈពេល១ឆ្នាំកន្លះហើយ ។
ស្ត្រីរូបនេះបានបន្តថា ការរស់នៅជាមួយគ្នាមួយរយៈពេលនេះ នាងមិនដែលគិតថា ប្រុសកំពូលស្នេហ៍ គឺជាប្រុសព្រានម្ដងណានោះទេ នាងរស់នៅដោយការពេញចិត្តពេញថ្លើមជាមួយនឹងបុរសនោះ ហើយក៏តែងតែមានសង្ឃឹមថា នឹងទទួលបានសុភមង្គលជារៀងរហូតទៀតផង ប៉ុន្តែផ្ទុយទៅវិញការគិតទាំងប៉ុន្មាន គឺខុសស្រឡះ ដែលជីវិតរបស់នាងមិនខុសពីផ្ការុះរោយនោះឡើយ។ ក្រោយពេលនាងអស់ព្រហ្មចារីយ៍ រហូតមានផ្ទៃពោះ៥ខែ ស្រាប់តែបែកធ្លាយថា ប្រុសព្រាននោះមានប្រពន្ធ ហើយថែមទាំងកូនរួចទៅហើយ មិនតែប៉ុណ្ណោះគេបានព្យាយាមដោះដៃចេញពីនាង ហើយមិនទទួលស្គាល់កូននៅក្នុងផ្ទៃឡើយ និងបានទៅទាក់ទងស្នេហាជាមួយនឹងស្ត្រីម្នាក់ទៀត ដែលត្រូវជាមិត្តភក្ដិរបស់នាងថែមទៀត។ មួយថ្ងៃៗគិតតែព្យាយាមគេចវេសចេញពីនាងរហូត ទោះបីជានាងអង្វរសុំក្ដីមេត្តាយ៉ាងណា ក៏ប្រុសកំពូលព្រាននោះមិនមេត្តាដល់រូបនាងដែរ ទីបំផុតនាងសុំត្រឹមតែ២០០ដុល្លារប៉ុណ្ណោះ ដើម្បីនាងយកទៅពិនិត្យសុខភាព ហើយបញ្ចប់រឿងនេះ ចង់ទៅណាក៏ទៅចុះ ដោយនាងគិតថា ធ្វើម៉េច ! នេះគឺជាកម្មពាររបស់នាង ដែលជួបប្រុសម្នាក់ជាមនុស្ស តែមានចិត្តជាសត្វតិរច្ឆានបែបនេះ ប៉ុន្តែជនកំហូចនោះមិនត្រឹមតែមិនព្រមឲ្យនោះទេ ថែមទាំងគេចខ្លួនទៅកាន់ខេត្តពោធិ៍សាត់បាត់ទៀតផង ។ មិនតែប៉ុណ្ណោះនាងត្រូវបានម្ដាយបោះបង់ចោល ព្រោះខឹងភ្លើតភ្លើនរំលងប្រពៃណី ចំណែកឯប្រុសព្រាននោះថែមទាំងនិយាយបញ្ឈឺនាងទៀតថា នាងមិនហ៊ានប្ដឹងគាត់ទេ ព្រោះនាងគ្មានលុយ ហើយថែមទាំងម្ដាយបោះបង់ចោលទៀត ដូច្នេះគ្មានខ្នងបង្អែកណាដែលអាចប្ដឹងគេបានទេ ទើបដោះដៃចោលនាងថែមទាំងមិនឲ្យលុយ២០០ដុល្លារដែលនាងទាមទារនោះទៀត ។
ដោយសារតែបែបនេះ នាងបានសម្រេចិត្តធ្វើដំណើរទៅកាន់ប៉ុស្ដិ៍នគរបាលចោមចៅ ដើម្បីដាក់ពាក្យបណ្ដឹង និងស្វែងរកអន្តរាគមន៍ ប៉ុន្តែនគរបាលមិនបានទទួលពាក្យបណ្ដឹងរបស់នាងនោះទេ ដោយបានជំរុញឲ្យនាងទៅប្ដឹងខាងមន្ត្រីសាលាសង្កាត់ចោមចៅវិញ ដោយនគរបាលនិយាយថា នេះគឺជារឿងរដ្ឋប្បវេណី មិនមែនជារឿងព្រហ្មទណ្ឌនោះឡើយ បើជារឿងព្រហ្មទណ្ឌ ទើបប្ដឹងនៅខាងនគរបាល ។
ប៉ុន្តែទន្ទឹមនឹងនោះដែរ ក៏មានមតិខ្លះបានលើកឡើងថា ការបោកបញ្ឆោតយកខ្លួនប្រាណបែបនេះ ក៏ចាត់ទុកថា បទល្មើសមួយដែរ និងជាបទល្មើសព្រហ្មទណ្ឌ ហើយរំលោភលើទំនុកចិត្ត ដូច្នេះនគរបាលគួរតែទទួលពាក្យបណ្ដឹងចាត់ការតាមច្បាប់ មិនគួររុញទៅនេះទៅនោះបែបនឹងទេ ធ្វើបែបនេះតើឲ្យនាងជារងគ្រោះទៅសង្ឃឹមអ្នកណាទៀត ហើយជនដែលប្រព្រឹត្តិអំពើអាក្រក់ធ្វើបាបនាងនឹងបានរួចខ្លួនយ៉ាងរំភើយមិនខាន ៕
ចែករំលែកព័តមាននេះ