រាជធានីភ្នំពេញ ៖ ទិវារត់ប្រណាំងអន្តរ ជាតិពាក់កណ្ដាលម៉ារ៉ាតុងលើកទី៦ នៅខេត្តព្រះសីហនុឆ្នាំនេះសង្ឃឹមថា នឹងមានអ្នកមកចុះឈ្មោះចូលរួមរត់ច្រើនជាងបណ្ដាឆ្នាំកន្លងមក ។ នេះបើយោងតាមការឱ្យដឹងពីលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ដែលបានមានប្រសាសន៍នៅក្នុងសន្និសីទសារព័ត៌មាននៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃទី១១ កុម្ភៈ កន្លងមកនេះ។
លោក វ៉ាត់ ចំរើន បានបន្តឱ្យដឹងទៀតថា ព្រឹត្តិការណ៍បែបនេះ បានរៀបចំធ្វើឡើងចំនួន៥លើករួចមកហើយ ដោយមានអ្នកចុះឈ្មោះរត់ប្រហែលជាង១ពាន់នាក់ប៉ុណ្ណោះ ក្នុងនោះជនបរទេសមានជាង១០០នាក់ ។ ដោយឡែកឆ្នាំនេះ គិតមកដល់ពេលនេះមានអ្នកមកចុះឈ្មោះរត់ជិត១ពាន់នាក់ហើយ ក្នុងនោះជនបរទេសមានជាង១០០នាក់ ។
លោកបានឱ្យដឹងទៀតថា គោលបំណងសំខាន់នៃទិវារត់ប្រណាំងអន្តរជាតិពាក់កណ្ដាលម៉ារ៉ាតុងនេះ ធ្វើឡើងដើម្បីផ្សព្វផ្សាយឱ្យប្រជាពលចូលរួមថែរក្សាបរិស្ថានទាំងអស់គ្នា ដើម្បីសុខភាព ផ្សព្វផ្សាយពីឆ្នេរសមុទ្ររបស់កម្ពុជាឱ្យគេស្គាល់កាន់តែទូលំទូលាយ និងរត់ដើម្បីអត្ថប្រយោជន៍សប្បុរសធម៌ ។ ប៉ុន្តែរយៈពេល៥ឆ្នាំមកនេះ ដោយសារតែអ្នកមកចុះឈ្មោះចូលរួមរត់តិច ហើយការរៀបចំកម្មវិធីនេះ ត្រូវចំណាយច្រើន ដូច្នេះយើងមិនទាន់ទទួលបានផលពីកម្មវិធីនេះទៅជួយដល់មន្ទីរពេទ្យ ឬអង្គការណាមួយនៅឡើយទេ ។ ទោះបីជាយ៉ាងណា លោកនៅតែបន្តជំរុញឱ្យមានកម្មវិធីរត់បែបនេះ រហូតទទួលបានជោគជ័យ ហើយសង្ឃឹមថា នៅបណ្ដាឆ្នាំក្រោយៗអាចនឹងមានអ្នកមកចុះឈ្មោះចូលរួមច្រើនរហូតដល់រាប់ពាន់នាក់មិនខាន ។
ចំណែកសំបុត្រមានលក់នៅទីស្នាក់ការគណៈកម្មាធិការជាតិអូឡាំពិកកម្ពុជា និងនៅខេត្តព្រះសីហនុ រហូតដល់ចុងខែកុម្ភៈ ។ តម្លៃសំបុត្ររត់ចម្ងាយ២១គីឡូម៉ែត្រសម្រាប់ជនបរទេស៤៥ដុល្លារ កម្ពុជា១៥ដុល្លារ ។ រត់ចម្ងាយ១០គីឡូម៉ែត្រ ជនបរទេស៣៥ដុល្លារ កម្ពុជា១០ដុល្លារ និងរត់ជាលក្ខណៈគ្រួសារ (Fun Run) ជនបរទេស២០ដុល្លារ កម្ពុជា៥ដុល្លារ ហើយទិវារត់ប្រណាំងនេះ នឹងត្រូវរៀបចំធ្វើឡើងនៅថ្ងៃទី៥ មីនា ខាងមុខនេះ ៕
ចែករំលែកព័តមាននេះ