កងទ័ពតួកគីរាយការណ៍ថា ទាហានតួកគី៣នាក់ស្លាប់ដោយចៃដន្យកាលពីថ្ងៃទី៩ កុម្ភៈ ក្នុងការវាយប្រហារមួយរបស់កងយន្តហោះរុស្ស៊ីនៅភាគខាងជើងស៊ីរី ។
ក្នុងសេចក្តីប្រកាសមួយ កងទ័ពតួកគីបន្តថា ទាហានតួកគី១១នាក់ទៀតក៏រងរបួសដែរ ក្នុងការវាយប្រហារច្រឡំនេះដែល បន្ទាប់ពីនោះប្រធានាធិបតីរុស្ស៊ី លោកវ្ល៉ាឌីមៀរ ពូទីន បានសម្តែងការចូលរួមមរណទុក្ខចំពោះសមភាគីតួកគី លោករីស៊ីប តៃយីប អ័រដូហ្គាន ។
យោងតាមសេចក្តីប្រកាសថា កងយន្តហោះរុស្ស៊ីប៉ងវាយប្រហារលើបណ្តាគោលដៅរបស់ក្រុមរដ្ឋអ៊ិស្លាម ក៏ប៉ុន្តែទាហានរបស់យើង៣នាក់ត្រូវស្លាប់ពេលអគារមួយដែលកងទាហានយើងឈរជើងនៅទីនោះរងការវាយប្រហារ ។
នៅក្រុងមូស្គូ វិមានក្រឹមឡាំងប្រកាសថា លោកពូទីន និងលោកអ័រដូហ្គាន បានសម្រេចពេលជួបសន្ទនាគ្នាតាមទូរស័ព្ទពង្រឹងកិច្ចសហប្រតិបត្តិការប្រឆាំងក្រុមរដ្ឋអ៊ិស្លាម ។
មុននេះបណ្តាសារព័ត៌មានតួកគីរាយការណ៍ថា ទាហានតួកគី៥នាក់ថ្មីទៀតត្រូវស្លាប់កាលពីថ្ងៃទី៩ កុម្ភៈ ក្នុងការប្រយុទ្ធគ្នានានាជាមួយពួកជីហាដ ក្រុមរដ្ឋអ៊ិស្លាមនៅភាគខាងជើងស៊ីរី ធ្វើឱ្យចំនួនទាហានតួកគីស្លាប់នៅតំបន់នេះឡើងដល់១០នាក់ រយៈពេល២ថ្ងៃ ។ មិនទាន់ច្បាស់ដែរថាតើក្នុងចំណោមទាហានតួួកគីដែលស្លាប់នេះមានរាប់បញ្ជូនទាហានស្លាប់ដោយសារការទម្លាក់គ្រាប់បែករបស់រុស្ស៊ីដែរ ឬយ៉ាងណា ។ ទាហានតួកគី៥នាក់ថ្មីដែលស្លាប់គឺនៅតំបន់ក្រុង AL BAB ទីតាំងក្រុមរដ្ឋអ៊ិស្លាម ដែលកងទ័ពតួកគី និងពួកឧទ្ទាមស៊ីរីដែលខ្លួនទ្រទ្រង់ប៉ុនប៉ងវាយដណ្តើមយកចាប់តាំងពីច្រើនសប្តាហ៍មកហើយ ។
យោងតាមទីភ្នាក់ងារព័ត៌មាន DOGAN ថា សរុបទាហានតួកគី៦៦នាក់ស្លាប់ តាំងពីចាប់ផ្តើមអន្តរាគមន៍របស់តួកគីនៅភាគខាងជើងស៊ីរីកម្ទេចពួកជីហាដមក ៕
ចែករំលែកព័តមាននេះ