រាជធានីភ្នំពេញ ៖ នៅរសៀលថ្ងៃសៅរ៍ ទី១១ កុម្ភៈ ស្អែកនេះ ប្រដាល់អន្តរជាតិរបស់ខារ៉ាបាវរដូវកាលទី២ វគ្គសន្សំពិន្ទុប្រចាំសប្ដាហ៍ឈានទៅដណ្ដើមខ្សែក្រវាត់រវាងកីឡាករ
កម្ពុជា និងបរទេសកាន់តែមានសភាពក្ដៅគគុក ព្រោះដល់ជុំកំណត់ឃើញអ្នកមានពិន្ទុត្រូវធ្លាក់ និងឡើងបន្តនោះផង ។ សមាសភាពកីឡាករកម្ពុជា ដែលឡើងប្រកួតដណ្ដើមយក៣ពិន្ទុ រួមមានកីឡាករ ឡុង សុវណ្ណឌឿន និងកីឡាករ អ៊ុំ ចំរើន ប៉ះជាមួយកីឡាករថៃ២រូប ដែលមានការទទួលស្គាល់ថា ខ្លាំងមិនធម្មតា។
ព្រឹត្តិការណ៍ប្រដាល់អន្តរជាតិដណ្ដើមខ្សែក្រវាត់របស់ភេសជ្ជៈខារ៉ាបាវវគ្គ២នេះ ត្រូវគេមើលឃើញថា មានការគាំទ្រដាច់ឆ្ងាយតែម្ដង បើធៀបនឹងការប្រកួតអន្តរជាតិកាលពីវគ្គ១ ដោយសារតែសមាសភាពកីឡាករទាំងខាងកម្ពុជា និងខាងបរទេសសុទ្ធតែមានកម្រិតល្អ ហើយមើលទៅម្នាក់ៗបញ្ចេញថ្វីដៃគួរឱ្យទាក់ទាញរៀងខ្លួន ។ កីឡាករកម្ពុជា២រូបរួមមានជើងខ្លាំង ឡុង សុវណ្ណឌឿន និង អ៊ុំ ចំរើន នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃនៅរសៀលថ្ងៃសៅរ៍ស្អែកនេះ ។ កីឡាករកម្ពុជាត្រូវបានអះអាងថាសម្ងំហ្វឹកហាត់មិនខុសគ្នានោះទេ ដោយសារតែចង់គ្រងតំណែងជាម្ចាស់ខ្សែក្រវាត់អន្តរជាតិរបស់ខារ៉ាបាវ និងទទួលបានប្រាក់លានអមដោយកិត្តិយសមុខមាត់ ។
យ៉ាងណាមិញ គេមិនទាន់ដឹងថា កីឡាករណាមួយនឹងមានលទ្ធភាពយកបាន៣ពិន្ទុនៅសប្ដាហ៍នេះទេ ដោយសារតែភាគីទាំងសងខាងសុទ្ធតែបានត្រៀមទុកពីចម្ងាយហើយជាមួយនឹងប្រវត្តិចាញ់ខ្លះ ឈ្នះខ្លះ សុទ្ធតែជាលក្ខខណ្ឌដែលធ្វើឱ្យពួកគេត្រូវការស្ដារមុខមាត់ ។
លោក ញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជាជើងខ្លាំង២រូបខាងលើ នឹងបើកឆាកប្រយុទ្ធថ្ងៃស្អែកនេះ ។ កីឡាករ ឡុង សុវណ្ណឌឿន មកពីក្លិបសាលវ័ន្ដកីឡា ប៉ះប្រកួតជាមួយកីឡាករថៃឈ្មោះ ខ្វាន់ អេក ក្នុងនាមជាគូបើកឆាកអន្តរជាតិដណ្ដើមពិន្ទុ ។ លោកជឿជាក់ថា កីឡាករ ឡុង សុវណ្ណឌឿន នឹងមិនភ្លាត់ឱ្យចាញ់សម្រាប់ការប្រកួតនេះទេ ដោយសារតែគេបើឈ្នះនឹងក្លាយជាអ្នកឡើង តែបើចាញ់នឹងត្រូវចាំអ៊ុតមើលសិន ។ លោកថា កីឡាកររូបនេះ ត្រូវការឈ្នះដើម្បីបន្តទៅកាន់វគ្គពាក់កណ្ដាលផ្ដាច់ព្រ័ត្រ ដែលអ្នកណាក៏ចង់ឡើងរេញដែរ ។
លោករំពឹងថា ការប្រកួតបើកឆាករបស់គូអន្តរជាតិមួយនេះ នឹងទាក់ទាញចំណាប់អារម្មណ៍ខ្លាំងក្លា ដោយសារកីឡាករថៃក៏ត្រូវការឈ្នះដើម្បីឈានឡើងទៅវគ្គបន្តដូចគ្នា ហើយកីឡាករខាងកម្ពុជាក៏ត្រូវការឈ្នះមិនអាចចាញ់ ដើម្បីមិនឱ្យរបូតឱកាសដូចគ្នា ។ កីឡាករថៃ ខ្វាន់ អេក ធ្លាប់ប្រកួត៩០លើក ឈ្នះ៦៥លើក ចាញ់២១លើក និងស្មើ៤លើក ក្នុងពេលដែលកីឡាករកម្ពុជាឆ្លងកាត់ការប្រកួតរហូតដល់៩៧លើក ឈ្នះ៨២លើក ចាញ់១០លើក និងស្មើ៥លើក ។
សម្រាប់កីឡាករ អ៊ុំ ចំរើន លោក ញាណ សុធី បញ្ជាក់ថា គេហាក់មិនសូវត្រូវការឈ្នះសម្រាប់ការប្រកួតនេះទេ ដោយសារតែគេឈ្នះក៏នៅតែធ្លាក់ ។ ប៉ុន្តែគេនឹងបាក់មុខមាត់កាន់តែខ្លាំង ប្រសិនបណ្ដោយឱ្យចាញ់សម្រាប់ព្រឹត្តិការណ៍លើកនេះ ។ លោកថា គេត្រូវប៉ះប្រកួតជាមួយកីឡាករថៃឈ្មោះ កេង កាត់ ដោយការប្រកួតមួយនេះ ម្នាក់ៗនឹងកាន់តែបញ្ចេញថ្វីដៃមិនធម្មតាសម្រាប់ជំនួបលើកនេះ ។ លោកថា ឆ្លងកាត់ការប្រកួតកន្លងមក កីឡាករថៃត្រូវការឈ្នះលើកនេះ ដើម្បីបានឡើងបន្ត ដោយលោកចាត់ទុកថា បើ អ៊ុំ ចំរើន បណ្ដោយឱ្យចាញ់ម្ដងទៀត គឺពិតជាអាម៉ាស់រកលេខដាក់គ្មាន ដោយសារតែប្រកួតកន្លងមក មានតួលេខចាញ់ច្រើនជាងឈ្នះរួចទៅហើយ ។ លោកថា កីឡាករថៃរូបនេះ ធ្លាប់ប្រកួត៩៣លើក ឈ្នះ៨២លើក ចាញ់១០លើក និងស្មើ១លើក ក្នុងពេលកីឡាករកម្ពុជាធ្លាប់ប្រកួតបានដល់១០៣លើក ឈ្នះ៧០លើក និងចាញ់៣៣លើក ។
យ៉ាងណាមិញ គេនៅមិនទាន់ប្រាកដថា អ៊ុំ ចំរើន ដែលមានបទពិសោធន៍ច្រើនជាងនឹងទប់ជាប់នោះទេ ក្នុងពេលដែលគេមិនត្រូវការឈ្នះដាច់ខាត ហើយកីឡាករថៃត្រូវការឈ្នះទាល់តែបានបែបនេះ ។ គូនេះគេមើលឃើញថា នឹងស៊ីសាច់ហុតឈាម ដោយសារតែកីឡាករកម្ពុជា ពិតជាមិនចង់ជាប់ឈ្មោះធ្លាក់ដៃ ហើយកីឡាករថៃក៏មិនចង់របូតឱកាស ៕
ចែករំលែកព័តមាននេះ