គេចពីអ្នកតាមប្រមាញ់ពេលយប់បុកចូលផ្ទះអ្នកស្រុក
ខេត្តក្រចេះ ៖ រថយន្តសាំយ៉ុង១គ្រឿងដែលដឹកទ្វារបង្អួច បានបោះពួយផ្តាច់ព្រលឹងបុកចូលផ្ទះមួយនៅក្បែរចិញ្ចើមផ្លូវ កណ្តាលក្រុងក្រចេះ
ខេត្តក្រចេះ ៖ រថយន្តសាំយ៉ុង១គ្រឿងដែលដឹកទ្វារបង្អួច បានបោះពួយផ្តាច់ព្រលឹងបុកចូលផ្ទះមួយនៅក្បែរចិញ្ចើមផ្លូវ កណ្តាលក្រុងក្រចេះ បណ្តាលឲ្យមនុស្សប្រុសស្រី៣នាក់ដែលជិះក្នុងរថយន្តកៀបជាប់រងរបួសធ្ងន់ ។ ការបើកបោះពួយក្នុងល្បឿនលឿនដូចហោះនេះ ទំនងបើករត់គេចពីការតាមប្រមាញ់របស់សមត្ថកិច្ចណាមួយ តែក្រោយពីរថយន្តនោះ ជួបហេតុការណ៍អាក្រក់ក្រុមដែលដេញតាមដើម្បីគាបទារលុយនោះក៏បានគេចដាក់មេប្រូចបាត់អស់ដែរ ។
ការបើករថយន្តដឹកឈើនិងដឹកគ្រឿងសង្ហារិម ទ្វារ បង្អួចហើយជ្រុលចង្កូតបុកចូលផ្ទះគេនេះមិនមែនជារឿងថ្មីនោះទេ គឺជារឿងអាក្រក់តែងតែកើតមានជាញឹកញាប់ ។
ករណីលើកនេះទៀតបានបង្កឡើងដោយរថយន្តសាំយ៉ុងដឹកទ្វារបង្អួច បានជ្រុលទៅបុកចូលក្រោមផ្ទះមួយនៅចំណុចម្តុំផ្លូវកោង និងបានធ្លាក់ចូលប្រឡាយផ្លូវ នៅកណ្តាលក្រុងក្រចេះទាំងវេលាពាក់កណ្តាលអធ្រាត្រឈានចូលថ្ងៃទី៩ កុម្ភៈ ។ បើតាមការលើកឡើងពីអ្នកស្រុកនៅកន្លែងកើតហេតុបានឲ្យដឹងថា កន្លងមកទីតាំងផ្ទះនៅម្តុំផ្លូវកោងលើទំនប់នេះ ឧស្សាហ៍មានរថយន្តដឹកឈើ បើកបុកចូលផ្ទះរបស់ពួកគាត់ ដោយសារតែពួករថយន្តទាំងនោះតែងតែបើកក្នុងល្បឿនលឿនផ្តាច់ព្រលឹងគួបផ្សំនឹងស្ថានភាពផ្លូវនៅចំណុចនោះជាទីប្រជុំជន ហើយមានសភាពកោងខ្លាំងផង ទើបបណ្តាលឲ្យរេចង្កូតបុកចូលផ្ទះដែលនៅក្បែរចិញ្ចើមផ្លូវ ឬមានខ្លះត្រូវក្រឡាប់ធ្លាក់ចូលជ្រោះក្រោមផ្ទះក៏មាន ។
ជុំវិញហេតុការណ៍ថ្មីមួយនេះនគរបាលចរាចរណ៍ដែលបានទៅត្រួតពិនិត្យកន្លែងកើតបានបញ្ជូនជនរងគ្រោះ ដែលកៀបជាប់ក្នុងកាប៊ីនរថយន្តនោះ បានឲ្យដឹងថា ជនរងគ្រោះប្រុស-ស្រីទាំងបីនាក់ មានព្រូ អ្នកបើកបរ និងម្ចាស់ទ្វារបង្អួច ។ ពួកគេបានរងរបួសធ្ងន់ធ្ងរនិងត្រូវបានចាត់បញ្ជូនទៅសង្គ្រោះនៅមន្ទីរពេទ្យឯរាជធានីភ្នំពេញ ។ អ្នកឃើញហេតុការណ៍បានឲ្យដឹងថា យប់ដែលកើតហេតុនោះមានរថយន្តដឹកឈើគ្រឿងផ្ទះនិងដឹកគ្រឿងសង្ហារិមរាប់សិបគ្រឿង បានបើកវ៉ាប្រដេញគ្នាពេញផ្លូវជាតិ ។ ការបើកប្រដេញនេះត្រូវគេដឹងថា ទំនងជារថយន្តទាំងនោះបានព្យាយាមបើកគេចពីការប្រដេញស្ទាក់កាក់ទាលុយពីក្រុមសមត្ថកិច្ចស្ថាប័នណាមួយ ដែលដាក់កុងត្រូលជជុះចាំយកលុយនៅលើផ្លូវជាតិនានាក្នុងខេត្ត ។
ប្រជាពលរដ្ឋនិយាយថា ការធ្វើដំណើរវេលាយប់តាមផ្លូវជាតិ គឺប្រឈមនឹងគ្រោះថ្នាក់ជាយថាហេតុ ដោយសារក្រុមរថយន្តដឹកឈើ ដឹកគ្រឿងសង្ហារិមរាប់សិបគ្រឿងប្រជែងគ្នាសោយរាជ្យលើដងផ្លូវជាតិ ហើយបញ្ហានេះក៏មានការអំពាវនាវដល់ស្ថាប័នពាក់ព័ន្ធជួយទប់ស្កាត់ ឬកែលម្អស្ថានភាពដ៏អាក្រក់នេះដើម្បីកាត់បន្ថយគ្រោះថ្នាក់ ។
ទោះបីជាបែបណា ការអំពាវនាវរបស់ពលរដ្ឋ គឺតែងបានធ្វើឡើង បន្ទាប់ពីពួកគាត់បានមើលឃើញថា សព្វថ្ងៃការដឹកឈើតាមរថយន្តសាំយ៉ុងនៅពេលយប់ កំពុងតែកំរើកឡើងវិញកាន់តែខ្លាំង ពោលគឺក្នុងមួយយប់ៗមានឈើរាប់សិបមែ៉ត្រគូប ត្រូវបានគេដឹកជញ្ជូនតាមរយៈហ្វូងរថយន្តសាំយ៉ុង រាប់រយគ្រឿងចេញពីខេត្តក្រចេះ ឆ្ពោះមកកាន់ខេត្តភាគខាងក្រោម ដែលជាច្រកចេញទៅកាន់ទីផ្សារងងឹត ។
ទន្ទឹមនឹងមានការដឹកជញ្ជូនបែបអនាធិបតេយ្យពីហ្វូងរថយន្តទាំងនេះ ទាំងយប់ទាំងថ្ងៃ កុងត្រូលជជុះរបស់សមត្ថកិច្ចក៏ត្រូវគេមើលឃើញថា បានកើតមានឡើងរីកដូចផ្សឹតផងដែរបណ្តាក់គ្នាដូចខ្ចង ។ ក្រុមកុងត្រូលទាំងនោះ គឺគេឃើញមានសមាសភាពសុទ្ធសឹងជាសមត្ថកិច្ចស្ទើរគ្រប់ស្ថាប័នក្នុងខេត្ត និងបានដាក់បណ្តុំយ៉ាងអនាធិបតេយ្យនៅលើផ្លូវជាតិ និងនៅចំណុចក្បាលស្ពាន ឬដាក់ក្បាលឡានតម្រៀបត្រៀបត្រាពេញផ្លូវ ចាំប្រដេញស្ទាក់កាក់ទារលុយពីហ្វូងរថយន្តទាំងនេះ ។ សរុបមកទាំងអ្នកជួញឈើ និងអ្នកបង្ក្រាបបទល្មើស គឺម្នាក់ៗគិតតែពីប្រយោជន៍បុគ្គល ឬអង្គភាពរបស់ខ្លួន មិនបានគិតពីផលប៉ះពាល់ដល់សង្គមនោះឡើយពិតជាថោកទាបរកលេខដាក់គ្មានទេ ៕
ចែករំលែកព័តមាននេះ