ដើម្បីចូលរួមការការទប់ស្កាត់ការបន្តលក់ដូរទំនិញ ឬអីវ៉ាន់ កាន់តែចូលកៀកជាប់នឹងដងផ្លូវជាតិលេខ៥៧ រដ្ឋបាលក្រុងប៉ៃលិន បានដឹកនាំក្រុមការងារ ចុះរៀបចំ
ខេត្តប៉ៃលិន ៖ នៅព្រឹកថ្ងៃទី០៧ ខែកញ្ញា ឆ្នាំ២០២២ ដើម្បីចូលរួមការការទប់ស្កាត់ការបន្តលក់ដូរទំនិញ ឬអីវ៉ាន់ កាន់តែចូលកៀកជាប់នឹងដងផ្លូវជាតិលេខ៥៧ រដ្ឋបាលក្រុងប៉ៃលិន បានដឹកនាំក្រុមការងារ ចុះរៀបចំសណ្តាប់ធ្នាប់នៅតាមដងផ្លូវសាធារណៈ ដោយអប់រំឱ្យប្រជាពលរដ្ឋទាំងអស់បង្ខិតតូប ឬរោងលក់ដូរ ចូលទៅខាងក្នុងប្រវែង៣ម៉ែត្រ។
នៅក្នុងការចុះពិនិត្យ និងរៀបចំសណ្តាប់ធ្នាប់ចិញ្ចើមផ្លូវសាធារណៈនេះ លោក ស៊ុន យី អភិបាលក្រុងប៉ៃលិន បានឱ្យដឹងថា ៖ ការដឹកនាំក្រុមការងាររៀបចំសណ្តាប់ធ្នាប់នេះ គឺធ្វើយ៉ាងណាឱ្យប្រជាបលរដ្ឋដែលបំពានចិញ្ចើមផ្លូវលក់លយចូលមកកាន់តែកៀកនឹងផ្លូវជាតិលេខ៥៧នេះ ឱ្យបន្ថយតូប ឬរោងរបស់ខ្លួនចូលទៅក្នុងឆ្ងាយពីផ្លូវបន្តិច ដើម្បីរក្សាសោភ័ណភាពទីក្រុងស្អាត ងា.យស្រួលក្នុងការទាក់ទងភ្ញៀវទេសចរជាតិ និងអន្តរជាតិឱ្យចូលមកលេងកម្សាន្តក្នុងខេត្តប៉ៃលិន កាន់តែច្រើនកុះករ។
លោកបន្តទៀតថា ជំហានដំបូងនេះ មិនមានការផាកពិន័យដល់ពួកគាត់នោះទេ គ្រាន់តែក្នុង១អាទិត្យម្តង ក្រុមការងារក្រុងនឹងចុះរៀបចំសណ្តាប់ធ្នាប់តាមដងផ្លូវសាធារណៈ ទាំងផ្លូវជាតិលេខ៥៧ និងតាមដងផ្លូវលំក៏ដោយ ព្រោះជាចិញ្ចើមផ្លូវទុកឱ្យប្រជាពលរដ្ឋដើរហាត់ប្រាណនាពេលព្រឹក ឬល្ងាច ឱ្យមានសុវត្ថិភាពផងដែរ។ ម្យ៉ាងវិញទៀត ការលក់ដូរកាន់តែខិតជិតផ្លូវបែបនេះ មិនល្អនោះទេ បើសិនជាមានករណីរថយន្តជ្រុលចង្កូតទៅបុកប៉ះនាំឱ្យមានការខូចខាតទ្រព្យសម្បត្តិ ឬបាត់បង់អាយុជីវិតជាយថាហេតុ ថែមទៀតផង។
លោកក៏សំណូមពរឱ្យប្រជាពលរដ្ឋទូទាំងខេត្តប៉ៃលិន មានការយោគយល់ ដោយត្រូវនាំគ្នាបង្ខិតតូបរបស់ខ្លួនចូលទៅខាងក្នុងបន្តិច ហើយការធ្វើបែបនេះ ជាការជួយដល់សម្រស់ទីក្រុងប៉ៃលិន ឱ្យកាន់តែមានភាពស្រស់ស្អាត ហើយមានរបៀបរៀបរយល្អ មិនបង្កផលប៉ះពាល់ដល់បរិស្ថាន ឬបង្កភាពអនាធិបតេយ្យតាមដងផ្លូវនោះឡើយ។
ទោះបីជាយ៉ាងណា នៅព្រឹកថ្ងៃដដេលនេះ គេឃើញប្រជាពលរដ្ឋចាប់ផ្តើមរុះរើបង្ខិតតូបរបស់ខ្លួនចូលទៅខាងក្នុងបន្តិចហើយ ក៏មានការចូលរួមតាមការណែនាំរបស់ថ្នាក់ដឹកនាំខេត្ត ក៏ដូចជា ថ្នាក់ដឹកនាំក្រុងប៉ៃលិន ដោយពិនិត្យមើលទៅឃើញផ្លូវក្នុងក្រុងប៉ៃលិនកាន់តែធំទូលាយ មិនមានភាពចង្អៀតដូច កាលពីមិនទាន់ចុះរៀបចំសណ្តាប់ធ្នាប់នោះឡើយ។
សូមបញ្ជាក់ថា ៖ រដ្ឋបាលក្រុងប៉ៃលិន ក៏បានព្រមា.នដែរថា បើសិនជាប្រជាពលរដ្ឋមិនព្រមអនុវត្តតាមការណែនាំរបស់អាជ្ញាធរទេ នឹងមានការផាកពិន័យ ឬអនុវត្តតាមផ្លូវច្បាប់ចំពោះអ្នកដែលបន្តលក់ដូរនៅក្បែរផ្លូវជាតិថែមទៀតផង៕
ចែករំលែកព័តមាននេះ