ខេត្តស្វាយរៀង ៖ ឈ្មួញកំពុងសម្រុកដឹកជ្រូកឆ្លងដែនពីប្រទេសវៀតណាម ចូលមកកាន់ខេត្តស្វាយរៀង ដោយក្នុងមួយថ្ងៃៗមានរាប់ពាន់ក្បាល តាមច្រករបៀងព្រៃតាអី ឃុំព្រៃតាអី ស្រុកស្វាយទាប រយៈពេលជាងមួយខែមកហើយ រហូតមកដល់ថ្ងៃទី១០ កុម្ភៈនេះ ។
ក្នុងនោះ ប្រជាពលរដ្ឋនាំគ្នាធ្វើការរិះគន់ថា សមត្ថកិច្ចកំពុងតែបណ្តែតបណ្តោយឱ្យឈ្មួញដឹកជ្រូកចូលពីប្រទេសវៀតណាម តាមរថយន្តសណ្តោងរ៉ឺម៉កក្នុងមួយគ្រឿងចំនួន៣៣០ក្បាល ធ្វើឱ្យខូចផ្លូវដែលជាអំណោយដ៏ថ្លៃថ្លារបស់សម្តេចតេជោហ៊ុន សែន ផ្តល់ជូនប្រជាពលរដ្ឋសម្រាប់ស្រុកស្វាយទាប ។
បច្ចុប្បន្ន កងវិស្វកម្មអគ្គមេបញ្ជាការកងយោធពលខេមរភូមិន្ទ កំពុងសាងសង់មិនទាន់រួចរាល់ផង បើបណ្តែតបណ្តោយឲ្យឈ្មួញដឹកជ្រូកតាមរថយន្តធុនយក្ស ធ្វើឲ្យបាក់ស្រុតខូច ជាពិសេសផ្លូវលំជនបទមួយចំនួន ត្រូវខូចក្លាយទៅជារណ្តៅបែកល្បាប់ពេលមានភ្លៀងធ្លាក់ម្តងៗ ។
ចំណែកមន្ត្រីរាជការវិញ មានការព្រួយបារម្ភ ហើយលើកឡើងថា ខេត្តស្វាយរៀងជាគោលដៅការពារទប់ស្កាត់ជំងឺឆ្លង ជាពិសេស ខេត្តស្វាយរៀងជាខេត្តផ្ទុះជំងឺផ្តាសាយបក្សី ដែលក្រសួងសុខាភិបាល បានប្រកាសឱ្យរដ្ឋបាលខេត្ត និងមន្ទីរកសិកម្មរុក្ខាប្រមាញ់និងនេសាទខេត្ត ធ្វើការទប់ស្កាត់ ហើយសម្តេចក្រឡាហោមស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានចេញសារាចរណ៍ ប្រកាសមិនឲ្យធ្វើចរាចរណ៍ចេញចូលនូវមុខទំនិញសត្វពីប្រទេសជិតខាង តាមច្រករបៀងចូលមកព្រះរាជាណាចក្រកម្ពុជា ក៏ប៉ុន្តែសមត្ថកិច្ចបែរជាផ្គើន បើកដៃឲ្យឈ្មួញនាំជ្រូកឆ្លងដែនពីប្រទេសវៀតណាមទៅវិញ ។
ទាក់ទិនករណីនេះ លោកប៉ែន ចន្ធី ប្រធានការិយាល័យផលិតកម្ម និងបសុព្យាបាលខេត្តបានឱ្យដឹងថា ម្ចាស់ក្រុមហ៊ុនដឹកជ្រូកនេះមានថៅកែរឈ្មោះហេង មានច្បាប់អនុញ្ញាត ពីអគ្គនាយកដ្ឋានផលិតកម្ម និងបសុព្យាបាលក្រសួងកសិកម្ម ។ ដូច្នេះមន្ត្រីពេទ្យសត្វ គ្រាន់តែពិនិត្យ និងបាញ់ថ្នាំលើរថយន្តការពារជម្ងឺឆ្លងបណ្ណោះ ។ រីឯមន្ត្រីគយខេត្តម្នាក់បានបង្ហើបឲ្យដឹងថា គេបង់ពន្ធចូលគយហើយទាន…!
ចែករំលែកព័តមាននេះ