ប្រទេសវៀតណាម ៖ វៀតណាម និងឡាវនឹងបង្កើនប្រាក់ចំណូលពាណិជ្ជកម្មទ្វេភាគីចំនួន១០%នៅឆ្នាំ២០១៧ ។ នេះបើតាមនាយករដ្ឋមន្ត្រីវៀតណាម លោក Nguyen Xuan Phuc បានឲ្យដឹងកាលពីថ្ងៃពុធ ។
លោក Phuc បានធ្វើបទបង្ហាញនេះក្នុងសន្និសីទកាសែតមួយជាមួយភាគីឡាវ លោក Thongloun Sisoulith នៅក្រុងហាណូយ បន្ទាប់ពីភាគីទាំងពីរបានបើកកិច្ចប្រជុំគណៈកម្មាធិការអន្តរជាតិវៀតណាម-ឡាវ លើកទី៣៩ ។
លោក Phuc ថ្លែងថា ៖ « ក្នុងឆ្នាំ២០១៧នេះ ប្រទេសទាំងពីរនឹងពង្រីកកិច្ចសហប្រតិបត្តិការក្នុងការបណ្តុះបណ្តាលធនធានមនុស្ស, ការវិនិយោគគម្រោងហេដ្ឋារចនាសម្ព័ន្ធដឹកជញ្ជូនដើម្បីភ្ជាប់ប្រទេសទាំងពីរ, កិច្ចសហប្រតិបត្តិការគ្រប់គ្រងការប្រើប្រាស់ធនធានទឹក និងធម្មជាតិផ្សេងទៀតប្រកបដោយនិរន្តរភាព » ។
ចំណែកទំនាក់ទំនងរវាងវៀតណាម និងឡាវក្នុងវិស័យអប់រំ លោក Phuc បានលើកឡើងនាពេលថ្មីៗនេះថា មាននិស្សិតឡាវចំនួន១៤ពាន់នាក់កំពុងសិក្សាក្នុងប្រទេសវៀតណាម ។
ទន្ទឹមនឹងនេះ ក្រុមហ៊ុនវៀតណាមបានវិនិយោគក្នុងគម្រោងជាង៤០០ នៅប្រទេសឡាវ ដោយមានទុនវិនិយោគសរុបប្រហែល៣,៧ប៊ីលានដុល្លារអាមេរិក ។
លោក Thongloum Sisoulith ឲ្យដឹងថា នៅឆ្នាំ២០១៧ ឡាវ និងវៀតណាមនឹងប្រារព្ធខួបលើកទី៥៥ នៃការបង្កើតទំនាក់ទំនងការទូត និងខួបលើកទី៤០ នៃការចុះហត្ថលេខាលើសន្ធិសញ្ញាមិត្តភាព និងកិច្ចសហប្រតិបត្តិការ ។
បន្ទាប់ពីកិច្ចប្រជុំនេះ ឯកសារចំនួន៤ត្រូវបានចុះហត្ថលេខា រួមមានការបង្កើតក្រុមហ៊ុនបណ្តាក់ទុនរួមគ្នាក្នុងការវិនិយោគសាងសង់ខ្សែបញ្ជូនថាមពលអគ្គិសនី៥០០គីឡូវ៉ាត់ពីវៀតណាម ទៅឡាវ ៕
ចែករំលែកព័តមាននេះ