រាជធានីភ្នំពេញ ៖ ដើម្បីជំរុញផលិតកម្មកែច្នៃសម្រាប់នាំចេញ និងកិច្ចសម្រួលពាណិជ្ជកម្មនៅកម្ពុជា ក្រសួងពាណិជ្ជកម្មបានដាក់ចេញនូវវិធានការ៦ចំណុចដើម្បីឆ្លើយតបនឹងវិស័យឯកជន ។ នេះបើយោងតាមសេចក្ដីប្រកាសព័ត៌មាន
រាជធានីភ្នំពេញ ៖ ដើម្បីជំរុញផលិតកម្មកែច្នៃសម្រាប់នាំចេញ និងកិច្ចសម្រួលពាណិជ្ជកម្មនៅកម្ពុជា ក្រសួងពាណិជ្ជកម្មបានដាក់ចេញនូវវិធានការ៦ចំណុចដើម្បីឆ្លើយតបនឹងវិស័យឯកជន ។ នេះបើយោងតាមសេចក្ដីប្រកាសព័ត៌មានរបស់ក្រសួងពាណិជ្ជកម្ម ក្នុងឱកាសបើកកិច្ចប្រជុំក្រុមការងារទី៧ នៃវេទិការាជរដ្ឋាភិបាល និងវិស័យឯកជន កាលពីថ្ងៃទី៩ កុម្ភៈ ម្សិលមិញ ។
កិច្ចប្រជុំនេះមានការចូលរួមពីលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោកឧកញ៉ា វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជា ដោយបានពិភាក្សាយ៉ាងផុសផុលទៅលើសំណើទាំង៦របស់វិស័យឯកជន និងដាក់ចេញនូវវិធានការឆ្លើយតបដូចខាងក្រោម ៖
១-ក្រសួងពាណិជ្ជកម្មនឹងពិនិត្យ និងកែសម្រួលឡើងវិញនូវរាល់នីតិវិធីផ្តល់វិញ្ញាបនបត្របញ្ជាក់ប្រភពដើមទំនិញ(CO)តាមប្រព័ន្ធស្វ័យប្រវត្តិកម្មគ្រប់ដំណាក់កាល ដើម្បីធានាបំពេញឲ្យបានតាមក្របខ័ណ្ឌពេលវេលាកំណត់៤៨ម៉ោង និងទាក់ទាញទំនុកចិត្តពីវិស័យឯកជន។ ទន្ទឹមគ្នានេះ ក្រសួងពាណិជ្ជកម្មនឹងបើកវគ្គបណ្តុះបណ្តាលជូនភ្នាក់ងាររត់ការទាំងអស់ដើម្បី ទទួលបានសិទ្ធិបំពេញបែបបទស្នើសុំCO ស្របច្បាប់ពីក្រសួង ។
២-ក្រសួងសូមរក្សាទុកកម្រៃគ្រប់គ្រងការនាំចេញ (EMF) ដោយសារជាប្រភពចំណូលសំខាន់នៃថវិកាជាតិ ដែលរាជរដ្ឋាភិបាលត្រូវប្រើប្រាស់សម្រាប់ការវិនិយោគសាធារណៈ និងការដំឡើងបៀវត្សជូនមន្ត្រីរាជការ ។ ជំនួសមកវិញ ក្រសួងពាណិជ្ជកម្ម នឹងពិនិត្យលទ្ធភាពស្នើសុំក្រសួងសេដ្ឋកិច្ច និងហិរញ្ញវត្ថុ ធ្វើការបញ្ចុះកម្រៃ EMF ដើម្បីលើកទឹកចិត្តដល់វិនិយោគិន ។
៣-ក្រសួងនឹងធ្វើវិសោធនកម្មមុខងារ និងការទទួលខុសត្រូវរបស់កាំកុងត្រូលក្នុងពេលអនាគត ដើម្បីធានាបំពេញប្រតិបត្តិការ (ត្រួតពិនិត្យទំនិញ) ឲ្យកាន់តែមានប្រសិទ្ធភាព។ បច្ចុប្បន្ន ក្រសួងបាននិងកំពុងរៀបចំសេចក្តីព្រាងច្បាប់ចំនួន៣ ដើម្បីកំណត់ពីភារកិច្ចស្នូលជាក់លាក់របស់កាំកុងត្រូលដូចជា ច្បាប់ស្តីពីកិច្ចការពារអ្នកប្រើប្រាស់, ច្បាប់ស្តីពីកិច្ចសន្យាពាណិជ្ជកម្ម និងច្បាប់ស្តីពីការប្រកួតប្រជែង ។
៤-ក្រសួងសូមរក្សាទុកនូវការធ្វើអធិការកិច្ចលើCO សម្រាប់ទំនិញដឹកតាមរថយន្តឆ្លងកាត់បន្ទាត់ព្រំដែនកម្ពុជា ទៅឡើងយន្តហោះនៅប្រទេសជិតខាង ដោយសារនេះជាផ្នែកមួយនៃការអនុវត្តវិធានប្រភពដើមទំនិញ ដើម្បីទប់ស្កាត់ការបន្លំប្រភពដើមនានាពីប្រទេសទី៣ ហើយទទួលបានការសរសើរពីសហគមន៍អឺរ៉ុប។ ជាមួយគ្នានេះ ក្រសួងពាណិជ្ជកម្មសូមស្នើដល់វិស័យឯកជនពន្លឿនការដាក់ពាក្យស្នើសុំអធិការកិច្ច នៅពេលដែលទំនិញផលិតបាន១០% ឬ២០% ដើម្បីចំណេញពេលវេលា ហើយក្រសួងគ្រោងនឹងចរចាជាមួយប្រទេសជិតខាងក្នុងពេលឆាប់ៗ ដើម្បីបើកឲ្យមានការដឹកជញ្ជូនទំនិញតាមផ្លូវទឹកផងដែរ ។
៥-ក្រសួងពាណិជ្ជកម្ម កន្លងមកដោយមានការឯកភាពពីក្រសួងសេដ្ឋកិច្ច និងហិរញ្ញវត្ថុ និងការគាំទ្រពីអង្គភាពប្រឆាំងអំពើពុករលួយបានដាក់ចេញនូវកម្រងសេវាសាធារណៈសម្រាប់វិស័យឯកជន តាមរយៈប្រកាសរួមលេខ ១៦៤៣ សហវ.ប្រក ចុះថ្ងៃទី១៦ ធ្នូ ឆ្នាំ២០១៤ ក្នុងនោះការកែតម្រូវ និងចេញច្បាប់ទុតិយតា CO មាននៅក្នុងឧបសម្ព័ន្ធ១ ។
៦-ក្រសួងពាណិជ្ជកម្មនឹងទទួលយកភាសាខ្មែរ ធ្វើជាភាសាគោលក្នុងការបញ្ជាក់ទំនិញប្រភេទសម្លៀកបំពាក់ និងសុំឲ្យមានការបកប្រែជាភាសាអង់គ្លេសនៅក្នុងរង្វង់ក្រចក ។
ស្របគ្នានេះ ក្រសួងបានលើកទឹកចិត្តឲ្យ G-MAC សហការជាមួយសភាពាណិជ្ជកម្មកម្ពុជា ដើម្បីរៀបចំជាសន្ទានុក្រមមួយសម្រាប់ជួយសម្រួលភាគីពាក់ព័ន្ធ ក្នុងការប្រើប្រាស់ពាក្យពេជន៍ឲ្យបានត្រឹមត្រូវទាំងភាសាខ្មែរ អង់គ្លេស និងចិន ។
គួរបញ្ជាក់ថា កិច្ចប្រជុំក្រុមការងារទី៧នេះ ត្រូវបានរៀបចំឡើងរៀងរាល់ឆ្នាំ ដើម្បីពិនិត្យ និងដោះស្រាយបញ្ហាប្រឈមនានា ដែលស្នើឡើងដោយវិស័យឯកជន ជាពិសេស ពាក់ព័ន្ធនឹងការលើកកម្ពស់បរិយាកាសធុរកិច្ច និងការជំរុញកិច្ចសម្រួលពាណិជ្ជកម្ម។ កិច្ចប្រជុំនេះ គឺជាយន្តការដ៏ល្អប្រសើរមួយសម្រាប់ការអភិវឌ្ឍវិស័យឯកជននៅក្នុងប្រទេសកម្ពុជា ដែលទទួលបានការកោតសរសើរពីវិស័យឯកជន ជាពិសេស វិនិយោគិន និងមហាជនទាំងក្នុង និងក្រៅប្រទេស ៕
ចែករំលែកព័តមាននេះ