រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា នៅអំឡុងខែមេសា ឆ្នាំ២០១៨ខាងមុខ រាជធានីភ្នំពេញនឹងមានប្រព័ន្ធដឹកជញ្ជូនតាមផ្លូវទឹក ចាប់ពីស្ពានព្រែកព្នៅ
រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា នៅអំឡុងខែមេសា ឆ្នាំ២០១៨ខាងមុខ រាជធានីភ្នំពេញនឹងមានប្រព័ន្ធដឹកជញ្ជូនតាមផ្លូវទឹក ចាប់ពីស្ពានព្រែកព្នៅ ដល់ស្ពានព្រែកសំរោង ក្រុងតាខ្មៅ ដើម្បីបង្កលក្ខណៈងាយស្រួលដល់ប្រជាពលរដ្ឋធ្វើដំណើរ ជាពិសេសជួយកាត់បន្ថយការកកស្ទះចរាចរណ៍ ផ្នែកលើគោក ។
ប្រជាពលរដ្ឋរស់នៅក្នុងរាជធានីភ្នំពេញ និងអ្នកដំណើរឆ្លងកាត់រាជធានីភ្នំពេញ បានឃើញយ៉ាងច្បាស់ពីស្ថានភាពចរាចរណ៍ក្នុងទីក្រុង ដែលប្រឈមនឹងការកកស្ទះយ៉ាងខ្លាំង ដោយសារកំណើនប្រជាពលរដ្ឋ និងមធ្យោបាយយានជំនិះយ៉ាងគំហុកលើសពីការផ្គត់ផ្គង់ផ្នែកហេដ្ឋារចនាសម្ពន្ធ័ដែលមានក្នុងពេលបច្ចុប្បន្ន ។ ដើម្បីឈានទៅដោះស្រាយបញ្ហា និងរកគន្លឹះដែលជាច្រកចេញឲ្យបានសមស្របទៀតនោះ កាលពីថ្ងៃទី៧ ខែកុម្ភៈ រដ្ឋបាលរាជធានីភ្នំពេញ បានបើកកិច្ចប្រជុំត្រួតពិនិត្យការងាររៀបចំការដឹកជញ្ជូនតាមផ្លូវទន្លេ ដែលផ្តល់ផលប្រយោជន៍និងងាយស្រួលសម្រាប់អ្នកធ្វើដំណើរ និងដឹកជញ្ជូនសម្រាប់រាជធានីភ្នំពេញ ។
លោក ប៉ា សុជាតិវង្ស អភិបាលរាជធានីភ្នំពេញ ថ្លែងថា ការធ្វើដំណើរនិងដឹកជញ្ជូនតាមផ្លូវទឹក គឺផ្តល់ភាពល្អប្រសើរ តែយើងបានមើលរំលងនាពេលកន្លងមក ។ ពេលនេះរដ្ឋបាលរាជធានីភ្នំពេញ បានលើកទឹកចិត្តឲ្យមានការចាប់ដៃគូជាមួយក្រុមហ៊ុនLYP group របស់លោកឧកញ៉ា លី យ៉ុងផាត់ ក្នុងការសហការ សិក្សាបន្ថែមលក្ខណៈបច្ចេកទេសពីផលប៉ះពាល់នានាជាមួយមន្ទីរសាធារណការ និងដឹកជញ្ជូនរាជធានីភ្នំពេញ ។
លោកអភិបាលរាជធានីភ្នំពេញថ្លែងទៀតថា គម្រោងដឹកជញ្ជូនតាមផ្លូវទឹកនេះ នឹងធ្វើឲ្យប្រជាពលរដ្ឋនៅតំបន់មុំទាំង៤នៃទន្លេចតុមុខកាន់តែងាយស្រួលក្នុងការធ្វើដំណើរចូលក្នុងរាជធានីភ្នំពេញ និងភ្ជាប់តំបន់អភិវឌ្ឍន៍នានា ។
ពិសេស គឺភ្ជាប់តំបន់ទាំងនោះឲ្យកាន់តែខិតជិតគ្នា ក៏ដូចជាទាក់ទាញភ្ញៀវទេសចរផងដែរ ស្របពេលដែលកម្ពុជាធ្វើជាម្ចាស់ផ្ទះនៃការប្រកួតកីឡាស៊ីហ្គេមនៅឆ្នាំ២០២៣ខាងមុខ និងឈានទៅសុំគោលការណ៍ពីរាជរដ្ឋាភិបាលលើការអនុវត្តគម្រោងនេះ ។
លោក ប៉ា សុជាតិវង្ស បានប្តេជ្ញាថា រាជធានីភ្នំពេញ នឹងធ្វើឲ្យបានសម្រេចនូវគម្រោង ដឹកជញ្ជូនតាមផ្លូវទឹកនេះនៅឆ្នាំ២០១៨ខាងមុខ ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ ឲ្យដឹងថា គម្រោងខាងលើនេះ ពាក់ពន្ធ័ទៅនឹងទន្លេសាប ទន្លេចតុមុខ ទន្លេបាសាក់ត្រើយខាងលិច ។ មន្ទីរបានសិក្សាជាមួយក្រុមហ៊ុន LYP group លើផ្លូវរត់២គន្លងទៅមកមានប្រវែង២៤,៦គីឡូម៉ែត្រ ចាប់ពីស្ពានព្រែកព្នៅដល់ស្ពានព្រែកសំរោង ក្រុងតាខ្មៅ អាចឲ្យកប៉ាល់ចេញចូលពីម៉ោង៦ព្រឹកដល់ម៉ោង៧យប់ ។ មានការរៀបចំចំណតចំនួន៩កន្លែង ក្នុងនោះមានស្ថានីយស្ពានព្រែកព្នៅ ស្ថានីយគីឡូម៉ែត្រលេខ៧ ស្ថានីយសូគីម៉ិចឫស្សីកែវ ស្ថានីយស្ពានជ្រោយចង្វា ស្ថានីយផ្សារចាស់ ស្ថានីយអរិក្សត្រ ស្ថានីយចាក់អង្រែលើ ស្ថានីយចាក់អង្រែក្រោម និងស្ថានីយក្រុងតាខ្មៅ ។
លោកប្រធានមន្ទីរបន្តថា ស្ថានីយទាំង៩នេះត្រូវភ្ជាប់ជាមួយចំណតរថយន្តដឹកជញ្ជូនអ្នកដំណើរក្នុងក្រុង ហើយការរៀបចំគម្រោងនេះ ចាប់ផ្តើមពីខែកុម្ភៈ ឆ្នាំ២០១៧នេះតទៅ នឹងបញ្ចប់នៅខែមេសា ឆ្នាំ២០១៨ ខាងមុខ ។
លោក សាំ ពិសិដ្ឋ បញ្ជាក់ថា ក្នុងជំហានដំបូងអាចនឹងប្រើប្រាស់កប៉ាល់ដឹកជញ្ជូនអ្នកដំណើរចំនួន១៨គ្រឿង ដែលក្នុងកប៉ាល់មួយគ្រឿងៗអាចផ្ទុកអ្នកដំណើរបានពី៩០ទៅ១០០នាក់ និងអាចរត់បាន៤ជុំ ឬស្មើនឹង៥០គីឡូម៉ែត្រក្នុងមួយថ្ងៃ ៕
ចែករំលែកព័តមាននេះ