ម្តាយបង្កើតរបស់តារាចម្រៀងត្រកូលឈួន អ្នកស្រី ហួត ឡាប បានលាចាកលោកនេះហើយ បន្ទាប់ពីអ្នកនាង ឈួន សុវណ្ណឆៃ និងបងប្អូនព្យាយាមខ្នះខ្នែង បញ្ជូនអ្នកម្តាយចេញទៅព្យាបាលនៅប្រទេសថៃ និងក្នុងស្រុក
រាជធានីភ្នំពេញ ៖ ម្តាយបង្កើតរបស់តារាចម្រៀងត្រកូលឈួន អ្នកស្រី ហួត ឡាប បានលាចាកលោកនេះហើយ បន្ទាប់ពីអ្នកនាង ឈួន សុវណ្ណឆៃ និងបងប្អូនព្យាយាមខ្នះខ្នែង បញ្ជូនអ្នកម្តាយចេញទៅព្យាបាលនៅប្រទេសថៃ និងក្នុងស្រុកអស់មួយរយៈកាលទាំងអារម្មណ៍ភ័យបុកពោះ។
នៅទីបំផុត អ្នកស្រីបានលាកូនចៅ ស្វាមីទាំងមិនអាចវិលវិញ និងធ្វើអោយកូនចៅនឹកស្រណោះទ្រហោយំនៅការបាត់បង់មួយនេះ និងសល់តែស្នាមអនុស្សាវរីយ៍រយលានអត្ថន័យ។ បើទោះបីជា ឈួន សុវណ្ណឆៃ តស៊ូចំណាយអស់ថវិកាច្រើនបែបណា ក៏មច្ចុរាជនៅតែឆក់យកជីវិតអ្នកមានគុណ ដែលរមែងមើលថែទាំកូនៗតាំងពីតូច តាំងពីនៅអត់ និងនៅស្រុកស្រែ។
ម្ល៉ោះហើយការបាត់បង់មួយនេះ ពិតជាហាក់ទទួលយកមិនបានឡើយ ដែលកូនចៅមានមែកធាងរឹងមាំខ្លះរស់នៅអាមេរិក បែរជាជួបភាពបែកគ្នា ទាំងមិនទាន់អស់ចិត្តផ្តល់ការតបស្នង និងក្តីស្រឡាញ់ជូនវិញអោយកាន់តែច្រើន។
មិនដឹងថា ឈួន សុវណ្ណឆៃ ជាកូនច្បងក្នុងគ្រួសារមានភាពទន់ដៃជើងបែបណាឡើយ ព្រោះ អ្នកនាងរមែងនៅក្បែរម្តាយនិងឪពុកញឹកញាប់ជាងគេ។ អ្នកនាងតែងតែផ្តល់ស្នាមញញឹមអោយម្តាយ នាំគាត់ដើរលេងកម្សាន្ត និងធ្វើផ្ទះស្អាតជូនម្តាយនៅបន្ទាយមានជ័យ។ ចំណុចទាំងអស់នេះហើយធ្វើអោយ សុវណ្ណឆៃ បិទភ្នែកបំភ្លេចមិនបាន។
នៅលើបណ្តាយគណនីហ្វេសប៊ុករបស់អ្នកនាង បានត្រឹមបង្ហោះបូខ្មៅ ដែលបញ្ជាក់ថា បេះដូងកូនៗពិតជាសោកស្តាយដែលគ្រួសារមានបញ្ហាបែបនេះ។ ឯមិត្តភក្តិសិល្បករក៏បានចូលរួមរំលែកទុក្ខ និងអោយអ្នកនាងនិងក្រុមគ្រួសារ តាំងស្មារតីរឹងមាំអោយល្អ នេះជាជីវិតសត្វលោក។
ឯតារាចម្រៀង ឈួន ស្រីម៉ៅ ដែលរស់នៅអាមេរិកក៏បានបង្ហោះសារដែរថា «ស្នាមញញឹមលោកឪពុកនិងអ្នកម្ដាយ ចំពោះកូនៗនឹងចៅៗតាំងពីលំបាក រហូតមកដល់សព្វថ្ងៃនេះ ក៏លោកទាំងពីរនៅតែរីករាយស្រលាញ់យកចិត្តទុកដាក់ជាមួយកូនៗ និងចៅៗជានិច្ច។ កូនសូមក្រាបសំពះសុំទោសរាល់កំហុសខុសឆ្គង នឹងសូមគោរពដឹងគុណលោកទាំងពីរអស់មួយជីវិតកូន។ បើគ្មានការតស៊ូអត់ធ្មត់ជន្នះរាល់ការលំបាករបស់លោកទាំងពីរទេ ក៏ពួកកូនៗគ្មានថ្ងៃនេះដែរ»។
ក្រៅពីមាន ស្រីម៉ៅ នៅអាមេរិក សុវណ្ណឆៃ ក៏មានប្អូនស្រីបន្ទាប់មួយទៀតរស់នៅទីនោះផងដែរ គឺឈួន សុវណ្ណដាលីន ដែលជាអតីតតារាចម្រៀង ហើយបានស្វាមីនៅទីនោះ ក៏បោះបង់សិល្បៈចោល។
ចែករំលែកព័តមាននេះ