ខេត្តស្ទឹងត្រែង ៖ ជាទូទៅគេតែងស្គាល់ត្រី«ប៉ាវ៉ាមុនពីរ» និងត្រី«ប៉ាសេអុី»ជាត្រីទឹកសាបមួយប្រភេទ ដែលមានតម្លៃបំផុតនៅខេត្តស្ទឹងត្រែង តែគេពុំបានចាប់អារម្មណ៍លើត្រីមួយប្រភេទទៀតដែលរស់ក្នុងជួរថ្មទឹកហូរមានតែរដូវត្រជាក់ធ្លាក់ខ្យល់នោះទេ ។ ត្រីមួយប្រភេទនោះគឺត្រី«ប៉ាកក»មិនត្រូវគេប្រទះឃើញរស់នៅតាមទឹកធម្មតាដោយគ្មានថ្មទេ ផ្ទុយទៅវិញគេអាចរកជម្រកវាឃើញនៅតាមកន្លៀតថ្ម ជួរថ្មទឹកហូរ អន្លង់ដែលមានថ្មកណ្តាលទន្លេប៉ុណ្ណោះ ។ ពួកវារស់នៅបន្តពូជតាមចន្លោះអន្លង់ជួរថ្មជញ្ជក់ស្លែស៊ីជាអាហារ ។ ត្រីមួយប្រភេទនេះគេមិនដែលប្រទះឃើញវាមានទម្ងន់លើសពីកន្លះគីឡូក្រាមទេ ដងខ្លួនរបស់វាដុះដោយស្រកាញឹកពណ៌ខៀវចាស់លាយពណ៌មាសប្រវែងត្រឹម៣០សង្ទីម៉ែត្រ ក្បាលរាងស្រួចបន្តិច វាមានឆ្អឹងសរសៃ តូចៗញឹកក្រៅពីឆ្អឹងទ្រនង់ខ្នង ។
ពួកវាមានវត្តមានលើទីផ្សារសម្រាប់រដូវត្រជាក់ធ្លាក់ខ្យល់អំឡុងខែមករា ដល់ខែមីនាប៉ុណ្ណោះ ។ អំឡុងប៉ុន្មានខែនោះអ្នកនេសាទតាមដងទន្លេ អាចដាក់មងក្រឡាតូចតាមចន្លោះជួរថ្មទឹកហូរទើបអាចចាប់ពួកវាបាន ។ នារដូវទឹកឡើងគេមិនអាចចាប់ត្រីប្រភេទនោះបានឡើយដោយសារពួកវាមិនចេញក្រៅរស់នៅឡូកឡំជាមួយពពួកត្រីដទៃទេ ។
ស្ត្រីអ្នកភូមិតាមមាត់ទន្លេអាស្រ័យផលនេសាទឈ្មោះ ផែង ញ៉ន អាយុ៣២ ឆ្នាំរស់នៅភូមិកោះស្រឡាយ ឃុំកោះស្រឡាយ ស្រុកសៀមបូក ខេត្តស្ទឹងត្រែង បានកណ្តៀតត្រីមួយកញ្ច្រែងដាក់លក់អមជាមួយបន្លែធម្មជាតិ ។ ស្ត្រីរូបនេះឱ្យដឹងថាកាលពីពេល ថ្មីៗកន្លងមកត្រីប៉ាកកមួយគីឡូ១៣.០០០រៀល។ ត្រីប្រភេទនេះមានតែក្នុងរដូវត្រជាក់ធ្លាក់ខ្យល់ទឹកស្រកប៉ុណ្ណោះ ។
ឈ្មោះត្រីប៉ាកកជាឈ្មោះឡាវដែល«ប៉ា»ប្រែថា«ត្រី» ចំណែក«កក»ប្រែថាថ្ម ដូច្នេះជនជាតិឡាវកាត់ខ្មែរគេឱ្យឈ្មោះថា«ត្រីប៉ាកក» ។ សម្រាប់ពលរដ្ឋខ្មែរនៅស្ទឹងត្រែងគេហៅត្រីថ្ម ។
ត្រីប្រភេទនេះមិនមែនទើបតែមានទេ តែវាជាប្រភេទត្រីដែលសំបូរមាននៅជួរថ្មទន្លេមេគង្គ ទន្លេសេសាន ទន្លេស្រែពក និងទន្លេសេកុងស្ទឹងត្រែង ។
មុខម្ហូបដែលគួរឱ្យឆ្ងាញ់ពិសានោះអ្នកស្ទឹងត្រែងនិយម«ស្ងោរភា»សម្រាប់ស្រងរសជាតិទឹកចេញពីសាច់ត្រី ។ ត្រីប៉ាកក សម្បូរសរសៃឆ្អឹងល្អិតក្នុងសាច់ ក្រៅពីឆ្អឹងទ្រនង់ខ្នង ដូច្នេះហើយទើបគេនិយមចូលចិត្តស្ងោរដោយរម្ងាស់យកជាតិទឹកចេញពីសាច់ត្រីដើម្បីបរិភោគ ។ អ្នកប្រហែលឆ្ងល់ថាមុខម្ហូបស្ងោរភាយ៉ាងណា? វាជាទម្លាប់តគ្នាក្នុងការចំអិនរបស់អ្នកស្ទឹងត្រែងប៉ែកឦសាន ។ ជាមុនដំបូងគេយកត្រីប៉ាកកទៅលាងសម្អាតវះពោះយកអាចម៍របស់វាចេញដោយរក្សាទុកពោះហើយយកទៅចម្អិនបំបាត់ឆ្អាប រួចបន្ថែមទឹកឱ្យពុះសព្វ ។ បន្ទាប់មកសម្រិតយកទឹកនោះដាក់កូនចានមួយអន្លើកុំឱ្យដោយកាកគឺនេះហើយគេហៅ«ទឹកភា» ។ បន្ទាប់មកទៀតគេអាចយកត្រីប៉ាកកទៅអង្កន់សាច់ឱ្យញឹក ឬមិនបាច់ក៏បាន ហើយគេអាចបំពងជាមុនក៏បាន ឬដាក់ទាំងស្រសក៏បាន ។ ជាបន្តមកគេដាំទឹកក្នុងឆ្នាំងសមល្មមឱ្យពុះ និងផ្សំឡើងដោយគ្រឿងទេស មានដូចជារំដេង គល់ស្លឹកគ្រៃ ស្លឹកក្រូចសើច ផ្លែម្ទេស ខ្ទឹមស យកទៅអាំង ឬដុត រួចដាក់ចូលទៅក្នុងឆ្នាំងទឹកក្តៅពុះរម្ងាស់លុះចេញជាតិមួយសន្ទុះធំទើបគេដាក់ត្រីប៉ាកកចូលរម្ងាស់រួមជាមួយការបង់រសជាតិស្ករ ប៊ីចេង អំបិល ទឹកត្រីតាមចំណូលចិត្ត ។ក្រោយមកទើបគេចាក់ទឹកភាដែលចម្អិនច្រោះហើយនោះចូលទៅក្នុងឆ្នាំងរម្ងាស់រហូតសាច់ត្រីឆ្អិនចេញជាតិហើយភ្លក់រសជាតិជាការស្រេច ។
រសជាតិក្រោយមុខម្ហូបនេះរម្ងាស់រួចហើយនោះពិតជាឆ្ងាញ់អស្ចារ្យប្រសិនអ្នកចូលចិត្តរសជាតិល្វីង តិចៗនោះ ៕
ចែករំលែកព័តមាននេះ