ខេត្តព្រះសីហនុ ៖ ត្រីមេពូជចំនួន៣.០០០ក្បាល ត្រូវបានមន្ត្រីរដ្ឋបាលលផលខេត្តព្រះសីហនុ យកទៅលែងនៅតាមទីកន្លែងផ្សេងៗគ្នាចំនួន២គឺទី១-ក្នុងស្រះជំរកត្រីក្នុងភូមិសាមគ្គី ឃុំសាមគ្គី និងទី២-នៅតាមទំនប់ទឹកប្រៃចំណុចប៊ុលឌែ១ ស្ថិតក្នុងភូមិអូរចំណារ ឃុំអូរឧកញ៉ាហេង ស្រុកព្រៃនប់ ។ ពិធីនេះបានប្រព្រឹត្តធ្វើកាលពីថ្ងៃទី៧ និងទី១០ កញ្ញា ដោយមានការអញ្ជើញចូលរួមពីលោកឌួង សំអាត នាយខណ្ឌរដ្ឋបាលជលផលខេត្តព្រះសីហនុ លោកគឹម អាន នាយផ្នែករដ្ឋបាលព្រៃនប់ នាយ-នាយរង សង្កាត់រដ្ឋបាលជលផល ក្រុមប្រឹក្សាឃុំ លោកមេឃុំ មេភូមិ និងប្រជាពលរដ្ឋក្នុងសហគមន៍នេសាទយ៉ាងច្រើនកុះករ ។
នៅក្នុងឱកាសនោះ លោកគឹម អាន នាយផ្នែករដ្ឋបាលជលផលព្រៃនប់ បានឱ្យដឹងថា ការលែងកូនត្រី ឬត្រីមេពូជទៅក្នុងអាងទីជំរកត្រី ក៏ដូចជាតាមទីកន្លែងនានា គឺជាគោលការណ៍ចំបង និងជាភារកិច្ចចាំបាច់របស់មន្ត្រីជលផលគ្រប់រូប ដើម្បីជំរុញទិន្នផលត្រីឱ្យកាន់តែសំបូរសំរាប់បំពេញតំរូវការជូនបងប្អូនប្រជាពលរដ្ឋ ។ ម្យ៉ាងវិញទៀត នេះជាការអនុវត្តតាមគោលការណ៍និងសេចក្តីជូនដំណឹងរបស់លោកណៅ ធួក ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលជលផល ដើម្បីជំរុញឱ្យប្រជាពលរដ្ឋទាំងអស់ ចូលរួមថែរក្សា និងអភិរក្សធនធានជលផលឱ្យមាននិរន្តរភាពសំរាប់ពេលបច្ចុប្បន្ន និងសំរាប់ទុកឱ្យក្មេងៗជំនាន់ក្រោយៗ និងជំរុញប្រជាពលរដ្ឋឱ្យមានស្មារតីយកចិត្តទុកដាក់ចូលរួមធ្វើវារីវប្បកម្ម ដើម្បីធានាឱ្យបាននូវសន្តិសុខស្បៀងរបស់ប្រជាពលរដ្ឋ ។
លោកឌួង សំអាត នាយខណ្ឌរដ្ឋបាលជលផលខេត្តព្រះសីហនុ បានឱ្យដឹងបន្ថែមថា ស្របតាមអនុសាសន៍របស់សម្តេចហ៊ុន សែន ជាប្រមុខរាជរដ្ឋាភិបាល និងអនុវត្តតាមសេចក្តីជូនដំណឹងរបស់លោកណៅ ធួក គឺឱ្យមន្ត្រីជលផលទាំងអស់បង្កើនការយកចិត្តទុកដាក់ និងជំរុញឱ្យមានការរៀបចំលែងកូនត្រី និងវារីសត្វផ្សេងៗឱ្យបានគ្រប់ផ្នែក គ្រប់សង្កាត់ទាំងអស់ ក្នុងន័យបំផុសចលនាមហាជនឱ្យចេះស្រលាញ់ថែរក្សាការពារ និងប្រើប្រាស់ធនធានជលផល ដើម្បីបង្កើនផលត្រីស្តុកក្នុងធម្មជាតិ ព្រោះបច្ចុប្បន្នពិនិត្យឃើញថា កំពស់់ទឹកគ្រប់ទីកន្លែងគ្រប់តំបន់ក្នុងសង្កាត់នេសាទមានលក្ខណៈសមស្រប នឹងដំណើរការលែងកូនត្រី និងវារីសត្វផ្សេងៗបានយ៉ាងល្អ ហើយអាចទទួលបានលទ្ធផលខ្ពស់ទុកសំរាប់បំពេញតំរូវការជូនប្រជាពលរដ្ឋ ៕
ចែករំលែកព័តមាននេះ