រាជធានីភ្នំពេញ ៖ កាលពីថ្ងៃទី៩ ខែកុម្ភៈ ឯកអគ្គរាជទូតជប៉ុនប្រចាំនៅប្រទេសកម្ពុជា បានអនុញ្ញាតិឱ្យកីឡាករ ចាន់ វឌ្ឍនាកា ចូលជួបសំណេះសំណាលមុនការចាកចេញរបស់កីឡាកររូបនេះ ទៅកាន់ប្រទេសជប៉ុនរយៈពេលមួយឆ្នាំ នៅថ្ងៃទី១២ ខែកុម្ភៈ នេះ។ ក្នុងជំនួបប្រកបដោយភាពកក់ក្ដៅនោះ ឯកអគ្គរាជទូតជប៉ុនបានស្នើសុំឱ្យ ចាន់ វឌ្ឍនាកា ប្រយ័ត្នបីចំណុច ដើម្បីឱ្យទទួលបានជោគជ័យនៅក្នុងដំណើររបស់ខ្លួន។
លោក Hidehisa Horinouchi ឯកអគ្គរាជទូតជប៉ុនប្រចាំនៅកម្ពុជា បានអះអាងថា ជាលើកទី១ ដែលកីឡាករវ័យក្មេង ចាន់ វឌ្ឍនាកា ត្រូវបានក្លិបធំមួយរបស់ប្រទេសជប៉ុន ចុះកុងត្រាយកទៅលេងជាលក្ខណៈខ្ចីជើងរយៈពេលមួយឆ្នាំ ។ លោកថា កីឡាករ ចាន់ វឌ្ឍនាកា នឹងចេញដំណើរនៅថ្ងៃទី១២ កុម្ភៈ នេះ ទើបលោកក្នុងនាមប្រជាពលរដ្ឋជប៉ុនមួយរូប សម្រេចបើកឱកាសឱ្យមានកិច្ចសំណេះសំណាល ដើម្បីជាការណែនាំផង និងប្រាប់ពីបញ្ហាខ្លះឱ្យកីឡាកររូបនេះ ប្រុងប្រយ័ត្នផង មុនទៅដល់ប្រទេសជប៉ុន។ លោកថា នៅក្នុងប្រទេសជប៉ុនមានភាពខុសគ្នាដូចជា មេឃ និងដី ជាមួយប្រទេសកម្ពុជា ជាពិសេសបញ្ហាអាកាសធាតុ ចំណីអាហារ និងរបៀបរបបរស់នៅ។
អីុចឹងហើយ ទើបលោកប្រកាសឱ្យ ចាន់ វឌ្ឍនាកា ប្រុងប្រយ័ត្ន៣ចំណុច ក្នុងពេលទៅបំពេញភារកិច្ចនៅក្នុងប្រទេសជប៉ុន។ លោកថា នៅទីក្រុងដែល ចាន់ វឌ្ឍនាកា រស់នៅមានចម្ងាយឆ្ងាយគួរសមពីទីក្រុងតូត្យូ ហើយតំបន់នោះក៏មានអាកាសធាតុត្រជាក់ណាស់ដែរ ដែលចាំបាច់ត្រូវតែកីឡាកររូបនេះធ្វើការសម្របខ្លួន។ លោកត្រូវបានភាគីជប៉ុនជួលបន្ទប់ខុនដូមួយឱ្យរស់នៅ ដោយក្នុងរយៈពេលមួយឆ្នាំរាប់ចាប់ពីតាំងពីថ្ងៃទី១២ កុម្ភៈ នោះ គឺលោកមានរថយន្តធ្វើដំណើរ និងមានការរៀបចំច្រើនយ៉ាងស្រួលមិនខ្វះខាតនោះឡើយ ។ ចាន់ វឌ្ឍនាកា ក៏មានការតាមដាននូវបញ្ហាសុខភាព ក្រោយពេលទៅរស់នៅទីនោះរយៈពេលមួយឆ្នាំផងដែរ ។ លោកថា វានឹងក្លាយជារឿងលំបាក ប្រសិនបើ ចាន់ វឌ្ឍនាកា មិនស៊ាំនឹងភាពត្រជាក់ និងរបបអាហាររបស់ប្រទេសជប៉ុន ក្នុងពេលដែលសរីរាង្គរបស់កីឡាករម្នាក់ៗ ក៏ត្រូវការការហូបចុកគ្រប់គ្រាន់។ លោកថា ចាន់ វឌ្ឍនាកា នឹងមានអ្នកបកប្រែតាមខ្លួនគ្រប់ពេលចេញប្រកួត និងហ្វឹកហាត់ ខណៈដែលលោកក៏ត្រូវទទួលការបង្ហាត់បង្រៀនពីរបៀបរបប និភាសាជប៉ុន ដែលលោកចាត់ទុកថា ឈ្មោះនេះគឺជានិស្ស័យធំមួយដែលជួយជប៉ុន និងលោកបានរួមការងារជាមួយគ្នានៅក្នុងវិស័យបាល់ទាត់។
លោកថា ចាន់ វឌ្ឍនាកា នឹងទទួលបានអត្ថប្រយោជន៍ច្រើនពីការខ្ចីជើងរយៈពេលមួយឆ្នាំនេះ ដោយលោករំពឹងថា ការប្រឹងប្រែងរបស់លោកក៏ពិតជាជួយឱ្យជនជាតិជប៉ុនទទួលស្គាល់ពីសមត្ថភាពរបស់កីឡាករកម្ពុជាផងដែរ តាមរយៈការបញ្ចេញសមត្ថភាពរយៈពេលមួយឆ្នាំរបស់ ចាន់ វឌ្ឍនាកា។ លោកស្នើឱ្យកីឡាករកម្ពុជារូបនេះប្រយ័ត្នរឿងម្ហូបអាហារ ប្រយ័ត្នរឿងអាកាសធាតុ និងប្រយ័ត្នពីរឿងសតិអារម្មណ៍ ដោយសារបញ្ហាទាំង៣ នឹងធ្វើឱ្យកីឡាកររូបនេះ ចេញប្រកួតមិនអស់ជើង ហើយមិនទទួលបានផ្លែផ្កា។ លោកថា ក្លិបជប៉ុនដែលបានខ្ចីជើង ចាន់ វឌ្ឍនាកា យកទៅប្រកួត នឹងជំរុញបំប៉នជួយឱ្យលោកក្លាយជាកីឡាករឆ្នើមម្នាក់ ប៉ុន្តែក៏ទាមទារឱ្យលោកមានការប្រឹងប្រែងឱ្យអស់ពីលទ្ធភាពនោះដែរ។
កីឡាករ ចាន់ វឌ្ឍនាកា បានអះអាងថា ឱកាសទៅលេងឱ្យក្រុម Fujieda ដែលជាក្រុមខ្លាំងមួយនៅក្នុងប្រទេសជប៉ុន លោកនឹងប្រឹងប្រែងឱ្យអស់ពីសមត្ថភាព ដើម្បីជំរុញឱ្យមានការទទួលស្គាល់កាន់តែខ្លាំងដល់វិស័យបាល់ទាត់នៅកម្ពុជា។ លោកបដិសេធទម្លាយឱ្យដឹងពីតម្លៃខ្លួន ដោយគ្រាន់តែអះអាងថា បានចំនួនច្រើនដងធៀបនឹងប្រាក់ខែនៅកម្ពុជា និងត្រូវបានភាគីជប៉ុនបើកឱ្យជាខែ ដោយមិនគិតរឿងជួលទីតាំងឱ្យស្នាក់នៅ និងរថយន្តដែលឱ្យធ្វើដំណើរ។ លោកថា កាលពីមុនលោកក៏ធា្លប់ចេញទៅប្រកួតនៅក្នុងប្រទេសជប៉ុនម្ដងដែរ ទើបលោកប្រកាសថា បញ្ហាអាកាសធាតុ និងចំណីអាហាររបស់ប្រទេសជប៉ុន មិនចោទជាបញ្ហាចំពោះខ្លួនប៉ុន្មានទេ។
លោកថា ខ្លួនចូលចិត្តអាហារជប៉ុន ក៏ឆាប់ស៊ាំនឹងអាកាសធាតុត្រជាក់ផងដែរ ដោយអះអាងថា ប្រហែលប្រើពេលមិនលើសពី២ខែនឹងអស់បញ្ហា។ លោកមិនទាន់ដឹងថា ដំណើរទៅកាន់ប្រទេសជប៉ុននៅថ្ងៃទី១២ កុម្ភៈ នេះ ឡើងយន្តហោះម៉ោងណាឱ្យច្បាស់នៅឡើយទេ ដោយគ្រាន់តែអះអាងថា រយៈពេលមួយឆ្នាំនៅក្នុងប្រទេសជប៉ុន លោកក៏នឹងចុះមកលេងឱ្យក្រុមជម្រើសជាតិនូវរាល់ការប្រកួតសំខាន់ៗផងដែរ នៅពេលការប្រកួតរបស់លោកនៅជប៉ុនមិនជាន់គ្នា ។ លោកថា ខ្លួននឹងបើកឆាកប្រកួតនៅក្នុងប្រទេសជប៉ុន នៅថ្ងៃទី១៨ កុម្ភៈ ដោយនោះគឺជាការប្រកួតមិត្តភាព។ នៅមិនទាន់ច្បាស់ថា រយៈពេលមួយឆ្នាំនៅក្នុងប្រទេសជប៉ុននឹងមានការប្រកួតប៉ុន្មានលើកនោះទេ ដោយគ្រាន់តែលោកនឹងមានការប្រកួតច្រើនហើយ បើទោះជាកិច្ចកុងត្រាបានដាក់រយៈពេលមួយឆ្នាំចាប់ពីថ្ងៃចេញដំណើរ ប៉ុន្តែលោកថា ការប្រកួតរបស់លោកនៅក្នុងប្រទេសជប៉ុននឹងអាចបញ្ចប់នៅចុងខែ១២។ លោកមានជំនឿយ៉ាងមុតមាំថា ខ្លួននឹងទទួលបានឱកាសធ្វើការនៅឆ្នាំទី២ ជាមួយនឹងភាគីជប៉ុន ខណៈដែលជប៉ុនក៏សន្យាថា នឹងជួយឱ្យលោកក្លាយជាកីឡាករឆ្នើមម្នាក់៕
ចែករំលែកព័តមាននេះ