ខេត្តប៉ៃលិន ៖ ស្គាល់គ្នារយ:ពេលខ្លី លុះជនសង្ស័យខ្ចីម៉ូតូជិះ១ភ្លែត ទៅទិញរបស់របរក្នុងផ្សារ លុះចាំបាត់ៗ មិនឃើញត្រឡប់មកវិញ ទើបដឹងថា ជាករណីរំលោភទំនុកចិត្ត ក៏ប្រញាប់ទៅដាក់ពាក្យបណ្តឹងនៅនគរបាលស្នងការខេត្តឱ្យតាមចាប់ឃាត់ខ្លួនតែម្តង…
ខេត្តប៉ៃលិន ៖ ស្គាល់គ្នារយ:ពេលខ្លី លុះជនសង្ស័យខ្ចីម៉ូតូជិះ១ភ្លែត ទៅទិញរបស់របរក្នុងផ្សារ លុះចាំបាត់ៗ មិនឃើញត្រឡប់មកវិញ ទើបដឹងថា ជាករណីរំលោភទំនុកចិត្ត ក៏ប្រញាប់ទៅដាក់ពាក្យបណ្តឹងនៅនគរបាលស្នងការខេត្តឱ្យតាមចាប់ឃាត់ខ្លួនតែម្តង ។
ហេតុការណ៍ជនសង្ស័យខ្ចីម៉ូតូកើតឡើង កាលពីវេលាម៉ោង០១រសៀលថ្ងៃទី០៤ កញ្ញា ឆ្នាំ២០២២ នៅចំណុចទូរបាញ់ត្រីកាស៊ីណូខ្លាខ្មៅ ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។ ប្រភពព័ត៌មានពីនគរបាលបានឱ្យដឹងថា ជនរងគ្រោះដើមបណ្ដឹងមានឈ្មោះ គង់ សីហា ភេទប្រុស អាយុ២៨ឆ្នាំ ជាកសិករ មានទីលំនៅក្នុងភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។ ចំណែកជនសង្ស័យមាន ឈ្មោះ ចាន់ នី អាយុ២៨ឆ្នាំ មានមុខរបរ និងទីលំនៅមិនពិតប្រាកដ ។
ប្រភពបន្តទៀតថា នៅថ្ងៃកើតហេតុ កាលពីវេលាម៉ោង៨ និង០០នាទីយប់ថ្ងៃទី០៣ ខែកញ្ញា ឆ្នាំ២០២២ ជនរងគ្រោះបានជិះម៉ូតូទៅហូបបង្អែមនៅផ្សារព្រំ ។ ក្រោយពេលហូបរួច ជិះម៉ូតូត្រឡប់ទៅផ្ទះវិញ តែទៅដល់ក្បែរមុខកន្លែងទូបាញ់ត្រីក្នុងកាស៊ីណូយីហោ «ខ្លាខ្មៅ» ស្រាប់តែជនសង្ស័យដែលទើបនឹងស្គាល់គ្នាជាមួយជនរងគ្រោះ បានស្រែកហៅឱ្យចូលក្នុងកាស៊ីណូ ។ លុះជនរងគ្រោះចូលទៅដល់ រូបគេបានសុំខ្ចីម៉ូតូទៅទិញរបស់របរបន្តិច ។
ពេលនោះ ដើមបណ្ដឹងនិយាយថា ចាំខ្លួនជូនទៅ តែជនសង្ស័យ និយាយប្រកែកថា មិនអីទេ រូបគេសុំខ្ចីតែមួយភ្លែតប៉ុណ្ណោះដោយមានការប្រញាប់ រួចនឹងត្រឡប់យកមកជូនវិញ។ ដោយចាំបាត់ៗ អស់រយ:ពេលជាយូរ មិនឃើញជនសង្ស័យត្រលប់មកវិញ ទើបដឹងថា គេយកម៉ូតូគេចខ្លួន ក៏ធ្វើដំណើរទៅផ្ទះ ដើម្បីដាក់ពាក្យបណ្តឹងតែម្តង។
រហូតដល់ថ្ងៃទី០៥ ខែកញ្ញា ឆ្នាំ២០២២ កម្លាំងប៉ុស្តិ៍នគរបាលរដ្ឋបាលស្ទឹងកាច់ បានទទួលដំណឹងពីការិយាល័យព្រហ្មទណ្ឌស្រាលថា ខាងស្នងការដ្ឋាននគរបាលខេត្តបាត់ដំបង បានឃាត់ខ្លួនជនសង្ស័យខាងលើបានហើយ ទើបចុះទៅនាំយកជនសង្ស័យ និងវត្ថុតាងម៉ូតូម៉ាកហុងដាឌ្រីម ស៊េរីឆ្នាំ២០២២ ពណ៍ខ្មៅ គ្មានស្លាកលេខ ដើម្បីរៀបចំសំនុំរឿងចាត់ការតាមនីតិវិធីច្បាប់៕
ចែករំលែកព័តមាននេះ