រាជធានីភ្នំពេញ ៖ ដើម្បីបង្កើនប្រសិទ្ធភាពនៃប្រតិបត្តិការចំណូលពន្ធ ក្រសួងសេដ្ឋកិច្ច និងហិរញ្ញវត្ថុបានសហការជាមួយបណ្ដាធនាគារនានា នៅក្នុងប្រទេសកម្ពុជា ដើម្បីធ្វើប្រតិបត្តិការប្រមូលចំណូលពន្ធតាមរយៈធនាគារជាដៃគូ ។ រហូតមកដល់ពេលបច្ចុប្បន្ន ក្រសួងសេដ្ឋកិច្ច និងហិរញ្ញវត្ថុ បានសហការជាមួយធនាគារចំនួន៦ ក្នុងការធ្វើប្រតិបតិ្តការលើការងារនេះ ក្នុងនោះ មានធនាគារ អេស៊ីលីដា ធនាគារកាណាឌីយ៉ា ធនាគារវឌ្ឍនៈ ធនាគារកម្ពុជា សាធារណៈ និងធនាគារឯកទេស វីង ដើម្បីធ្វើប្រតិបត្តិការចំណូលរបស់រាជរដ្ឋាភិបាលកម្ពុជា ។
កាលពីថ្មីៗកន្លងទៅនេះ ក្រសួងសេដ្ឋកិច្ចនិងហិរញ្ញវត្ថុ បានចុះហត្ថលេខាលើកិច្ចព្រមព្រៀងថ្មីមួយទៀតជាមួយធនាគារANZ Royal ដែលជាធនាគារដៃគូទី៦ របស់ក្រសួងសេដ្ឋកិច្ចនិងហិរញ្ញវត្ថុ ដើម្បីផ្ដល់ភាពងាយស្រួលដល់អតិថិជនរបស់ធនាគារ ANZ Royal អាចបង់ពន្ធនានាតាមរយៈធនាគារANZ Royal បាន ។
នៅក្នុងពិធីចុះហត្ថលេខាលើកិច្ចព្រមព្រៀង កាលពីចុងសប្ដាហ៍មុននេះ នៅទីស្ដីការក្រសួងសេដ្ឋកិច្ចនិងហិរញ្ញវត្ថុ លោក ជូ គឹមឡេង រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា កិច្ចព្រមព្រៀងនេះ បានបង្ហាញនូវវឌ្ឍនភាពថ្មីបន្ថែមទៀត នៃកម្មវិធីកំណែទម្រង់វិស័យរដ្ឋបាលសារពើពន្ធ ក្នុងការលើកកម្ពស់ ប្រសិទ្ធភាព នៃការប្រមូលចំណូលពន្ធ ផ្ដល់ភាពងាយស្រួល និងជម្រើសច្រើនដល់អ្នកជាប់ពន្ធក្នុងការបង់ចំណូលពន្ធដារតាមរយៈប្រព័ន្ធធនាគារ ។
លោកថ្លែងថា ៖ « ការចុះហត្ថលេខាលើអនុស្សរណៈនៃការយោគយល់គ្នារវាងក្រសួងសេដ្ឋកិច្ចនិងហិរញ្ញវត្ថុ និងធនាគារANZ Royalគឺជាការពង្រីកបន្ថែមនូវដៃគូប្រមូលចំណូលមួយបន្ថែមទៀតលើដៃគូប្រមូលចំណូលចំនួន៥ ដែលកំពុងមានស្រាប់ ដើម្បីបង្កើនប្រសិទ្ធភាព និងស័ក្ដិសិទ្ធិភាពនៃការផ្ដល់សេវាសាធារណៈជូនអ្នកជាប់ពន្ធ សំដៅធានាបាននូវការអនុវត្តកាន់តែស៊ីជម្រៅថែមទៀត នូវកំណែទម្រង់សំខាន់ៗជាអាទិ៍ ការប្រយុទ្ធប្រឆាំងនឹងអំពើពុករលួយ ដែលជាស្នូលនៃអភិបាលកិច្ចល្អ » ។
លោកស្រី Leonie Lethbridge អគ្គនាយិកាប្រតិបត្តិធនាគារ ANZ Royal បានឱ្យដឹងដែរថា ដោយមានការសហការយ៉ាងប្រសើររវាងអគ្គនាយកដ្ឋានពន្ធដារ និងធនាគារ ANZ Royal ឥឡូវនេះធនាគារអាចប្រមូលពន្ធពីអតិថិជនសាជីវកម្មក្នុងស្រុក និងអន្តរជាតិដែលមានប្រតិបត្តិការតាមតំបន់ និងក្នុងប្រទេសកម្ពុជា ។
លោកស្រីបន្តថា ៖«យើងពិតជាមាន សេចក្តីសោមនស្សក្នុងការនាំមកនូវដំណោះ ស្រាយប្រព័ន្ធធនាគារ អេឡិចត្រូនិកដែលជួយសម្រួលដល់ដំណើរការនៃការអនុលោមតាមបទប្បញ្ញត្តិបង់ពន្ធឱ្យបានទាន់ពេលវេលា ដោយមិនថាអ្នកជាប់ពន្ធស្ថិតនៅទីណាក៏ដោយ ។ អតិថិជនសាជីវកម្មរបស់យើងអាចធ្វើការបង់ពន្ធបានជាលុយរៀល ឬលុយដុល្លារតាមសាខាធនាគារ ANZ Royal និងតាមប្រព័ន្ធធនាគារអេឡិចត្រូនិក ចាប់ពីខែមេសា ឆ្នាំ២០១៧នេះតទៅ ។ ធនាគារANZ Royal នឹងបន្តការសហការជាមួយអគ្គនាយកដ្ឋានពន្ធដារ ដើម្បីពង្រឹងនូវការផ្ដល់ជូននូវដំណោះស្រាយបង់ពន្ធតាមរយៈប្រព័ន្ធធនាគារអេឡិចត្រូនិកផងដែរ » ៕
ចែករំលែកព័តមាននេះ