ដេញបា.ញ់បំបែកកង់ឡានទើបចាប់បាន ប៉ូលិសជួញដូរគ្រឿងញៀ.ន
ខេត្តស្ទឹងត្រែង ៖ កម្លាំងនគរបាល«ក៩»នៃមន្ទីរប្រឆាំងគ្រឿងញៀ.នក្រសួងមហាផ្ទៃ រួមសហការជាមួយកម្លាំងនគរបាលការិយាល័យប្រឆាំងគ្រឿងញៀ.ននៃស្នងការដ្ឋាន
ខេត្តស្ទឹងត្រែង ៖ កម្លាំងនគរបាល«ក៩»នៃមន្ទីរប្រឆាំងគ្រឿងញៀនក្រសួងមហាផ្ទៃ រួមសហការជាមួយកម្លាំងនគរបាលការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តស្ទឹងត្រែង ក្រោមការសម្របសម្រួល ពីលោក ជា ពេជ្រ ព្រះរាជអាជ្ញាសាលាដំបូងខេត្ត កាលពីវេលាម៉ោង១០និង៤៥នាទីព្រឹកថ្ងៃទី៨ កុម្ភៈ បានធ្វើការឡោមព័ទ្ធចាប់ខ្លួនម្ចាស់ផ្ទះសំណាក់សុផលដែលបានរក្សាទុក និងជួញនូវសារធាតុញៀនខុសច្បាប់នៅចំណុចស្រែសំគង់ ផ្លូវជាតិលេខ៧ ស្ថិតក្នុងភូមិស្រែពោធិ៍ សង្កាត់ស្រះឫស្សី ក្រុងស្ទឹងត្រែង ។
ប្រភពព័ត៌មានបានឱ្យដឹងថា ការចុះបង្ក្រាបករណីជួញដូរគ្រឿងញៀនខាងលើ សមត្ថកិច្ចបានដកហូតរថយន្តវីហ្គោ ពណ៌ខ្មៅ មួយគ្រឿង កាំភ្លើងខ្លីមួយដើម ព្រមទាំងគ្រឿងញៀនប្រភេទមេតំហ្វេតាមីន(WY) ចំនួន១២សុង ប្រមាណជាង២ម៉ឺនគ្រាប់ ។
នគរបាលប្រឆាំងគ្រឿងញៀនបានឱ្យដឹងថា ជនសង្ស័យដែលសមត្ថកិច្ចចាប់ខ្លួនឈ្មោះ ឯម សុផល ភេទប្រុស អាយុ៤៥ឆ្នាំ ជាមន្ត្រីនគរបាលអន្តោប្រវេសន៍ខេត្តស្ទឹងត្រែង និងជាចៅកែផ្ទះសំណាក់សុផល មានទីលំនៅភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែង។ មន្ត្រីដដែលបានបន្តឱ្យដឹងទៀតថា ជនសង្ស័យជាមន្ត្រីនគរបាលដែលកម្លាំងជំនាញចាប់ខ្លួននេះត្រូវបានគេដឹងថា ជាអ្នកជួញដូរគ្រឿងញៀនដ៏ធំម្នាក់ នៅក្នុងខេត្តស្ទឹងត្រែងមិនតិចជាង២០ឆ្នាំមកហើយនោះទេ ។ ដោយសារការស៊ើបអង្កេតស្រាវជ្រាវ របស់សមត្ថកិច្ចរកភស្តុតាងមិនទាន់បាន តែនៅថ្ងៃកើតហេតុនេះ ជនសង្ស័យបានដឹកជញ្ជូនគ្រឿងញៀនតាមរថយន្តផ្ទាល់ខ្លួន ដើម្បីទៅធ្វើការដោះដូរ ក៏ត្រូវបានកម្លាំងការិយាល័យ«ក៩» នៃមន្ទីរប្រឆាំងគ្រឿងញៀនក្រសួងមហាផ្ទៃ សហការជាមួយការិយាល័យប្រឆាំងគ្រឿងញៀនខេត្ត ស្ទាក់ចាប់នៅចំណុចខាងលើ តែជនសង្ស័យមិនព្រមឈប់ សមត្ថកិច្ចបានបាញ់បំបែកកង់ ទើបធ្វើការចាប់ខ្លួនបាន ។
លោក ម៉ៅ តារា ស្នងការនគរបាលខេត្តស្ទឹងត្រែងបានប្រាប់ឱ្យដឹងថា កម្លាំងជំនាញធ្វើការចាប់ខ្លួនជនសង្ស័យ និងបានដកហូតថ្នាំញៀនប្រភេទមេតំហ្វេតាមីន(WY) ចំនួន១២សុង ស្មើនឹង២៤.០០០គ្រាប់ បង្កប់ក្នុងកេសអាគុយ កាំភ្លើងខ្លី១ដើម ព្រមទាំងរថយន្តវីហ្គោមួយគ្រឿង ។
លោកស្នងការបន្តថា ក្រោយកម្លាំងជំនាញចាប់ខ្លួនជនសង្ស័យរួមវត្ថុតាងរួចនោះ ជំនាញបានបន្តនីតិវិធី ដោយមានការសម្របសម្រួលពីព្រះរាជអាជ្ញាអនុញ្ញាតឱ្យនាំខ្លួនជនសង្ស័យ ទៅកាន់ផ្ទះសំណាក់ធ្វើការឆែកឆេរបន្តទៀត ក្នុងនោះជំនាញបានកំណត់គោលដៅ៣កន្លែង ៖
ទី១-ផ្ទះសំណាក់សុផល ស្ថិតនៅភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែង ។
ទី២-នៅផ្ទះឪពុកម្តាយក្មេក ស្ថិតនៅផ្សារក្រុងស្ទឹងត្រែង ។
និងទី៣-ផ្ទះចំការស្ថិតនៅភូមិខាំផាន់ សង្កាត់សាមគ្គី ក្រុងស្ទឹងត្រែង ដោយគោលដៅទាំង៣ទីតាំងនោះពុំបានរកឃើញភស្តុតាងនោះទេ ។ គ្រាចុះឆែកឆេរផ្ទះសំណាក់ខាងលើ លោក ជាពេជ្រ ព្រះរាជអាជ្ញាអមសាលាដំបូងខេត្ត បានបញ្ជាឱ្យសមត្ថកិច្ចត្រួតពិនិត ទៅលើអ្នកស្នាក់នៅក្នុងផ្ទះសំណាក់ នោះចំនួន១០នាក់ មួយចំនួនជាអ្នករកស៊ីដឹកឈើតាមរថយន្តសាំយ៉ុង ធ្វើតេស្ត រកសារធាតុញៀន បើសិនរកឃើញនិងចាត់វិធានការតាមផ្លូវច្បាប់ ។
ទាក់ទិនករណីបង្ក្រាប់គ្រឿងញៀននេះ ត្រូវគេបង្ហើបថា ថ្នាំញៀនទាំងនេះជនសង្ស័យបាននាំចូលពីប្រទេសឡាវ និងបន្តជួញដូរតាមផែនការ តែទោះបីយ៉ាងណាក្តី លោក ម៉ៅ តារា ស្នងការនគរបាលខេត្តស្ទឹងត្រែង មិនទាន់បានសាកសួរព័ត៌មានលម្អិត ពីជនសង្ស័យនៅឡើយទេ ដោយសារចាប់ខ្លួនភ្លាមជំនាញបន្តនាំទៅឆែកឆេរបណ្តាទីតាំងមួយចំនួន ។ ដោយឡែកគេមិនស្វែងរកអ្នកពាក់ព័ន្ធក្នុងករណីនេះនៅឡើយដែរ ។
ប្រភពព័ត៌មានចុងក្រោយរហូតមកដល់រសៀលថ្ងៃដដែលនេះ កម្លាំងជំនាញកំពុងបន្តការសាកសួរ ជនសង្ស័យនៅការិយាល័យប្រឆាំងគ្រឿងញៀនៃស្នងការដ្ឋាននគរបាលខេត្ត ៕
ចែករំលែកព័តមាននេះ