រាជធានីភ្នំពេញ ៖ បុរសជានិស្សិតឆ្នាំទី៣នៃសាកលវិទ្យាល័យម្នាក់ ត្រូវនគរបាលប៉ុស្តិ៍ទួលសង្កែចាប់ខ្លួន កាលពីវេលាម៉ោង៨ព្រឹក ថ្ងៃទី០៨ កុម្ភៈ ស្ថិតត្រង់ចំណុចផ្ទះជួលលើផ្លូវបេតុង ក្នុងភូមិទួលសង្កែ សង្កាត់ទួលសង្កែ ខណ្ឌប្ញស្សីកែវ ក្រោយពីធ្វើសកម្មភាពចាប់រំលោភនារីម្នាក់បានសម្រេច ដែលមិត្តភក្តិស្រីម្នាក់យកមកឱ្យជួយមើល ។
យុវជនល្មោភកាមខាងលើឈ្មោះហែល ចិន អាយុ២៣ឆ្នាំ ជានិស្សិតឆ្នាំទី៣ ស្នាក់នៅផ្ទះជួលផ្លូវបេតុង ក្រុម១០ ភូមិទួលសង្កែ សង្កាត់ទួលសង្កែ ខណ្ឌប្ញស្សីកែវ និងមានស្រុកកំណើតនៅភូមិប្រាសាទ ឃុំកំប៉េង ស្រុកគិរីវង់ ខេត្តតាកែវ ។ រីឯនារីរងគ្រោះអាយុ ២២ឆ្នាំ ។
តាមសម្តីនគរបាលប៉ុស្តិ៍ទួលសង្កែឱ្យដឹងថា ការឃាត់ខ្លួនជនសង្ស័យនេះ គឺធ្វើឡើងតាមពាក្យបណ្តឹងរបស់នារីរងគ្រោះ ដោយនាងថា កាលពីថ្ងៃទី០១ កុម្ភៈ វេលាម៉ោងប្រហែល១០ព្រឹក នារីរងគ្រោះបានទូរស័ព្ទទៅមិត្តភក្តិស្រីម្នាក់ ដើម្បីឱ្យរកការងារអោយធ្វើហើយពួកគេបានណាត់ជួបគ្នា ។ ហើយមិត្តភក្តិស្រីនោះ បាននាំនារីរងគ្រោះ ឱ្យទៅស្នាក់នៅបន្ទប់ជួលជាមួយមិត្តភក្តិប្រុស (ជនសង្ស័យ ដែលក្រៅពីរៀន គឺធ្វើជាសន្តិសុខក្រុមហ៊ុនពេលយប់) ។ លុះមកដល់ថ្ងៃទី០៣ កុម្ភៈ វេលាម៉ោងប្រហែល៦ និង៣០នាទីយប់ ពេលជនសង្ស័យត្រឡប់មកពីរៀនវិញ បាននាំគ្នាហូបបាយជាមួយនារីរងគ្រោះ ។
បន្ទាប់ពីបាយរួច ជាឱកាសល្អឈ្មោះ ហែល ចិន បានបិទទ្វារបន្ទប់ដាក់គន្លឹះ ហើយចាប់នាងផ្តួល និងទះកំភ្លៀងនិងខ្ទប់មាត់នារីរងគ្រោះ ហើយធ្វើសកម្មភាពចាប់រំលោភសេពសន្ធវះរហូតបានសម្រេច ។ លុះក្រោយមក នារីរងគ្រោះបានប្រាប់បងប្រុស ហើយនាំគ្នាមកប្តឹងនគរបាល ប៉ុស្តិ៍ចុះទៅឃាត់ខ្លួនតែម្តង ។
ចែករំលែកព័តមាននេះ