បង្ក្រាបគ្រឿងញៀ.ននៅភ្នំពេញ1ខែជិត1ពាន់នាក់
រាជធានីភ្នំពេញ ៖ អាជ្ញាធររាជធានីភ្នំពេញបានឲ្យដឹងថា រយៈពេល១ខែកុម្ភៈនេះ សមត្ថកិច្ចរាជធានីប្តេជ្ញាបង្ក្រាប និងលុបបំបាត់ការជួញដូរ ចែកចាយ និងប្រើប្រាស់
រាជធានីភ្នំពេញ ៖ អាជ្ញាធររាជធានីភ្នំពេញបានឲ្យដឹងថា រយៈពេល១ខែកុម្ភៈនេះ សមត្ថកិច្ចរាជធានីប្តេជ្ញាបង្ក្រាប និងលុបបំបាត់ការជួញដូរ ចែកចាយ និងប្រើប្រាស់គ្រឿងញៀននៅតំបន់ត្រពាំងឈូកឲ្យអស់ និងមានទិសដៅបន្តទៅបោសសំអាតនៅតំបន់ប៊ូលឌិញ ទួលសង្កែបុរីកីឡា តំបន់ជ្រោយចង្វា និងតំបន់ស្មុគស្មាញមួយចំនួនទៀត សម្រាប់ជំហានបន្តទៀត ។
លោក ឃួង ស្រេង អភិបាលរងរាជធានីភ្នំពេញបានឲ្យដឹងថា ក្រោយផែនការដាក់ចុះយ៉ាងម៉ឺងម៉ាត់របស់សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ រដ្ឋបាលរាជធានីភ្នំពេញបានបើកយុទ្ធនាការបង្ក្រាបករណីគ្រឿងញៀនដោយគិតចាប់ពីថ្ងៃទី១ដល់ថ្ងៃទី៣១ មករា បង្ក្រាបគ្រឿងញៀនបានចំនួន២៨៧ករណី ឃាត់ខ្លួនជនសង្ស័យបានចំនួន៧២៩នាក់ (ស្រី១០១នាក់) ។
លោកបន្តថា ដោយឡែកសម្រាប់រយៈពេល៥ថ្ងៃគិតចាប់ពីថ្ងៃទី១ដល់ថ្ងៃទី៥ កុម្ភៈ សមត្ថកិច្ចបង្ក្រាបបាន៦០ករណី ក្នុងនោះឃាត់ខ្លួនជនសង្ស័យបានចំនួន១៣៩នាក់ (ស្រី១៧នាក់) ។ លោក ឃួង ស្រេង អភិបាលរងរាជធានីភ្នំពេញមានប្រសាសន៍បែបនេះនៅក្នុងកិច្ចប្រជុំគណៈបញ្ជាការឯកភាពរាជធានីភ្នំពេញនារសៀលថ្ងៃទី៦ កុម្ភៈ ស្ថិតក្រោមវត្តមានលោក ប៉ា សុជាតិវង្ស អភិបាលរាជធានី និងមន្ត្រីពាក់ព័ន្ធជាច្រើនរូបទៀត ។
កិច្ចប្រជុំគណៈបញ្ជាការឯកភាពរាជធានីភ្នំពេញ បានផ្តោតលើការដាក់ផែនការបង្ក្រាបគ្រឿងញៀននៅតាមមូលដ្ឋានទាំងអស់ឲ្យបានខ្លាំងក្លាក្នុងខណ្ឌទាំង១២ បន្ទាប់ពីមានការដាក់បទបញ្ជាយ៉ាងម៉ឺនម៉ាត់ប្រកបដោយការប្ដេជ្ញាចិត្តខ្ពស់របស់សម្ដេចក្រឡាហោម ស ខេង ប្រធានយុទ្ធនាការប្រយុទ្ធប្រឆាំងគ្រឿងញៀន ។
លោក ឃួង ស្រេង បានឲ្យដឹងទៀតថា គណៈបញ្ជាការឯកភាពរាជធានីស្នើឲ្យគណៈកម្មាធិការត្រួតពិនិត្យគ្រឿងញៀនខណ្ឌទាំង១២អនុវត្តការងារប្រយុទ្ធប្រឆាំងគ្រឿងញៀនឲ្យបានព្រមៗគ្នានៅក្នុងយុទ្ធនាការនេះ ក្នុងនោះត្រូវកំណត់ទីតាំងដែលមានការចែកចាយ ជួញដូរ និងប្រើប្រាស់គ្រឿងញៀនឲ្យបានច្បាស់លាស់ និងត្រូវបន្តកិច្ចសហការស្រាវជ្រាវមុខសញ្ញាថ្មីដែលកំពុងធ្វើសកម្មភាពដើម្បីបង្ក្រាប ។
លោក បន្តថា អាជ្ញាធរត្រូវបន្តផ្សព្វផ្សាយអប់រំដល់គោលដៅងាយរងគ្រោះ និងមានវិធានការរដ្ឋបាលចំពោះទីតាំងប្រកបអាជីវកម្មណាដែលមិនសហការ និងត្រូវបង្កើនផែនការ បង្កើនកម្លាំង និងកសាងបណ្តាញឲ្យបានគ្រប់គ្រាន់ដើម្បីចុះតាមដាន និងក្តាប់សភាពការណ៍ពិសេសតំបន់កម្សាន្ត និងកន្លែងស្មុគស្មាញផងដែរ ។
គួរបញ្ជាក់ថា នៅក្នុងកិច្ចប្រជុំបូកសរុបលទ្ធផលនៃយុទ្ធនាការបង្ក្រាបគ្រឿងញៀនលើកទី១ប្រចាំខែមករា ២០១៧ និងផ្សព្វផ្សាយសេចក្ដីសម្រេចរបស់រាជរដ្ឋាភិបាលស្ដីពីការបង្កើតគណៈកម្មការចម្រុះប្រយុទ្ធប្រឆាំងគ្រឿងញៀនកាលពីថ្ងៃទី២ កុម្ភៈ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានបញ្ជាចំៗឲ្យអាជ្ញាធររាជធានីភ្នំពេញបំបែកសម្បុកគ្រឿងញៀននៅបឹងឈូកឲ្យបានក្នុងរយៈពេល១ខែកុម្ភៈនេះ ។
សូមរំលឹកដែរថា តំបន់បឹងឈូក ខណ្ឌសែនសុខ គឺជាទីតាំងដែលមានភាពល្បីល្បាញ ដែលសម្បូរទៅដោយការជួញដូរ និងប្រើប្រាស់គ្រឿងញៀនខ្លាំងក្លាដែលធ្វើឲ្យប្រជាពលរដ្ឋមានការព្រួយបារម្ភហើយកន្លងមកតំបន់មួយនេះទោះជាមានការចុះបង្ក្រាបពីអាជ្ញាធរ និងសមត្ថកិច្ចជាបន្តបន្ទាប់ក៏ដោយគឺនៅតែមានដដែលហាក់ដូចជាមិនទាន់មានប្រសិទ្ធភាពសោះ ៕
ចែករំលែកព័តមាននេះ