រាជធានីភ្នំពេញ ៖ កម្មវិធីប្រកួតប្រដាល់ដែលមានឈ្មោះថា «សមរភូមិអ្នកប្រយុទ្ធ» ក្នុងប្រភេទទម្ងន់៥៧គីឡូក្រាម នៅលើសង្វៀនទូរទស្សន៍ភីអិនអិន ថ្ងៃអាទិត្យ ទី១២ កុម្ភៈ ខាងមុខនេះ ឈានចូលដល់វគ្គជម្រុះជុំទី២ ហើយ ។
រាជធានីភ្នំពេញ ៖ កម្មវិធីប្រកួតប្រដាល់ដែលមានឈ្មោះថា «សមរភូមិអ្នកប្រយុទ្ធ» ក្នុងប្រភេទទម្ងន់៥៧គីឡូក្រាម នៅលើសង្វៀនទូរទស្សន៍ភីអិនអិន ថ្ងៃអាទិត្យ ទី១២ កុម្ភៈ ខាងមុខនេះ ឈានចូលដល់វគ្គជម្រុះជុំទី២ ហើយ ។
ពេជ្រ ម្ទេសខ្មាំង មកពីក្លិបអរុណរះកីឡា ដល់ពេលត្រូវជួបប្រកួតជាមួយកីឡាករថៃឈ្មោះ កាំ ឡៃយោគ ដែលសុទ្ធតែមានពិន្ទុខ្ពស់ដូចគ្នា ។ នៅក្នុងពូលកម្ពុជាមានតែពេជ្រ ម្ទេសខ្មាំង ម្នាក់គត់ ដែលមានពិន្ទុច្រើនជាងគេ ព្រោះប្រកួត២លើកកន្លងមកនេះ ឈ្នះទាំង២លើក មាន៦ពិន្ទុដូចកីឡាករ កាំ ឡៃយោគ នៅក្នុងពូលថៃដែរ ។ ប៉ុន្តែ ពេជ្រ ម្ទេសខ្មាំង មានតែមជាងត្រង់ថា បើសិនជាលើកនេះចាញ់ក៏នៅតែអាចឈានឡើងទៅប្រកួតនៅវគ្គបន្តទៀតបានដែរ ដោយសារតែនៅក្នុងពូលកម្ពុជា កីឡាករ៣រូបទៀតអត់ទាន់មានអ្នកណាឈ្នះទាល់តែសោះ ។ ចំណែកក្នុងពូលថៃវិញ កាំ ឡៃយោគ គឺជាគូប្រជែងជាមួយ ផេត ងិនថង ដោយសារតែពេលនេះពួកគេទាំង២នាក់ មាន៦ពិន្ទុដូចគ្នា ។ គូនេះទើបតែជួបគ្នាជាលើកទី១ប៉ុណ្ណោះ ដូច្នេះសូម្បីតែ ពេជ្រ ម្ទេសខ្មាំង ដែលធ្លាប់សន្យាពីមុនមកថា មិនខ្លាចអ្នកណានោះ ក៏មិនទាន់ប្រាកដថា អាចយកឈ្នះការប្រកួតលើកនេះ បានដែរ ទោះបីប្រកួត២លើកកន្លងមក សុទ្ធតែផ្ដួលគូប្រកួតឱ្យសន្លប់នៅមុនស្នូរជួងបញ្ចប់ទឹកទី៥ក្ដី ។
សម្រាប់អ្នកគាំទ្រភាគច្រើនសុទ្ធតែមានជំនឿចិត្តទៅលើ ពេជ្រ ម្ទេសខ្មាំង ថា ពិតជាយកឈ្នះការប្រកួតលើកនេះទៀតមិនខាន ។
នៅក្នុងសប្ដាហ៍នេះ គូប្រកួតដណ្ដើមខ្សែក្រវាត់មានតែមួយគូប៉ុណ្ណោះ ក្រៅពីនេះនៅមានគូប្រកួតជាលក្ខណៈមិត្តភាពអន្តរជាតិកម្ពុជា-ថៃរវាងកីឡាករ ម៉ន រដ្ឋា មកពីក្លិបការិយាល័យទី៥ កងទ័ពជើងគោក ប្រកួតជាមួយកីឡាករថៃឈ្មោះ ភេត ងិនថង ។ តាមពិត ផេត ងិនថង ត្រូវជួបប្រកួតជាមួយ ព្រឿង សុជាតិ មកពីក្លិបកងពលធំអន្តរាគមន៍លេខ២ ប៉ុន្តែដោយសារកីឡាករកម្ពុជារូបនេះ មានរបួសដៃខាងឆ្វេងមិនអាចប្រកួតបាន ទើបដាក់ ម៉ន រដ្ឋា ឱ្យប្រកួតជំនួសតែម្ដង ។ ប៉ុន្តែការប្រកួតនេះ បើ ផេត ងិនថង ចាញ់ ក៏មិនមែនជារឿងល្អប៉ុន្មានដែរ ព្រោះពាក់ព័ន្ធនឹងក្រេឌីតរបស់ខ្លួន ។
ចំណែកគូប្រកួតមិត្តភាពធម្មតាវិញ មានកីឡាករ សេន កុសល មកពីក្លិបមោងឬស្សីមរតកគុនខ្មែរ ប្រកួតជាមួយកីឡាករ ផាន់ ផាត់យុទ្ធ មកពីក្លិបសាលវ័ន្តកីឡា និងកីឡាករ ណក់ ស៊ីនួន មកពីក្លិបឃ្លាំងមឿងកីឡា ប្រកួតជាមួយកីឡាករ ចៅ រស់ មកពីក្លិបសុភានូមានជ័យ ៕
ចែករំលែកព័តមាននេះ