ឆាកប្រយុទ្ធស៊ីសាច់ហុតឈាម ! ភ្ញៀវរត់ប្រសាចពេញរោងការ
ខេត្តកណ្តាល ៖ ឆាកប្រយុទ្ធដ៏ស៊ីសាច់ហុតឈាមរវាងភ្ញៀវខាងកូនកំលោះនិងភ្ញៀងខាងកូនក្រមុំនៅក្នុងពិធីមង្គលការមួយបណ្ដាលឲ្យភ្ញៀវដែលមកចូលរួមរត់ប្រសាច …
ខេត្តកណ្តាល ៖ ឆាកប្រយុទ្ធដ៏ស៊ីសាច់ហុតឈាមរវាងភ្ញៀវខាងកូនកំលោះនិងភ្ញៀងខាងកូនក្រមុំនៅក្នុងពិធីមង្គលការមួយបណ្ដាលឲ្យភ្ញៀវដែលមកចូលរួមរត់ប្រសាចកាលពីវេលាម៉ោង៩ និង១០នាទីយប់ ថ្ងៃទី៥ ខែកុម្ភៈ ឆ្នាំ២០១៧ នៅភូមិអំពិលទឹក ឃុំកំពង់ភ្នំ ស្រុកលើកដែក ខេត្តកណ្តាល ។
ប្រភពពីភ្ញៀវដែលទៅចូលរួមពិធីមង្គលការខាងលើសុំមិនបញ្ចេញឈ្មោះបានឲ្យដឹងថា មុនពេលកើតហេតុគេឃើញភ្ញៀវកិត្តិយសចូលរួមពិសារអាហារយ៉ាងច្រើនកុះករ លុះយប់បន្តិចពិធីរាំលេងកម្សាន្តក៏ចាប់ផ្ដើមយ៉ាងសប្បាយរីករាយ ។ ខណៈកំពុងរាំលេងយ៉ាងសប្បាយរីករាយហុយដីទ្រលោមនោះ ភ្ញៀវខាងកូនកំលោះនិងភ្ញៀវខាងកូនក្រមុំបានរាំប៉ះគ្នាបណ្ដាលឲ្យផ្ទុះជម្លោះគ្នាមួយប្រាវតែត្រូវម្ចាស់ដើមការសម្របសម្រួលស្ងប់ស្ងាត់វិញ ។
ប្រភពបន្តថា ប្រហែល២០នាទីក្រោយ ស្រាប់តែភ្ញៀវខាងកូនកំលោះដើរទៅសួរភ្ញៀវខាងកូនក្រមុំថា ពួកហ្អែងអាណាគប់ផ្លែស្រកានាគ និងដបទឹកសុទ្ធទៅតុអញ ពេលនោះភ្ញៀវខាងកូនក្រមុំប្រាប់ថា សូមទោសបងពួកខ្ញុំអត់បានដឹងទេ ស្រាប់តែភ្ញៀវខាងកូនកំលោះម្នាក់ទៀតស្ទុះមកនិយាយថា អញមិនទទួលទោសពួកអ្ហែងទេ គឺអញចង់វ៉ៃពួកអ្ហែង ។ ខណៈនោះដោយសារភាគីទាំងសងខាងពោរពេញដោយអំណាចស្រាក្នុងខ្លួនផង ដោយភាគីខាងភ្ញៀវកូនកំលោះមានគ្នាជាង១០នាក់ ឯភាគីភ្ញៀវខាងកូនក្រមុំមានគ្នាជិត២០នាក់បានផ្ទុះហិង្សាយកកែវ ចានដេញវាយ និងគប់គ្នាទៅវិញទៅមក ធ្វើឲ្យភ្ញៀវដែលកំពុងរាំលេងយ៉ាងសប្បាយនោះរត់ប្រសាចពេញរោងការ ទោះបីជានគរបាលប៉ុស្តិ៍៣-៤នាក់ចូលអន្តរាគមន៍ក៏ដោយ ។
ប្រភពបន្តទៀតថា ដោយសារអន្តរាគមន៍មិនបាននគរបាលប៉ុស្តិ៍បានសុំជំនួយពីលោកអធិការ ហើយលោកអធិការបញ្ជាឲ្យកម្លាំងព្រហ្មទណ្ឌចុះមកជួយអន្តរាគមន៍ និងបាញ់គំរាមឡើងលើ៤-៥គ្រាប់ទើបភាគីទាំងសងខាងរត់បែកហ្វូងគ្នា ។
លោក រស់ ចាន់ថា អធិការនគរបាលស្រុក បានឲ្យដឹងថា ករណីនេះគឺម្ចាស់ដើមការគេអត់ប្តឹងទេ នៅតែភាគីបង្កទាំងសងខាងដែលមានរបួសស្នាមបន្ដិចបន្តួចដូចគ្នា លោកបានឲ្យជំនាញព្រហ្មទណ្ឌចុះធ្វើរបាយការណ៍រយៈពេល២ថ្ងៃហើយ ។
លោក ស៊ឹម សារិន អធិការរង ទទួលផែនព្រហ្មទណ្ឌស្រុកលើកដែក បានឲ្យដឹងដែរថា ជម្លោះនេះវាមានទៅមានមក ហើយបង្កឲ្យរងរបួសបែកក្បាលបែកម៉ាត់ និងដងខ្លួនទាំងសងខាង ដោយភ្ញៀវខាងកូនកំលោះរងរបួស៤នាក់ ភ្ញៀវខាងកូនក្រមុំរបួស៣នាក់ ហើយឥឡូវពាក្យបណ្តឹងមកដល់ដៃលោកទាំងសងខាង និងកំពុងហៅមកសាកសួរម្នាក់ម្តង តើភាគីទាំងពីរសម្របសម្រួលដោះស្រាយគ្នាយ៉ាងណា នៅមិនទាន់ដឹងទេ តែបើចាប់គឺត្រូវតែចាប់ទាំងសងខាង មិនអាចចាប់តែម្ខាងបានទេ ។
ទោះជាយ៉ាងណា លោកអធិការរងមិនបានប្រាប់ពីឈ្មោះក្រុមជនបង្កទាំងសងខាងដែលរងរបួស និងអ្នកមកដាក់ពាក្យបណ្តឹងនោះទេ ដោយប្រាប់ថា ទាល់តែមានបទបញ្ជាពីមេទើបហ៊ានបញ្ចេញឯកសារ ឬរូបភាពឲ្យទៅអ្នកសារព័ត៌មានព្រោះខ្លាចត្រូវមាត់មេ ៕
ចែករំលែកព័តមាននេះ