សហរដ្ឋអាមេរិក ៖ លោកប្រធានាធិបតី Barack Obama ជាអ្នកជំរុញដល់ការលក់កាំភ្លើងច្រើនជាងគេក្នុងសហរដ្ឋអាមេរិក បើលោកត្រូវបានជំនួសដោយលោកស្រី Hillary Clinton ។ ការលក់កាំភ្លើងបានកើនឡើងយ៉ាងខ្លាំង ព្រោះតែអ្នកមានកាំភ្លើងភ័យព្រួយថា រដ្ឋាភិបាលនឹងមានច្បាប់កាន់តែតឹងរ៉ឹង ដែលអាចធ្វើឲ្យពួកគេពិបាកទិញ ។
ប៉ុន្តែខណៈមានលោកប្រធានាធិបតីមកពីគណបក្សសាធារណរដ្ឋមួយរូបឡើងកាន់តំណែង អ្នកខាងលើមិនគិតបែបនេះទៀតឡើយ ។ ការលក់កាំភ្លើង និងគ្រាប់កាំភ្លើង គឺកំពុងតែធ្លាក់ចុះ ព្រមជាមួយភាគហ៊ុនរបស់ក្រុមហ៊ុនផលិតកាំភ្លើងផងដែរ ។
តាំងពីថ្ងៃបោះឆ្នោតមក ក្រុមហ៊ុនផលិតកាំភ្លើងដែលធ្វើពាណិជ្ជកម្មសាធារណៈ Sturm Ruger និង American Outdoor Brand បានជួបប្រទះនឹងការធ្លាក់ចុះនៃតម្លៃភាគហ៊ុនដល់ទៅ២០%ឯណោះ ។
ការត្រួតពិនិត្យព័ត៌មានផ្ទាល់ខ្លួន ដែលធ្វើឡើងដោយ FBI សម្រាប់ការទិញកាំភ្លើងភាគច្រើនបានធ្លាក់ចុះ២០%ក្នុងខែមករា បើធៀបនឹងឆ្នាំមុន ។ វាក៏បានធ្លាក់ចុះ១៦%ផងដែរកាលពីខែធ្នូ ។ រីឯការលក់គ្រាប់កាំភ្លើង ក៏កំពុងធ្លាក់ចុះដូចគ្នា ។
តម្រូវការមានភាពរឹងមាំយ៉ាងខ្លាំងក្នុងប៉ុន្មានឆ្នាំថ្មីៗនេះ ដែលធ្វើឲ្យក្រុមហ៊ុនមិនអាចផលិតទាន់ ប៉ុន្តែក្រុមហ៊ុន Olin ជាម្ចាស់របស់ Winchester Ammunition បានរាយការណ៍កាលពីថ្ងៃពុធថា ការលក់គ្រាប់កាំភ្លើងរបស់ខ្លួនបានធ្លាក់ចុះ២០%ក្នុងត្រីមាសទី៤ឆ្នាំមុន បើធៀបនឹងត្រីមាសទី៣ ។
យោងតាមការិយាល័យគ្រឿងស្រវឹង ថ្នាំជក់ កាំភ្លើង និងគ្រាប់ផ្ទុះឲ្យដឹងថា ផលិតកម្មកាំភ្លើងបានកើនឡើងច្រើនជាងទ្វេដងទៅទៀតពេលលោក Obama កាន់តំណែង ។ ជាក់ស្តែង FBI បានត្រួតពិនិត្យព័ត៌មានផ្ទាល់ខ្លួនមនុស្សច្រើនជាង២៧លាននាក់ក្នុងឆ្នាំ២០១៦ ។
ក្រុមហ៊ុនផលិតកាំភ្លើង Vista Outdoor និង Sig Sauer បានចាប់ផ្តើមផលិតគ្រាប់កាំភ្លើង ដោយសារតម្រូវការកើនឡើងកាលពីឆ្នាំមុន។ បើទោះជាការលក់គ្រាប់កាំភ្លើងកំពុងអន់ថយក្តី វាជាផលិតផលដែលអាចប្រើអស់ និងត្រូវការទិញបំពេញឡើងវិញ ។
ចំណែកកាំភ្លើងអាចមានអាយុកាលជាច្រើនឆ្នាំ ឬជំនាន់ ។ ដូច្នេះហើយក្រុមហ៊ុនផលិតកាំភ្លើង និងអ្នកលក់ត្រូវពឹងផ្អែកលើអ្នកដើរប្រមូលកាំភ្លើង ដោយទិញកាំភ្លើងច្រើនជាង១ដើម និងអតិថិជនទិញកាំភ្លើងដំបូង ។
លោក Louis Frutuoso ម្ចាស់ក្រុមហ៊ុនផលិតកាំភ្លើង Standard Manufacturing និយាយថា ៖ « ស្ថានភាពកាំភ្លើងបានផ្លាស់ប្តូរយ៉ាងខ្លាំងក្លា ។ ក្រុមហ៊ុនផលិតសង្ឃឹមថា លោកស្រី Hillary នឹងឡើងកាន់តំណែង ទើបពួកគេផលិតកាំភ្លើងជាច្រើន ប៉ុន្តែលោកប្រធានាធិបតី Trump បានឈ្នះការបោះឆ្នោតទៅវិញ ហើយពេលនេះប្រជាជនគ្មានគំនិតចង់ទិញកាំភ្លើងទេ ព្រោះរដ្ឋាភិបាលគាំទ្រការប្រើប្រាស់កាំភ្លើង » ៕
ចែករំលែកព័តមាននេះ