AFP កាលពីពេល ថ្មីៗកន្លងមកផ្សាយថា អេមីរ៉ាតអារ៉ាប់រួម បានប្រកាសអាសន្នពីការធ្លាក់ព្រិល ក្រោយពីមានព្យុះ និងខ្យល់បោកបក់ខ្លាំងគ្របដណ្ដប់នៅតាមតំបន់មួយចំនួន។ អាជ្ញាធរឱ្យដឹងថា មានអ្នករងរបួសម្នាក់ និងរថយន្ដ៣គ្រឿងខូចខាត ។
ព្យុះដែលបោកបក់នេះតម្រូវឱ្យលុបចោលការប្រណាំងកង់ផ្លូវឆ្ងាយ«Tour Of Dubai» ក្នុងដំណាក់កាលដំបូង កាលពីថ្ងៃទី៣ ខែកុម្ភៈ ឆ្នាំ២០១៧ ដោយសារកម្លាំងខ្យល់បោកបក់អាចបង្កគ្រោះថ្នាក់ដល់អ្នកជិះកង់ ។
គណៈកម្មការរៀបចំការប្រកួតឱ្យដឹងថា ដំណាក់កាលបន្ទាប់ដែលបានប្រព្រឹត្ដកាលពីថ្ងៃទី៤ ខែកុម្ភៈ ឆ្នាំ២០១៧ បានដំណើរការជាធម្មតា ។
ក្រៅពីសមុទ្ររលកធំ និងខ្យល់បោកបក់ក្នុងល្បឿនលឿនពី៧៥ទៅ៨០គីឡូម៉ែត្រក្នុងមួយម៉ោងនៅទូទាំងប្រទេសអេមីរ៉ាតអារ៉ាប់រួមនោះ នៅមានធ្លាក់ព្រឹលដែលមិនធ្លាប់កើតញឹកញាប់នៅតំបន់ភ្នំ«Jebel Jais» ក្នុងរដ្ឋ «រ៉ាស់ អាល់ ខាយម៉ា» (Ras Al Khaimah) ខណៈពេលផ្នែកឧតុនិយមបញ្ជាក់ថា មានព្រឹលធ្លាក់ក្នុងកម្ពស់១០សង្ទីម៉ែត្រ នៅតំបន់មួយចំនួននៅលើភ្នំដែលមានកម្ពស់ប្រហែល២.០០០ម៉ែត្រ ។
ប្រភពដដែលបន្ដទៀតថា ក្នុងសម្ពាធសីតុណ្ហភាពទាបជាង២អង្សាសេ(-2OC) រួមទាំងព្រឹល ប្រទះឃើញពលរដ្ឋអេមីរ៉ាតអារ៉ាប់រួមជាច្រើននាក់ មានអាការភ័យខ្លាច ដោយអ្នកខ្លះបានប្រើទូរស័ព្ទថតយករូបភាព និងបង្ហោះតាមហ្វេសប៊ុក របស់ខ្លួនគួរឱ្យគយគន់ ៕
ចែករំលែកព័តមាននេះ