ការធ្វើអាជីវកម្មត្រូវតែមានផែនការយុទ្ធសាស្ត្រ ក្នុងការវាយលុកទីផ្សារគោលដៅដើម្បីទទួលជោគជ័យ ។ ចំពោះអាជីវកម្មដែលជ្រៀតចូលទីផ្សារក្រោយគេ មិនមែនជារឿងងាយស្រួលឡើយក្នុងការទទួលបានចំណែកទីផ្សារ តែក៏ជារឿងងាយស្រួលបំផុត ប្រសិនបើក្រុមហ៊ុនវិនិយោគទាំងនោះមានប្រវត្តិកេរ្ដិ៍ឈ្មោះល្បីល្បាញ តាមរយៈអតិថិជនបានផ្ដល់ទំនុកចិត្តទៅលើគុណភាពនៃផលិតផល ការបម្រើសេវាកម្ម និងការចូលរួមសកម្មភាពដើម្បីអភិវឌ្ឍន៍ប្រទេសជាតិផ្សេងៗ ។
ងាកមកមើលទីផ្សាររថយន្ដIsuzuនៅកម្ពុជាវិញ ទើបតែនាំចូលជាផ្លូវការកាលពីពាក់កណ្ដាលឆ្នាំ២០១៦ទេ តែការលក់មានកំណើនគួរឲ្យកត់សម្គាល់ បើធៀបនឹងឆ្នាំកន្លងទៅ ព្រមទាំងរំពឹងថា ក្នុងឆ្នាំ២០១៧នេះ នឹងជំរុញការលក់ឲ្យមានកំណើនទ្វេដងថែមទៀត ដោយផ្អែកលើកំណើនសេដ្ឋកិច្ចរឹងមាំក្នុងរង្វង់៧%ជារៀងរាល់ឆ្នាំរបស់កម្ពុជា ។ ទន្ទឹមនឹងនេះ ក្រុមហ៊ុនក៏មានមហិច្ឆតាចង់បង្កើតរោងចក្រដំឡើងរថយន្ដនៅកម្ពុជាផងដែរ ។ ដូច្នេះ តើក្រុមហ៊ុនផ្អែកលើយុទ្ធសាស្ត្រ អ្វីដើម្បីជាគ្រឹះឈរជើងក្នុងទីផ្សាររថយន្ដនៅកម្ពុជា ខណៈដែលក្រុមហ៊ុនរថយន្ដល្បីៗលើពិភពលោកជាច្រើន ក៏មានវត្តមាននៅក្នុងប្រទេសតូចមួយនេះផងដែរ ។ តើក្រុមហ៊ុនមានយុទ្ធសាស្ត្របែបណាដើម្បីយកឈ្នះចិត្តអតិថិជនឲ្យងាកមកប្រើប្រាស់រថយន្ដរបស់ខ្លួន បើរថយន្ដមួយទឹកក្នុងមួយឆ្នាំៗនាំចូលរាប់ម៉ឺនគ្រឿងបែបនេះ ?
តាមរយៈការធ្វើបទបង្ហាញ ក៏ដូចជាផ្ដល់បទសម្ភាសន៍នានាពីគណៈគ្រប់គ្រងក្រុមហ៊ុនទ្រី ផេដ អីុស៊ូហ្សុ សេល ដែលមានមូលដ្ឋាននៅប្រទេសថៃ និងការអង្កេតមើលសកម្ម ភាពបម្រើសេវាកម្មក្រោយការលក់, ការសាកល្បងពីគុណភាព និងអានុភាពនៃរថយន្ដIsuzu, ការចុះពិនិត្យរោងចក្រផលិត និងខ្សែសង្វាក់ដំឡើងរថយន្ដ ព្រមទាំងបាន ឃើញ តួលេខអ្នកកក់រថយន្ដដោយផ្ទាល់ គឺជាភស្ដុតាងសបញ្ជាក់ថា រថយន្ដIsuzu ពិតជាស័ក្ដិសមទទួលបានជោគជ័យខ្លាំងលើចំណែកទីផ្សាររថយន្ដនៅប្រទេសថៃ ដូចអ្វីដែលបានលើកឡើងជារឿយៗយ៉ាងពិតប្រាកដ ។ ជាមួយគ្នានេះ តាមរយៈ«ទី»ទាំង៤ខាងក្រោម លោកអ្នកពិតជាអាចវាយតម្លៃដោយខ្លួនឯងបាន ។
១-ទីផ្សាររថយន្ដនៅប្រទេសថៃ
តាមតួលេខក្នុងបទបង្ហាញដោយលោកស្រី Panatda Chennavasin អនុប្រធានប្រតិបត្តិក្រុមហ៊ុន ទ្រី ផេដ អីុស៊ូហ្ស៊ុ សេល បានឲ្យដឹងថា រថយន្ដជប៉ុនបានគ្របដណ្ដប់លើទីផ្សារក្នុងប្រទេសថៃស្ទើរតែ១០០% ចាប់ពីឆ្នាំ១៩៨៥មក ក្នុងនោះនៅឆ្នាំ២០១៦ រថយន្ដប្រភេទភីកអាប់មានចំណែកទីផ្សារខ្ពស់ជាងគេរហូតដល់៧៥,៨% ស្របពេលដែលរថយន្ដប្រើប្រេងម៉ាស៊ូតបានវាយលុករហូតដល់៩៩,៣%។ ចំណែករថយន្ដភីកអាប់របស់Isuzu ត្រូវបាននាំចេញទៅទីផ្សារជុំវិញពិភពលោកច្រើនជាងគេ និងជាប់ចំណាត់ថ្នាក់លេខ១ក្នុងឆ្នាំ២០០២ ។
២-ទីតាំងផលិតរថយន្ដ Isuzu
«អីុស៊ូហ្ស៊ុហ្គេតវ៉េយ៍» ជាមូលដ្ឋានផលិតរថយន្ដមួយក្នុងចំណោមមូលដ្ឋានចំនួន៣ ក្រោមទុនវិនិយោគទឹកប្រាក់៦.៥០០លានបាត ក្នុងតំបន់ឧស្សាហកម្មហ្គេតវ៉េយ៍ស៊ីធី ក្នុងខេត្តឆាក់ឆឺងសៅ ដែលមានផ្ទៃដីទំហំ៦០ម៉ឺនម៉ែត្រក្រឡា ព្រមទាំងមានបទដ្ឋានផលិតទាន់សម័យ និងសម្បូរបែប ធ្វើឲ្យអីុស៊ូហ្ស៊ុអាចបន្ថែមសក្ដានុពលក្នុងការផលិតរថយន្តភីកអាប់សរុបចំនួន ៤០ម៉ឺនគ្រឿងក្នុង១ឆ្នាំ និងផលិតរថយន្តដឹកទំនិញខ្នាតមធ្យម និងខ្នាតធំបានសរុបចំនួន៣០ម៉ឺនគ្រឿងក្នុង១ឆ្នាំ សម្រាប់ផ្គត់ផ្គង់ដល់អតិថិជនទូទាំងប្រទេសថៃ និងនៅក្រៅប្រទេស ។
ចំណែកការដំឡើងតួរថយន្តដោយប្រើប្រាស់មនុស្សយន្តទាន់សម័យបំផុតនៅក្នុងការផ្គុំបំណែកផ្សេងៗនៃតួរថយន្ត និងបច្ចេកវិទ្យាដំឡើងខ្ពស់បំផុត បានធ្វើឲ្យតួរថយន្តមានលក្ខណៈជាប់ធន់បានយូរអង្វែង ។ ដើម្បីឱ្យរថយន្តអីុស៊ូហ្ស៊ុមានគុណភាពល្អបំផុត ក្រុមហ៊ុនអីុស៊ូហ្ស៊ុម៉ូទ័រ (ប្រទេសថៃ) បានបង្កើតរោងចក្របាញ់ថ្នាំ និងលាបថ្នាំ ដោយផ្អែកលើទស្សនវិស័យ៣សំខាន់ៗគឺ គុណភាពល្អបំផុត ប្រសិទ្ធភាពខ្ពស់បំផុត និងបរិយាកាសការងារល្អបំផុត។ អីុស៊ូហ្ស៊ុ ធ្វើសកម្មភាពតាមប្រព័ន្ធគ្រប់គ្រងការផលិតដ៏លេចធ្លោហៅថា IMM ឬ Isuzu Manufacturing Management ដែលជាសកម្មភាពគ្រប់គ្រងការផលិតរបស់ក្រុមអាជីវកម្មអីុស៊ូហ្ស៊ុ ដើម្បីការពារកុំឲ្យមានការនាំយករថយន្តមិនមានបទដ្ឋានត្រឹមត្រូវចូលទៅកាន់ទីផ្សារ ដោយសកម្មភាព IMM និងដំណើរការពិនិត្យគុណភាពក្នុងសង្វាក់ផលិតកម្ម ដើម្បីពិនិត្យគុណភាពគ្រឿងបរិក្ខារនីមួយៗមុនពេលដំឡើង ធ្វើឲ្យអាចទុកចិត្តបានចំពោះការគ្រប់គ្រងគុណភាព និងប្រសិទ្ធភាពក្នុងការផលិតរបស់អីុស៊ូហ្ស៊ុ ។
៣-ទីលានបើកសាកល្បង
ក្រុមហ៊ុនបានបង្កើតទីលានបើកបរមួយឈ្មោះថា «ទីលានបើកបររថយន្ត Four Wheel Drive អីុស៊ូហ្ស៊ុ ប៉ាតាយ៉ា» ដែលបានចាប់ផ្ដើមបើកជាលើកដំបូងក្នុងឆ្នាំ១៩៩២ ជាទីសាកល្បងរថយន្តប៉ុងពីរ (Four Wheel Drive) ធំជាងគេបំផុត ល្អជាងគេបំផុត និងសម្បូរបែបជាងគេបំផុតក្នុងប្រទេសថៃ ដែលបានបំពេញតួនាទីជាសាលាបណ្ដុះបណ្ដាលពីវិធីប្រើប្រាស់រថយន្ត Four Wheel Drive យ៉ាងត្រឹមត្រូវ និងមានសុវត្ថិភាពបំផុតដល់អ្នកប្រើប្រាស់រថយន្ត ។ ដោយក្នុងនោះមានអ្នកមកចូលរួមពីផ្នែករដ្ឋ និងឯកជន ហើយត្រូវបានកត់ត្រាថា ជាសកម្មភាពមួយដើម្បីសង្គម តាមទស្សនវិស័យរបស់ស្ថាប័ន «វិថីអីុស៊ូហ្ស៊ុ» ។
ការបើកសាកល្បងនៅទីលាននេះ ប្រៀបបាននឹងការបើកបរផ្សងព្រេងក្នុងស្ថានភាពផ្លូវដ៏លំបាកដូចជា ផ្លូវរលាក់មានទួលរដិបរដុប, ផ្លូវរលាក់មានជង្ហុករណ្ដៅធំៗ, ផ្លូវទួលខ្ពស់ឡើងចុះៗកម្ពស់១០ម៉ែត្រ, ផ្លូវទួលសំយ៉ុងចុះក្រោម, ផ្លូវថ្មរលាក់, ផ្លូវតូចចង្អៀត, ផ្លូវពាក់កណ្ដាលគោក ពាក់កណ្ដាលទឹក, ផ្លូវឆ្លងកាត់ខ្សាច់, ផ្លូវស្នាមភ្លោះវែងគួរឲ្យរន្ធត់, ផ្លូវជ្រោះជ្រៅគួរឲ្យរន្ធត់, ស្ពានឆ្លងអាកាស, ជំនះទំនាញផែនដី និង ទួលផ្អៀងស្រៀវឆ្អឹងខ្នង ជាដើម ។
៤-ទីផ្សារយុទ្ធសាស្ត្រ
តាមការអះអាងពីលោកស្រី Panatda Chennavasin ក្រុមហ៊ុនអីុស៊ូហ្ស៊ុមិនយកតម្លៃធ្វើជាយុទ្ធសាស្ត្រ ក្នុងការប្រកួតប្រជែងទីផ្សារនោះទេ តែក្រុមហ៊ុននៅតែទទួលបានជោគជ័យដោយផ្ដោតលើការចនាម៉ូដ, គុណភាពរឹងមាំ ធន់គ្រប់ស្ថានភាពផ្លូវ, បច្ចេកវិទ្យានៃម៉ាស៊ីនប្រើម៉ាស៊ូត កម្លាំងខ្លាំង តម្លៃនៃការលក់ឡើងវិញ, ការផ្ដល់សេវាកម្មក្រោយពេលលក់ គ្រឿងបន្លាស់សម្បូរបែប និងបណ្ដាញភ្នាក់ងារចែកចាយលក់ ។
គន្លឹះដែលក្រុមហ៊ុនអីុស៊ូហ្ស៊ុ បានទទួលជោគជ័យនៅប្រទេសថៃ រួមមាន ៖ ផលិតផលឆ្នើម, អ្នកលក់ឆ្នើម និងគោលដៅទីផ្សារឆ្នើម ដោយក្នុងនោះមានកំណត់ពីភាពខុសគ្នានៃដៃគូប្រកួតប្រជែង ទីផ្សារភាពស្មោះត្រង់ និងភាពខ្លាំងនៃទំនាក់ទំនងជាមួយបណ្ដាញផ្សព្វផ្សាយ ។
មិនត្រឹមតែគិតពីភាពជោគជ័យប៉ុណ្ណោះទេ ក្រុមហ៊ុនអីុស៊ូហ្ស៊ុ ក៏បានចូលរួមសកម្មភាពសង្គមផងដែរ ដែលហៅថា «គម្រោងផ្ដល់ទឹកស្អាតអីុស៊ូហ្ស៊ុ» ដោយផ្ដោតសំខាន់លើសហគមន៍ និងសាលារៀន ព្រមទាំងសកម្មភាពផ្សេងៗទៀត ។
ដោយសារតែជាក្រុមហ៊ុនឈានមុខគេនៅក្នុងទីផ្សាររថយន្ដនៅប្រទេសថៃ និងសមិទ្ធផលជាច្រើនរបស់ក្រុមហ៊ុន ទើបអីុស៊ូហ្ស៊ុទទួលបានពានរង្វាន់ចំនួន៥ក្នុងរយៈពេល៣ឆ្នាំជាប់គ្នា ក្នុងនោះ «Asia Responsible Entrepreneurship Awards 2014» ជាពានរង្វាន់អន្តរជាតិ និងពានរង្វាន់ក្នុងស្រុកចំនួន៤ផ្សេងទៀត ។
តាមគោលការណ៍របស់ក្រុមហ៊ុនទ្រី ផេដ អីុស៊ូហ្ស៊ុ សេល គឺត្រូវផលិតរថយន្តដ៏ល្អឥតខ្ចោះ «Premier» របស់ម៉ាក Isuzu នៅកម្ពុជា ដោយប្ដេជ្ញាបន្តអនុវត្តតាមទស្សនៈនៃប្រតិបត្តិការពាណិជ្ជកម្មដែលបានប្រើប្រាស់ក្នុងអាជីវកម្មទទួលបានជោគជ័យអស់រយៈពេល៦០ឆ្នាំកន្លងមកនៅប្រទេសថៃ មកអនុវត្តដើម្បីជោគជ័យនៅកម្ពុជាបន្ដទៀត ។ ទស្សនៈនេះត្រូវបានហៅថា «Isuzu spririt» ពោលគឺ «ផ្ដល់សុភមង្គល និងវិបុលភាពដល់អ្នកប្រើប្រាស់ ព្រមទាំងរួមចំណែកដល់សង្គមជាតិ» ៕
ចែករំលែកព័តមាននេះ