រាជធានីភ្នំពេញ ៖ ក្រោយពីចប់ការប្រកួតលើកចុងក្រោយនៅក្នុងប្រទេសឡាវ ជាមួយក្រុមបឹងកេតអង្គរនៅចុងសប្ដាហ៍នេះ កីឡាករឆ្នើមលោក ចាន់ វឌ្ឍនាកា នឹងចាកចេញទៅកាន់ប្រទេសជប៉ុនជាផ្លូវការហើយ ដើម្បីទៅលេងជាលក្ខណៈខ្ចីជើងឱ្យក្រុម Fujieda MYFC ដែលជាក្រុមខ្លាំងមួយនៅក្នុងលីគលំដាប់ទី៣ ជប៉ុនរយៈពេល១ឆ្នាំ ។ នៅមិនទាន់មានការបញ្ជាក់ថា លោកត្រឡប់មកវិញពេលណានោះទេ ដោយគ្រាន់តែលោកបានថ្លែងទៅកាន់អ្នកគាំទ្រថា លោកនឹងនៅតែឆ្លៀតពេលជួយការងារសង្គមក្នុងនាមជាទូតសុច្ឆន្ទៈ ដោយមិនរួញរាឡើយ បន្ទាប់ពីលោកបានយល់ព្រមធ្វើជាទូតសុច្ឆន្ទៈឱ្យអង្គការ Save The Children កាលពីដើមខែកុម្ភៈ ។
យោងតាមការប្រកាសឱ្យដឹង កីឡាករ ចាន់ វឌ្ឍនាកា នឹងឡើងយន្តហោះនៅថ្ងៃអាទិត្យ ទី១២ កុម្ភៈ នេះហើយ ដោយការចាកចេញរបស់លោកត្រូវគេអះអាងថា មានអ្នកគាំទ្រច្រើននាក់ទៅជូនដំណើរ ។ ការចាកចេញរបស់លោក គឺបន្ទាប់ពីការប្រកួតរបស់ក្លិបបឹងកេតអង្គរជាមួយមួយក្រុមឡាវត្រូវបានបញ្ចប់ ហើយក៏ត្រូវចំពិធីបុណ្យជីតារបស់លោកដែលបានចែកឋានត្រូវបានរួចរាល់ ។ លោក បែរ មករា ជាមេក្រុមបាល់ទាត់បឹងកេតអង្គរបានថ្លែងបញ្ជាក់ថា ដោយសារតែហេតុផល ចាន់ វឌ្ឍនាកា មានរឿងជីតាទទួលមរណភាពនោះហើយ ដែលធ្វើឱ្យលោកត្រូវចេញទៅប្រកួតជាមួយឡាវ នៅក្នុងទីក្រុងវៀងច័ន្ទន៍ក្រោយគេ ដោយទើបតែឡើងទៅដល់នៅថ្ងៃទី៦ កុម្ភៈ គឺមុនការប្រកួតនៅក្នុងប្រទេសឡាវចាប់ផ្ដើមតែប៉ុន្មានម៉ោង ។
តែលោកថា កីឡាករឆ្នើមរូបនេះ នៅតែជួយដល់ក្រុមបានល្អ ដោយលោកបានចាត់ទុកថា ចាន់ វឌ្ឍនាកា បែងចែកអារម្មណ៍គ្រួសារមានទុក្ខ និងការប្រកួតរបស់ក្រុមឱ្យដាច់ចេញពីគ្នានោះផង ។ លោកថា ចាន់ វឌ្ឍនាកា នឹងចាកចេញទៅកាន់ប្រទេសជប៉ុននៅថ្ងៃអាទិត្យនេះ ហើយលោកគឺជាកីឡាករកម្ពុជាតែម្នាក់គត់ ដែលមានសំណាងត្រូវបានក្លិបជប៉ុនកុងត្រាខ្ចីយកទៅលេងពេញរយៈពេលមួយឆ្នាំ ដោយឱ្យចុះមកប្រកួតនៅកម្ពុជាក្នុងព្រឹត្តិការណ៍ធំៗ និងនៅពេលក្រុមមានការប្រកួតចាំបាច់ ។ លោកថា តម្លៃខ្លួនរបស់ចាន់ វឌ្ឍនាកា មានកម្រិតខ្ទង់ម៉ឺនដុល្លារ ប៉ុន្តែក្លិបមិនអាចបញ្ចេញព័ត៌មានបានទេ ដោយសារតែនោះគឺជារឿងសម្ងាត់ ។ ក្នុងនោះ លោកក៏បានប្រកាសពីអវត្តមានរបស់កីឡាករឆ្នើមរូបនេះក្នុងក្រុមថា នឹងមិនធ្វើឱ្យក្រុមមានការប៉ះពាល់សម្រាប់ការប្រកួតរបស់ខ្លួននោះផង ដោយសារតែក្រុមក៏បានត្រៀមជើងកីឡាករល្អៗលេងជំនួសនៅពេលចាន់ វឌ្ឍនាកា ជាប់ជើងទាត់ឱ្យជប៉ុន ។
មុនការចាកចេញ ចាន់ វឌ្ឍនាកា បានយល់ព្រមចុះហត្ថលេខាធ្វើជាទូតសុច្ឆន្ទៈដល់អង្គការក្មេងកំព្រា Save The Children ដោយលោកប្រកាសថា បើទោះជាត្រូវជាប់ភារៈប្រកួតបាល់ទាត់នៅក្នុងប្រទេសជប៉ុន ប៉ុន្តែឱ្យតែក្មេងៗត្រូវការនោះលោកនឹងចុះមកភ្លាម ។ លោកក៏ប្រកាសពីជំហរជ្រោមជ្រែងឱ្យកុមារនៅក្នុងអង្គការនោះបានក្លាយជាកីឡាករអាជីពសម្រាប់អ្នកមានទេពកោសល្យ និងគ្រោងដើរតួជាអ្នករៃអង្គាសប្រាក់ ដើម្បីឱ្យមានការចាប់អារម្មណ៍ជួយដល់អង្គការក្មេងមួយនេះផង ។ លោកថា លោកមានការងារត្រូវប្រកួត និងហ្វឹកហាត់បាល់ច្រើន តែលោកនៅតែឆ្លៀតពេលឱ្យបានច្រើនជួយជាប្រយោជន៍ដល់ក្រុមអង្គការដែលលោកបានសម្រេចចិត្តធ្វើជាទូតសុច្ឆន្ទៈមុនការចាកចេញទៅកាន់ប្រទេសជប៉ុន ។ លោកក៏មានគម្រោងជួយបំផុសឱ្យក្រុមអ្នកមានទឹកចិត្តសប្បុរសធម៌ ជាពិសេសគឺក្រុមហ៊ុនធំៗផ្ដល់ជាប្រយោជន៍ជួយដល់ក្មេងៗទាំងនោះ ដោយលោកប្រកាសថា នឹងទទួលធ្វើឱ្យអស់ពីលទ្ធភាព ដើម្បីផ្ដល់ក្ដីសង្ឃឹមដល់ក្មេងៗដែលពឹងពាក់លោក ។ ជាមួយនឹងការប្រកាសជួយដល់អង្គការ Save The Children បើទោះជាត្រូវមានការងារត្រូវបំពេញនៅក្នុងប្រទេសជប៉ុន ក៏លោកប្រកាសថា នឹងប្រឹងប្រែងប្រកួតជាលក្ខណៈខ្ចីជើងនៅក្នុងប្រទេសជប៉ុន ដើម្បីឱ្យអ្នកគាំទ្រនៅកម្ពុជាសប្បាយចិត្តផងដែរ ។
យ៉ាងណាមិញ មានការបញ្ជាក់ថា លោកចាកចេញទៅកាន់ប្រទេសជប៉ុន នៅថ្ងៃទី១២ កុម្ភៈ គឺមិនសូវសប្បាយចិត្តអស់ពីពោះប៉ុន្មានទេ ដោយសារតែពេលជីតាស្លាប់ លោកថា ខ្លួនមិនបាននៅជួយឱ្យពេញដៃពេញជើង ព្រោះជីតាខូចចំពេលក្រុមបឹងកេតអង្គរត្រូវត្រៀមប្រកួតជាមួយឡាវនៅក្នុងទីក្រុងវៀងច័ន្ទន៍។ ជាមួយគ្នានេះ លោកក៏អន់ចិត្តមិនតិចដែរ ដែលខ្លួនមិនមានពេលសូម្បីសម្រាប់ខ្លួនឯង និងគ្រួសារចាប់តាំងពីក្លាយជាកីឡាករបាល់ទាត់ ។ លោកថា បាល់ទាត់ជាអាជីព ជាបេះដូង ប៉ុន្តែពេលខ្លះលោកក៏រាងនឿយណាយ ហើយចង់ដកខ្លួនម្ដងៗដែរ ។ ទោះបីយ៉ាងណា លោកថា មិនអាចនោះទេ ដោយសារតែលោកត្រូវធ្វើឱ្យអ្នកគាំទ្ររបស់លោកសប្បាយចិត្តក្នុងឱកាសដែលលោកបានចេញទៅលេងនៅក្នុងប្រទេសជប៉ុនជាលក្ខណៈខ្ចីជើង និងត្រូវប្រឹងប្រែងជួយដល់ក្មេងៗក្នុងនាមជាទូតសុច្ឆន្ទៈច្រើនទៀត ។
លោក Jun Koyama ប្រធានក្លិបបាល់ទាត់ Fujieda MYFC បានអះអាងថា ទម្រង់លេងរបស់ចាន់ វឌ្ឍនាកា លេងល្អ ទើបធ្វើឱ្យក្លិបរបស់លោកចាប់អារម្មណ៍ខ្ចីជើងយកទៅលេង ដោយគ្រោងនឹងបណ្ដុះឱ្យលោកក្លាយជាកីឡាករដែលមានសមត្ថភាពនៅក្នុងតំបន់តែម្ដងនាពេលអនាគត ។ ក្លិបក៏មានគម្រោងចុះកុងត្រាយកលោកសម្រាប់ឆ្នាំទី២ ផងដែរ ប្រសិនបើការងារជំហានដំបូងទទួលបានជោគជ័យក្រោយ ចាន់ វឌ្ឍនាកា ចេញទៅប្រកួតនៅក្នុងប្រទេសជប៉ុននេះ ៕
ចែករំលែកព័តមាននេះ