គេហទំព័រ «តេឡេក្រាហ្វ» កាលពីថ្ងៃទី១៦ មីនា បានចេញផ្សាយព័ត៌មាន ដោយដកស្រង់សម្តីរដ្ឋមន្ត្រីការបរទេសសហរដ្ឋអាមេរិកលោកស្រីហ៊ីលឡារី គ្លីនតុន ដែលថ្លែងនៅថ្ងៃទី១៦ មីនា នោះថា លោកស្រីមិនចង់បន្តតំណែងរបស់លោកស្រីទៀតឡើយ ប្រសិនទោះបើលោកប្រធានាធិបតីបារ៉ាក់ អូបាម៉ា ឈ្នះឆ្នោតអាណត្តិទី២ នៅឆ្នាំ២០១២ ខាងមុខនេះទៀតក៏ដោយ ។ អ្នកការទូតជាន់ខ្ពស់អាេមរិកមួយរូបនិយាយថា លោកស្រីគ្លីនតុន មិនមានផែនការចង់នៅក្នុងសេតវិមាន ឬចង់បន្តតំណែងរបស់លោកស្រីទៀតឡើយ ។
លោកស្រីគ្លីនតុន ត្រូវបានចោទសួរអំពីបំណងចង់បន្តតំណែងរបស់លោកស្រីនៅពេលលោកស្រីបំពេញទស្សនកិច្ចក្នុងទីក្រុងគែរ ប្រទេសអេហ្ស៊ីប កាលពីពេលថ្មីៗកន្លងមក ។
តាមប្រភពខ្លះថា លោកស្រីគ្លីនតុន ចង់ចាកចេញពីតំណែងរដ្ឋមន្ត្រីការបរទេស ដោយសារលោកស្រីចង់កាន់តំណែងរដ្ឋមន្ត្រីការពារប្រទេសបន្តវេនពីលោករ៉ូប៊ែត ហ្គេត ខណៈពេលមានប្រភពខ្លះបង្ហើបថា លោករ៉ូប៊ែត ហ្គេត នឹងសុំលាចេញពីតំណែង ប៉ុន្តែលោកស្រីគ្លីនតុន បញ្ជាក់ច្បាស់ថា លោកស្រីពុំមានបំណងឈរឈ្មោះសម្រាប់មុខតំណែងប្រមុខប៉ង់តាហ្គោន នោះទេ ។ លោកស្រីគ្លីនតុន ថ្លែងថា «ខ្ញុំធ្វើអ្វីដែលខ្ញុំចង់ធ្វើ ហើយខ្ញុំមិនមានបំណងឈរឈ្មោះសម្រាប់តំណែងនេះម្តងទៀតនោះទេ ៕
ចែករំលែកព័តមាននេះ