រាជធានីភ្នំពេញ ៖ ការប្រកួតកីឡាបាល់ទះយុវសិស្សវិទ្យាល័យដណ្ដើមពានរង្វាន់សាកលវិទ្យាល័យវេស្ទើនឆ្នាំនេះមាន២៥ក្រុមចូលរួម ដែលមកពីតាមវិទ្យាល័យនានានៅក្នុងរាជធានីភ្នំពេញ ដោយចាប់ផ្ដើមបើកឆាកដំបូងនា
រាជធានីភ្នំពេញ ៖ ការប្រកួតកីឡាបាល់ទះយុវសិស្សវិទ្យាល័យដណ្ដើមពានរង្វាន់សាកលវិទ្យាល័យវេស្ទើនឆ្នាំនេះមាន២៥ក្រុមចូលរួម ដែលមកពីតាមវិទ្យាល័យនានានៅក្នុងរាជធានីភ្នំពេញ ដោយចាប់ផ្ដើមបើកឆាកដំបូងនាថ្ងៃទី២៣ កុម្ភៈ នៅទីលានបាល់ទះនៃពហុកីឡដ្ឋានជាតិអូឡាំពិក ។ បន្ទាប់ពីនោះ គឺធ្វើឡើងនៅតាមវិទ្យាល័យដែលគណៈកម្មការរៀបចំការប្រកួតបានកំណត់ទុក ។
លោក តែ ឡូរិន សាកលវិទ្យាធិការនៃសាកលវិទ្យាល័យវេស្ទើន បានមានប្រសាសន៍នៅក្នុងសន្និសីទសារព័ត៌មានកាលពីថ្ងៃទី៦ កុម្ភៈ កន្លងមកនេះថា កម្មវិធីប្រកួតនេះមានការសហការជាមួយមន្ទីរអប់រំ យុវជន និងកីឡារាជធានីភ្នំពេញ ក្នុងគោលបំណងបំផុសចលនាយុវជនចូលរួមលេងកីឡាឱ្យបានច្រើន ចៀសឆ្ងាយពីគ្រឿងញៀន និងដើម្បីសុខភាពប៉ុណ្ណោះ ។
លោក ស្រេង សេង ប្រធានគ្រប់គ្រងកម្មវិធីប្រកួតកីឡានៃមន្ទីរអប់រំ យុវជន និងកីឡារាជធានីភ្នំពេញ បានឱ្យដឹងថា ការប្រកួតត្រូវអនុវត្តទៅតាមបទដ្ឋានបច្ចេកទេសរបស់សហព័ន្ធកីឡាជាតិ ហើយអ្នកដែលចូលរួមប្រកួតត្រូវមានអាយុចាប់ពី១៩ឆ្នាំឡើង ។ ចំពោះរូបមន្តប្រកួតវិញ ក្រុមទាំង២៥ត្រូវបែងចែកជា៤ពូល (A B C D) ក្នុងមួយពូលមាន៦ក្រុម ដោយឡែកពូល D មាន៧ក្រុម ។
ចំណែកប្រាក់រង្វាន់វិញ ចំណាត់ថ្នាក់លេខ១ ទទួលបាន១០លានរៀល លេខ២ ទទួលបាន៦លានរៀល លេខ៣ ទទួលបាន៤លានរៀល និងលេខ៤ ទទួលបាន៣លានរៀល។
លោក តែ ឡូរិន បានឱ្យដឹងទៀតថា លោកមានបំណងចង់បង្កើនប្រាក់រង្វាន់ឱ្យបានច្រើនជាងនេះ ដូច្នេះលោកសូមអំពាវនាវដល់បណ្ដាដៃគូឧបត្ថម្ភនានា បើមានបំណងចង់ចូលរួមលោកនឹងស្វាគមន៍ជានិច្ច ព្រោះថា ការប្រកួតនេះ ធ្វើឡើងក្នុងគោលបំណងលើកកម្ពស់វិស័យកីឡាបាល់ទះនៅកម្ពុជាឱ្យកាន់តែមានការរីកចម្រើនថែមទៀត ។ ដូច្នេះ ដើម្បីឱ្យដំណើការប្រកួតកាន់តែទទួលបានការគាំទ្រពីសំណាក់មហាជនកាន់តែច្រើននោះ លោកសំណូមពរដល់គណៈកម្មការរៀបចំការប្រកួត ក៏ដូចជាគណៈកម្មការផ្ដល់ពិន្ទុ ត្រូវផ្ដល់ពិន្ទុឱ្យមានភាពសុក្រឹត និងយុត្តិធម៌បំផុត ។
ពាក់ព័ន្ធនឹងបញ្ហានេះ លោក ស្រេង សេង បានឱ្យដឹងថា ភាពចម្រូងចម្រាសដែលតែងតែកើតមានឡើងច្រើនតែក្រុមដែលចាញ់ប៉ុណ្ណោះ ។
ដូច្នេះដើម្បីឱ្យការប្រកួតប្រកបដោយភាពរលូនល្អ មានតែគ្រប់ក្រុមទាំងត្រូវប្រកាន់យកនូវគោលការណ៍ Fair Play ៕
ចែករំលែកព័តមាននេះ