ថ្ងៃស៊យ ចោះដំបូលផ្ទះលួចលុយចំណងដៃ បាក់ឮសូរប្រាវ! ធ្លាក់ចោរចូលក្នុងបន្ទប់
ខេត្តព្រៃវែង ៖ ចោរជួបថ្ងៃស៊យម្នាក់បានអស់លក្ខណ៍ ក្រោយពីធ្វើសកម្មភាពឡើងចោះទម្លុះដំបូលផ្ទះអ្នកស្រុកបំណងចូលលួចលុយចំណងដៃមង្គលការ ចៃដន្យអាក្រក់
ខេត្តព្រៃវែង ៖ ចោរជួបថ្ងៃស៊យម្នាក់បានអស់លក្ខណ៍ ក្រោយពីធ្វើសកម្មភាពឡើងចោះទម្លុះដំបូលផ្ទះអ្នកស្រុកបំណងចូលលួចលុយចំណងដៃមង្គលការ ចៃដន្យអាក្រក់ដំបូលផ្ទះបានបាក់ធ្លាក់ចោររូបនេះចូលក្នុងបន្ទប់ក៏ដឹងដល់ម្ចាស់ផ្ទះស្ទុះទៅចាក់សោពីខាងក្រៅជាប់ចេញទៅណាមិនរួច ទើបត្រូវប៉ូលិសចាប់បំពាក់ខ្នោះដៃកណ្តាលយប់ ។
ហេតុការណ៍នេះបានកើតឡើង កាលពីវេលាម៉ោង១២និង៥០នាទីរំលងអធ្រាត្រឈានចូលថ្ងៃទី៦ កុម្ភៈ នៅផ្ទះឈ្មោះ ធួន ឃី ដែលកំពុងរៀបមង្គលការស្ថិតក្នុងភូមិព្រៃព្នៅ ឃុំព្រៃព្នៅ ស្រុកពារាំង ។ ជនសង្ស័យដែលត្រូវចាប់ខ្លួនឈ្មោះ ហ៊ី វ៉ារី ភេទប្រុស អាយុ២៤ឆ្នាំ មានទីលំនៅក្នុងភូមិកើតហេតុ ។
លោក ស៊ឹម កុសល អធិការនគរបាលស្រុកពារាំងបានប្រាប់ឱ្យដឹងថា តាមការរៀបរាប់របស់ម្ចាស់ផ្ទះឈ្មោះ ធួន ឃី ភេទប្រុស អាយុ៤៥ឆ្នាំថា នៅល្ងាចមុនពេលកើតហេតុ ផ្ទះគាត់មានរៀបចំពិធីមង្គលការកូន ។ ក្រោយពីភ្ញៀវចូលរួមមង្គលការត្រឡប់ទៅវិញអស់គាត់ជាម្ចាស់ដើមការបានយកលុយចំណងដៃ ទៅទុកក្នុងបន្ទប់ក្នុងផ្ទះរួចចេញមកផឹកស៊ីសប្បាយបន្តជាមួយបងប្អូនសាច់ញាតិនៅខាងក្រៅ ។ រហូតដល់ម៉ោងជាង១២យប់រំលងអធ្រាត្រស្រាប់តែឮសំឡេងធ្លាក់ប្រាវនៅក្នុងផ្ទះ ពួកគាត់ក៏នាំគ្នាទៅមើលក៏ស្រាប់តែឃើញជនសង្ស័យនៅក្នុងបន្ទប់ដាក់ចំណងដៃនោះ ទើបចាក់សោពីខាងក្រៅជាប់ ហើយរាយការណ៍ប្រាប់សមត្ថកិច្ចឱ្យមកចាប់ខ្លួនតែម្តង ។
ជនសង្ស័យក្រោយពីត្រូវចាប់ខ្លួនបានឆ្លើយសារភាពថា រូបគេពិតជាមានបំណងចូលទៅលួចលុយចំណងដៃនោះមែន ដោយបានឡើងលើដំបូលផ្ទះបំណងចោះទម្លុះដំបូលចូលទៅលួចលុយនោះ ។ ប៉ុន្តែចៃដន្យអាក្រក់ពេលកំពុងចោះដំបូលនោះ ស្រាប់តែបាក់ដំបូលធ្លាក់ទាំងរូបគេចូលទៅក្នុងបន្ទប់តែម្តង ទើបធ្វើឱ្យភ្ញាក់ផ្អើលដល់ម្ចាស់ផ្ទះនាំគ្នារត់ទៅបិទទ្វារចាក់សោជាប់ចេញទៅណាលែងរួច ។
បច្ចុប្បន្ន ជនសង្ស័យរូបនេះត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមនីតិវិធី ។
គួរបញ្ជាក់ថា សម្រាប់ខេត្តព្រៃវែង រឿងចោរលួចលុយចំណងដៃមង្គលការនេះ មិនមែនទើបតែកើតមានជាលើកទី១នោះទេ កាលពីមុនក៏មានមហាចោរលួចលុយចំណងដៃម្នាក់ដែរឈ្មោះ ឡាយ ផៃ ។ មេចោរម្នាក់នេះល្បីឈ្មោះខ្លាំងណាស់ខាងលួចលុយចំណងដៃមង្គលការកូនអ្នកស្រុកនៅព្រៃវែង ស្វាយរៀង ត្បូងឃ្មុំ កំពង់ចាម ហើយអ្នកណាក៏ខ្លាចរអារដែរ ប៉ុន្តែទីបំផុតជននោះក៏មានថ្ងៃអស់លក្ខណ៍ដែរ ។ អស់លក្ខណ៍គឺបន្ទាប់ពីរូបគេធ្វើសកម្មភាពលួចលុយចំណងដៃក្នុងពិធីមង្គលការ១នៅស្រុកស្វាយអន្ទរ តែរត់មិនរួចត្រូវអ្នកស្រុកនិងសមត្ថកិច្ចសហការគ្នាចាប់បានបញ្ជូនទៅតុលាការកាត់ទោសឱ្យជាប់ពន្ធនាគារអស់មួយជីវិតកាលពីប៉ុន្មានខែមុននេះ ។
ពេលនេះកើតមានចោរលួចលុយចំណងដៃទៀតហើយ ប៉ុន្មានវាសនាចោរម្នាក់នេះក៏មិនខុសពីមហាចោរ ឡាយ ផៃ ដែរ គឺត្រូវតែចូលទៅដេកក្នុងគុកដូចគ្នា ៕
ចែករំលែកព័តមាននេះ