រាជធានីភ្នំពេញ ៖ កម្ពុជាជាប្រទេសដែលមានកំណើនសេដ្ឋកិច្ចរឹងមាំក្នុងរង្វង់៧% ជាច្រើនឆ្នាំមកហើយ ។ ផ្អែកលើកំណើនប្រកបដោយស្ថិរភាពបែបនេះ ក៏ដូចជាសុវត្ថិភាពសង្គម និងបរិយាកាសនយោបាយល្អប្រសើរ
រាជធានីភ្នំពេញ ៖ កម្ពុជាជាប្រទេសដែលមានកំណើនសេដ្ឋកិច្ចរឹងមាំក្នុងរង្វង់៧% ជាច្រើនឆ្នាំមកហើយ ។ ផ្អែកលើកំណើនប្រកបដោយស្ថិរភាពបែបនេះ ក៏ដូចជាសុវត្ថិភាពសង្គម និងបរិយាកាសនយោបាយល្អប្រសើរ ធ្វើឲ្យក្រុមហ៊ុនវិនិយោគជប៉ុនចូលមកបណ្ដាក់ទុនកាន់តែកើនឡើងគួរឲ្យកត់សម្គាល់ពីមួយឆ្នាំទៅមួយឆ្នាំ។ កត្ដាទាំងនេះ ក៏បានជំរុញឲ្យក្រុមហ៊ុន Isuzu Motors Limited សម្លឹងឃើញទីផ្សាររថយន្ដនៅកម្ពុជាផងដែរ ដោយបានផ្ដល់សិទ្ធិឲ្យក្រុមហ៊ុន ទ្រី ផេដ អ៊ីស៊ូហ្ស៊ុ សេល ខូអិលធីឌី នាំចូលមកចែកចាយ ។
ទ្រី ផេដ អ៊ីស៊ូហ្ស៊ុ សេល ជាក្រុមហ៊ុនទទួលបានជោគជ័យយ៉ាងខ្លាំងនៅប្រទេសថៃក្នុងរយៈពេល៦០ឆ្នាំកន្លងមក បាននាំចូលរថយន្ដ «Isuzu D-Max» និង «Isuzu MU-X» មកចែកចាយនៅកម្ពុជា និងឡាវ ដោយហេតុថា ប្រទេសទាំងពីរនេះ កំពុងតែមានសក្ដានុពលទីផ្សាររថយន្ដដ៏អស្ចារ្យ ដោយសារមានកំណើន GDP ៧% នៅកម្ពុជា និង ៦% នៅឡាវ ។ កំណើននៃ GDP នេះហើយដែលជាជំហានដំបូងដ៏សំខាន់បំផុតសម្រាប់ក្រុមហ៊ុនឈានជើងចូលក្នុងទីផ្សារអាស៊ាន ។
ថ្លែងក្នុងកិច្ចសម្ភាសន៍ជាមួយអ្នកសារព័ត៌មាន ក្នុងឱកាសប្រារព្ធខួប៦០ឆ្នាំ នៃភាពជោគជ័យលើទីផ្សាររថយន្ដរបស់ខ្លួន កាលពីថ្ងៃទី២ ខែកុម្ភៈ លោក AKIRA ODAGAKI ប្រធានគ្រប់គ្រងទូទៅនៃក្រុមហ៊ុនប្រចាំនៅកម្ពុជា បានឲ្យដឹងថា ទីផ្សាររថយន្ដនៅប្រទេសកម្ពុជាបច្ចុប្បននេះ កំពុងតែមានសក្ដានុពលខ្លាំង ដោយផ្អែកលើកំណើនសេដ្ឋកិច្ចកម្ពុជាមានភាពរឹងមាំក្នុងរង្វង់៧% ជាច្រើនឆ្នាំមកនេះ ដែលធ្វើឲ្យប្រជាជនកម្ពុជាធូរធារ និងមានលទ្ធភាពជាងមុន ហើយអាចឲ្យក្រុមហ៊ុនមើលឃើញឱកាសក្នុងការធ្វើអាជីវកម្ម ពិសេសសម្រាប់ទីផ្សាររថយន្ដ ។ យ៉ាងណាក៏ដោយ ទីផ្សារមួយនេះ កំពុងតែប្រកួតប្រជែងគ្នាយ៉ាងខ្លាំង ប៉ុន្ដែទោះជាយ៉ាងនេះក្ដី ក៏ការលក់រថយន្ដក្រុមហ៊ុន Isuzu នៅកម្ពុជា នៅតែរីកចម្រើនទៅមុខលើទីផ្សារ ព្រោះថា ចំនួនលក់គឺមានការកើនឡើងជាបន្ដបន្ទាប់ បើទោះបីជាក្រុមហ៊ុនទើបតែចាប់ផ្ដើមជ្រៀតចូលទីផ្សារនៅកម្ពុជាជាផ្លូវការកាលពីពាក់កណ្ដាលឆ្នាំមុនក្ដី ។
លោកថ្លែងថា ៖ « ចំណុចពិសេសរបស់រថយន្ដ Isuzu គឺរថយន្ដភីកអាប់ ដែលល្អបំផុតសម្រាប់ម៉ាស៊ីនម៉ាស៊ូត គួបផ្សំនឹងគុណភាពរបស់រថយន្ដ Isuzu មាំ ធន់ល្អ ពិសេសយើងមានសេវាកម្មថែទាំរថយន្ដជូនដល់អតិថិជនក្រោយពេលលក់យ៉ាងដិតដល់ ហើយនេះជាចំណុចពិសេសដែលយើងយកឈ្នះលើដៃគូ » ។
« កាលពីឆ្នាំ២០១៦ យើងលក់រថយន្ដបានចំនួន១៥៣គ្រឿង បើធៀបនឹងឆ្នាំ២០១៥ គឺកើនឡើងគុណនឹង២ដង ក្នុងនោះរថយន្ដ Pick Up និង SUV លក់ដាច់ជាងគេបំផុត ហើយនៅក្នុងឆ្នាំ២០១៧នេះ យើងសង្ឃឹមថា ការលក់នឹងមានកំណើនថែមទៀត » ។ នេះបើតាមប្រធានគ្រប់គ្រងទូទៅរូបនេះបានបញ្ជាក់ ។
ប្រទេសថៃ គឺជាបេះដូងដ៏សំខាន់នៃមូលដ្ឋានផលិតរថយន្តភីកអាប់ ដ៏សម្បូរបែបបំផុតរបស់ Isuzu ចាប់តាំងពីក្រុមហ៊ុននេះ បានសម្រេចផ្លាស់មូលដ្ឋានផលិតរថយន្តភីកអាប់ពីប្រទេសជប៉ុនមកកាន់ប្រទេសថៃតាំងពីឆ្នាំ២០០២មក ។
បច្ចុប្បន្ន អ៊ីស៊ូហ្ស៊ុ មានរោងចក្រផលិតរថយន្តភីកអាប់ចំនួន២កន្លែង គឺ រោងចក្រអ៊ីស៊ូហ្ស៊ុ សំរោង ក្នុងខេត្តសមុទ្រប្រាកាន និងរោងចក្រអ៊ីស៊ូហ្ស៊ុ ហ្គេតវ៉េយ៍ ក្នុងខេត្តឆាក់ឆឺងសៅ ដោយមានកម្មករនិយោជិតក្នុងរោងចក្រទាំងពីរសរុបជាង៥.៥០០នាក់ និងមានកម្លាំងផលិតខ្ពស់រហូតដល់៤០ម៉ឺនគ្រឿងក្នុង១ឆ្នាំ ។
តាមរបាយការណ៍លក់របស់ក្រុមហ៊ុនបង្ហាញថា ការលក់រថយន្ដ «Isuzu D-Max» ក្នុងប្រទេសថៃ នៅឆ្នាំ២០០២ មានការកក់ទិញជាង១ម៉ឺនគ្រឿង ក្នុងរយៈពេល១០ថ្ងៃនៃការដាក់បង្ហាញក្នុងទីផ្សារ និងលក់ចេញជាង១លានគ្រឿងក្នុងរយៈពេល៧ឆ្នាំ (ឧសភា ២០០២-កញ្ញា ២០១០) ។ ក្នុងឆ្នាំ២០១១ រថយន្តភីកអាប់ «All-new Isuzu D-Max» បានបង្កើតភាពលេចធ្លោសាជាថ្មី ដោយមានការកក់ពីអតិថិជនរហូតដល់១,៥ម៉ឺនគ្រឿងក្នុងរយៈពេល៣ថ្ងៃ ។ ក្នុងឆ្នាំ២០១៣ «Isuzu MU-X» ដែលជាប្រភេទរថយន្តដឹកអ្នកដំណើរដ៏ល្អប្រណីតត្រូវបានដាក់តាំងបង្ហាញ និងលក់ចេញចំនួន៥ពាន់គ្រឿងក្នុងរយៈពេល១០ថ្ងៃ ហើយការលក់ប្រចាំឆ្នាំមានចំនួន២ម៉ឺនគ្រឿង ដែលជាកំណត់ត្រាថ្មីសម្រាប់ផ្នែករថយន្តដឹកអ្នកដំណើរ ។ នៅខែវិច្ឆិកា ឆ្នាំ២០១៥ រថយន្តភិកអាប់ «New Isuzu D-Max Blue Power» បានបង្កើតភាពលេចធ្លោមួយក្នុងអំឡុងពេលសេដ្ឋកិច្ចនៃទីផ្សាររថយន្តប្រទេសថៃមានការថយចុះ ។ បន្ទាប់មក ក្នុងខែមីនា ឆ្នាំ២០១៦ ក៏មានការចេញម៉ូដែលថ្មីមួយទៀត គឺ «Isuzu MU-X Blue Power» ដែលធ្វើឲ្យអ្នកបើកបររថយន្តយ៉ាងច្រើនលើសលប់កាន់តែពេញចិត្តនឹងរថយន្តនេះ រហូតមកដល់សព្វថ្ងៃ ។
ក្រៅពីការកសាងកេរ្តិ៍ឈ្មោះ «Isuzu» ឲ្យមានភាពរឹងមាំ ក្រុមហ៊ុន ទ្រី ផេដ អ៊ីស៊ូហ្ស៊ុ សេល ក៏បានចូលរួមសកម្មភាពសង្គមជាច្រើន តាមរយៈការបណ្ដុះបណ្ដាលធនធានមនុស្ស ការអភិវឌ្ឍប្រព័ន្ធទឹកស្អាតនៅតាមសហគមន៍ និងសកម្មភាពមនុស្សធម៌ជាច្រើនទៀត ស្របតាមគោលការណ៍របស់ខ្លួន ដែលមិនត្រឹមតែជាអ្នកជួយដឹកជញ្ជូនទំនិញ និងមនុស្សប៉ុណ្ណោះទេ ប៉ុន្តែថែមទាំងជួយដឹកជញ្ជូននូវក្ដីសង្ឃឹម និងជោគជ័យជូនដល់មនុស្សទូទាំងពិភពលោក ឲ្យបានទទួលសេចក្ដីសុខពីការប្រើប្រាស់រថយន្ត អ៊ីស៊ូហ្ស៊ុ ថែមទៀត ដោយអនុលោមតាមទស្សនវិស័យរបស់ខ្លួនដែលចែងថា «អ្នកប្រើប្រាស់សប្បាយចិត្ត ចំណូលកើនឡើង ជួយឲ្យសង្គមអភិវឌ្ឍន៍» ឬហៅថា «វិថីអ៊ីស៊ូហ្ស៊ុ » ៕
ចែករំលែកព័តមាននេះ