ម៉ិកស៊ិកគំរាមឈប់ប្រើប្រាស់ផលិតផលរបស់អាមេរិក
ប្រទេសម៉ិកស៊ិក ៖ ប្រជាជនម៉ិកស៊ិកដែលរស់នៅក្នុងក្រុងតាមបណ្តោយព្រំដែន និងរដ្ឋធានី កំពុងខឹងសម្បានឹងគម្រោងរបស់លោក Donald Trump ក្នុងការសាងសង់ជញ្ជាំងរវាងដៃគូរាប់រយឆ្នាំ និង
ប្រទេសម៉ិកស៊ិក ៖ ប្រជាជនម៉ិកស៊ិកដែលរស់នៅក្នុងក្រុងតាមបណ្តោយព្រំដែន និងរដ្ឋធានី កំពុងខឹងសម្បានឹងគម្រោងរបស់លោក Donald Trump ក្នុងការសាងសង់ជញ្ជាំងរវាងដៃគូរាប់រយឆ្នាំ និងការគំរាមដាក់ពន្ធ២០% លើផលិតផលរបស់មុិកស៊ិកដែលនាំចូលទឹកដីសហរដ្ឋអាមេរិក ដើម្បីយកថវិកាមកសាងសង់ជញ្ជាំងនេះ ។
ខណៈអ្នកនយោបាយកំពុងតែថ្លឹងថ្លែងស្ថានការណ៍ ប្រជាជនម៉ីកស៊ិកលែងរង់ចាំទៀតហើយ។ មានមនុស្សជាច្រើនបានប្រើប្រាស់ប្រព័ន្ធសង្គមដើម្បីបង្ហាញនូវការប្រឆាំង ។
យុទ្ធនាការត្រូវបានប្រព្រឹត្តឡើងលើប្រព័ន្ធសង្គម និងជំរុញដល់ប្រជាជនម៉ិកស៊ិកឲ្យឈប់ទៅហាង McDonald’s, Starbucks, Walmart និងឈប់ទទួលទានកូកាកូឡាជាដើម បន្ទាប់ពីលោក Trump បានចេញបទបញ្ជាដើម្បីសាងសង់ជញ្ជាំង ។
យ៉ាងណាក្តី មានអតិថិជនជាច្រើនជឿជាក់ថា ការធ្វើបែបនេះមានតែធ្វើបាបប្រជាជនម៉ិកស៊ិកខ្លួនឯងប៉ុណ្ណោះ ។
លោក Fernando Ruiz និយាយថា ៖ «ក្រុមហ៊ុនអាមេរិកដែលដំណើរការនៅម៉ិកស៊ិក គឺសុទ្ធតែជាក្រុមហ៊ុនម៉ិកស៊ិកទិញសិទ្ធិផលិត និងចែកចាយ ហើយបុគ្គលិកទាំងនោះ គឺជាជនជាតិម៉ិកស៊ិកផងដែរ » ។
ក្រុមហ៊ុនអាមេរិកធំៗ និងល្បីល្បាញជាច្រើនដែលដំណើរការនៅម៉ិកស៊ិក គឺសុទ្ធតែជាក្រុមហ៊ុនក្នុងស្រុកដែលទិញសិទ្ធិផលិត និងចែកចាយ ។
យ៉ាងណាក្តី ការងារប្រមាណ៦លានរបស់សហរដ្ឋអាមេរិក គឺពឹងផ្អែកលើការធ្វើពាណិជ្ជកម្មជាមួយម៉ិកស៊ិក ។ ការដាក់ពន្ធលើផលិតផលនាំចេញពីម៉ិកស៊ិក អាចនឹងប៉ះពាល់ដល់ក្រុមហ៊ុនអាមេរិកជាច្រើនដែលនាំចេញគ្រឿងដំឡើងនៅម៉ិកស៊ិកហើយនាំចូលវិញ ប៉ុន្តែការព្រួយបារម្ភជាងគេនោះ គឺការគំរាមកំហែងរបស់លោក Trump ក្នុងការចរចា NAFTA ឡើងវិញ ។
អ្នកជំនាញនិយាយថា លោកប្រធានាធិបតី Pena Nieto មានផែនការមួយចំនួនទៀត ។ ឧទាហរណ៍ ម៉ិកស៊ិកអាចនឹងបញ្ឈប់ការសហការជាមួយសហរដ្ឋអាមេរិកលើបញ្ហាសន្តិសុខ និងគ្រឿងញៀនជាដើម ។
ក្នុងសន្និសីទកាសែតមួយកាលពីថ្ងៃពុធមុន លោកក៏បានជំរុញដល់ប្រជាជនឲ្យទិញផលិតផលផលិតនៅម៉ិកស៊ិកផងដែរ ដើម្បីឆ្លើយតបនឹងគោលនយោបាយអាមេរិកទី១ របស់លោក Trump ។
អតិថិជនមួយចំនួនបានយល់ស្របនឹងការលើកតម្កើងផលិតផលក្នុងស្រុក និងបញ្ឈប់ការប្រើប្រាស់ផលិតផលរបស់អាមេរិកផងដែរ ។
អតិថិជនម្នាក់ឈ្មោះ Susana Gonzalez និយាយថា ៖ « វិធីដោះស្រាយ គឺមិនមែនបញ្ឈប់ការប្រើប្រាស់ទេ ព្រោះពួកយើងកំពុងធ្វើបាបប្រជាជនរបស់ខ្លួន ។ ពួកយើងត្រូវតែផលិតផលិតផលល្អៗ » ៕
ចែករំលែកព័តមាននេះ